同你吟一吟
告別蘇杏璇
一直受糖尿病困擾嘅前輩級藝人璇姐蘇杏璇，六月十二日因中風引發併發症逝世，終年六十四歲。
星期日璇姐老公响世界殯儀館景仰堂幫太太設靈，喪禮採用佛教儀式進行，仲請咗十二位法師响靈堂誦經。唔少同璇姐生前合作過嘅藝人，都有去靈堂向佢作最後道別，包括鮑起靜、關菊英、羅蘭等，而同璇姐相識多年嘅黃淑儀，拜祭完之後更哭成淚人：「我冇諗到佢走得咁快，以為佢切咗腳趾會好番。」
翌日早上璇姐遺體移送到鑽石山火葬場火化，骨灰將安放於清水灣大澳門湛山寺，長埋靜土。
璇姐靈堂布置簡約，現場更有捐款箱，希望前來拜祭嘅友好，將打算用嚟買花牌嘅錢捐出，响柬埔寨興建蘇杏璇紀念學校。
璇姐丈夫表示，太太生前最緊張間齋鋪，完成所有身後事，璇姐仔仔將接管鋪頭生意，延續母親宣揚素食、弘揚佛法遺願。
全站熱搜
留言列表
