探熱針
狠撇吳雨霏 余文樂：我個心仲有個人
余文樂與吳雨霏（ Kary）自公開拍拖以來，多次高調晒恩愛，可惜行埋短短九個月，兩人原來在五月中已經分手。外傳「樂霏戀」死因是 Kary對樂仔逼得太緊，但據知向來花心兼要面的樂仔，拍拖期間對女友唔專一，又難抵被身邊好友笑自己「愈食愈差」，最後以「我個心仲有個人」做藉口，而向 Kary提出分手。
主動提出分手的余文樂（前左一），週一夥同橫洲工業，在修頓球場比賽，不在狀態的他，最後更被換出。
今年情人節才在赤柱拍拖斷正的樂仔和 Kary，相戀不足一年，女方於六月三十日發出分手聲明，「這一年來是緣分令我們從朋友變成情侶，因彼此了解而和平分手。現在我和阿樂仍是好朋友關係，我們仍關心對方，亦有共識一起去面對，希望大家可以給我們空間，可以輕鬆地繼續投入工作。」
外傳分手的導火線因為 Kary太癡身，逼得樂仔太緊，但據知，兩人拍拖以來並不時常見面，「兩個啱啱撻着嗰陣，樂仔已經叫 Kary唔好亂同人講，話就話唔想影響女仔嘅事業，實情係樂仔想拍散拖，唔想孭咁大責任， Kary聽晒佢話，身邊班朋友都冇見過樂仔，反而好多時係 Kary會陪男友見朋友，不過次次成班人同枱食飯， Kary都搭唔到嘴，樂仔班朋友又口臭，成日笑佢點解愈食愈差，揀女揀個身唔理個樣，樂仔見班 friend唔喜歡 Kary，之後都冇叫佢出嚟，如果唔係上次去旅行斷正，樂仔係唔會公開戀情！佢哋初初拍拖嗰幾個月見得好密，會孖住去旅行，之後咪又打回原形，成日話好忙，寧願同朋友食飯篤波，其實 Kary鬼妹仔性格，唔係黐身嗰類型，最多都係電話同短訊。」知情人士說。
失戀玩失蹤
今年年初 Kary開個唱，余文樂以男友身份到後台探班， Kary忍唔住露出一副冧樣。
六月九日生日的 Kary，只有幾位從小玩到大的朋友為她慶祝，樂仔未有陪伴，原來，當時兩人已經分手，「佢兩個四月已經醞釀分手，冷戰咗幾個禮拜，樂仔就提出分手，佢話自己心裡面仲有個人喺度喎，原本 Kary以為可以挽救到，不過，聽到佢個分手理由後，對佢好失望，唯有接受事實。分手之後，樂仔心情完全無嘢，仲叫朋友約班 model出嚟一齊食飯，反而 Kary就無晒心機，早排仲玩失蹤，只係知道佢之前過生日，好彩有幾個由細玩到大嘅朋友响佢身邊。」兩人的身邊友人透露。
Kary六月九日生日，因已經甩拖，只有好友曾昭怡等陪住慶祝，放在微博的相亦見她強顏歡笑。
被踢爆拍拖後，二人又被發現同遊歐洲，回港當日機場更有大批傳媒守候，不過 Kary全程交由男友回應，冇出過聲。
本週一（七月一日），公開分手後首度現身的樂仔為籃球隊出戰，球賽結束後，有備而來的他心情輕鬆，並表示雖與 Kary分手，但仍有聯絡，更出言力撐舊愛：「我唯一想講嘅，唔係報導所講嘅嘢，咩嘢黐身、嗌交，咁對佢唔公平。（唔夾？）係喇，所有嘢我最清楚，冇人比我更清楚，唔想外界覺得佢有問題，想保護番佢，澄清番件事。」主動提出分手的樂仔高調做好人，被飛的 Kary則繼續玩失蹤，對於一切提問，只透過短訊回覆：「對不起，暫時要講的聲明也講了，我很好，多謝關心。」
多心
余文樂出道以來，公開承認的女朋友並不多，但分手原因往往同樂仔花心偷食有關。
盧巧音
余文樂出道未幾，即撻着比自己年長七年的盧巧音，不過有指他到台灣發展拍偶像劇時，背住女友偷食台灣藝人楊丞琳， 02年，傷盡心的盧巧音以《好心分手》一曲唱衰樂仔。
黃伊汶
08年，跟拍拖五年的黃伊汶分手，有指樂仔在日本旅遊時攬女，被黃的友人撞破，女方於是提出分手。
王璐瑤
12年，爆出用情慾短訊喪溝𡃁模王璐瑤，同時間又被發現跟另一𡃁模 Ceci半夜拖手，雖然余文樂事後否認，但王璐瑤堅稱樂仔以短訊氹她上屋企。
撰文、攝影：娛樂組
留言列表
