何家淑女
何超鳳追逐芭蕾夢
要籌款，啲橋都要夠特別。上月，賭王二房女、信德集團副董事總經理何超鳳，便孖住其他五個名媛一齊跳芭蕾舞，為香港芭蕾舞團籌款，結果她們籌到超過一百萬。這一跳同時令五歲學過一年芭蕾舞的她想重拾舊歡，何超鳳說：「跑步、游水我要爭取的是時間，要快，你個樣可以好緊張，但跳舞個樣要好 enjoy，要笑，更加困難。」
何超鳳與家姐超瓊（右一）、妹妹超蕸（左一）和超儀（右二）感情融洽， Daisy說：「我哋（兄弟姊妹）有時又會約出來食晏或食晚飯。」
何超鳳（ Daisy）著平底鞋氣沖沖進來，她笑話：「我（性格）好急，我行路食飯都快，我有時可以五分鐘食完一餐飯。」別的阿太喜歡穿金戴銀，當日她只戴手錶，說她務實，她反說笑：「亦可能我懶。」她說話時笑容滿面，和平日 cool爆性格截然不同，她說：「做人要謙虛， Daddy成日教我哋，手抱 BB你都要叫阿哥。」今年做了香港芭蕾舞團主席的她，剛在三星期內用五十小時練舞籌款，「父母由小教導我們要回饋社會，以前要跟兩個女功課，現在佢哋在外國讀書，所以把私人時間用來做公職。我個人接受得挑戰，我就好俾心機去做。」
當日跳舞五位成員，除了她還有前行會成員葉維義太太葉梁美蘭、契女曾昭怡、莊士太子女莊家蕙和保良局鄭錦鐘主席女兒，大家水平參差，問題難免多， Daisy笑話：「我無方向感，左邊定右邊？ Mira（葉梁美蘭）因為之前揸車受過傷，所以比較緊啲，大家有大家不同問題。」為了慳錢， Daisy都是著舊戲服，「你知啲舞蹈員幾瘦，你要塞入去嗰件衫，要自如跳得到，我都減咗幾磅。大家一齊 share減肥餐單，關係好密切好開心。」挾着賭王女之名工作，效果如何？「人哋介紹你時，人哋容易啲明白，但同時間唔明你點解要咁落力呢？但對我來說是一個體驗，人哋會更 appreciate成件事。」壞處呢？「覺得你係賭王女，又睇你幾硬淨，現在我將佢變做正能量，呢啲可以令我更拼搏。」她說。
最緊要欣賞
其實早在廿三年前， Daisy已和香港芭蕾舞團結緣。「剛在外國讀完書回來， Pansy（家姐何超瓊）是當時籌款晚會的主席，我又未返工，佢話不如幫吓手，我覺得幾好玩，落手落腳做場刊，學識點樣編排，攞菲林究竟要點樣？對做其他公職或印刷上教咗我好多嘢。」○七年， Daisy又搞 Ballet ball，翌年更加入做董事局成員。「 Pansy見我做得幾開心，代咗 Pansy個位。」
說起芭蕾舞，何超鳳五歲時學了一年，更在香港大會堂表演過一次，「記得先生教你點樣黏一黏蛋糕要黏得靚，啲腳要點樣好輕盈地走去，最記得係這一段。」後來因為應付功課沒學。 Daisy倒認為在香港發展芭蕾舞比較難，「香港人及自己做家長，都着重子女讀書方面，好似我兩個女跳咗三、四年，到功課開始好忙，不可以做咁多課外活動，要開始揀。」有無後悔放棄跳芭蕾舞？「唔會，好似個女雖然停咗，但每次香港有芭蕾舞表演，佢都睇，啟發我去諗，唔需要一定自己跳，最緊要你繼續有興趣去欣賞。」
而聖誕節父親和他們一齊看《胡桃夾子》，每次她都另有一番感受。「每次都睇到唔同嘅嘢，睇唔同芭蕾舞團表演也有不同感受，在外國讀書時，都睇其他芭蕾舞團，如俄羅斯或美國芭蕾舞團。」
上月，何超鳳（中）跳肯肯舞和 Polonaise籌款，令她體會更多，「做舞蹈員真係不是簡單的事，要保持住好輕盈，但輕盈得來消耗量好大，等於一個運動員。」
愛運動的她亦曾出席保齡球慈善賽。（《蘋果日報》圖片）
想做老師
天生好動的 Daisy，自言對跑步、游水和投球有興趣，「由細做到中學畢業，有加入校隊。」即使兄弟姊妹要學鋼琴，她和妹妹超儀學得最少。「 Pansy彈到四級，我同超儀喜歡郁來郁去。」其母藍瓊纓反對她太活躍，「因為跑步好多時也會受傷，最嚴重是韌帶撕裂，用枴杖用咗一星期。」
持有南加州大學學士學位及加拿大多倫多大學工商管理碩士學位的她，原來想過教書，但賭王一早知她不適合。「到讀完大學都想做老師， Daddy話我好似無呢個威嚴，佢話教小學、中學，一班四十幾人你控制唔到；去教大學，你個樣同佢哋差不多，佢哋都不會尊重你，你放棄吧。」後來她先在銀行工作，九四年加入信德。 Daisy大讚父親勤力、有魄力和有記性，「跟佢做嘢自己也要有一定勤力和魄力，佢好好記性，一分鐘都唔可以諗佢可能唔記得我無做。」
以賭王有四房來說，他又幾好魄力，難怪 Daisy話：「都尊重嘅。當然成長過程、心態和一般人有啲不同，都明白尊重佢有佢私人空間，只要佢平衡到屋企各方面。」
Daisy和丈夫何志堅偶然帶女兒出席活動，「當然想女兒見識多啲。」
留言列表
