七月中試班，但緊張的龍小菌上週就去補習社視察環境，站在教台上，她回復教師風範。
探熱針
做補習天后 龍小菌天價開班
去年戴住騎呢面罩出道的龍小菌，只賺得虛名，唱片唔賣，騷 job少之又少。蒙面難出頭，更因此玩出火焗到肺炎。直至上月決定向現實低頭，揭開神秘面罩，以翻版苟芸慧索樣開拓財路。除有美容廣告、出版商向她招手，補習社更重金禮聘她做補習天后。
呢鋪唔衰得，龍小菌嚴陣以待，花一個月時間備課，仲提早回校試咪。以星級學費收生，傳授自身經歷，如何由 D級成績，三級跳蛻變攞 A。
星級學費
做全職歌手搵唔到食，識計數的龍小菌選擇重執教鞭，藉着名氣一躍升呢做補習天后，據知，龍小菌在英皇教育的待遇明顯高人一等，主力補中文的她四堂課收$620學費，比起其他補習老師，最平收$190，最貴收$540學費相比，未見補習功力的龍小菌，先以天后價錢上陣。
據知，原來在中學時期，龍小菌也在英皇教育補習，今個暑假回「母校」開班，龍小菌心情分外緊張，上週六（六月廿九日）便提早到九龍灣分校視察環境兼試咪。當日由龍小菌昔日的補習老師、現在已是英皇教育揸 fit人的岑 Sir親自招待。對於這位星級學生，岑 Sir記憶猶新。「佢好勤力，上堂好肯發問，當時都覺得佢把聲好好聽，不過就冇諗到佢去做歌手。除咗佢，阿 G.E.M.都係我嘅學生。」
做補習老師要自度筆記課程，龍小菌話會以自身經歷，傳授俾學生。
「我唔鍾意死背書，但第一次會考時，試題係着重常規答案，結果中文攞 D。但我冇放棄，決定自修重考，適逢第二年中文課程方向改變，着重創意思考，開正我嗰瓣，重考中文攞 A。所以我嘅口號係『真誠教學，嶄新演繹。』我會攞我以前作文作品，做筆記教材之一。」
曾是英皇教育的補習學生，龍小菌回歸以天價開班，獲昔日教她，現是揸 fit人的岑 Sir親自迎接。
去年蒙面唱歌的龍小菌獲唱片公司老闆吳君祥同江美儀開派對宣布她加盟旗下。早前雙方完約，脫罩的小菌才開始彈起。
身份證改名
對於自己比一般補習老師收費高一截，龍小菌坦言有壓力。「第一，學費唔係我定，第二都預咗學生初期係會抱住好奇心態搵我補習，但我係用心教，之前花咗成個月時間備課，我相信到時佢哋會知我唔係玩玩吓。教完暑期班會繼續教常規班，一星期教兩日，每日走兩間分校，教足五個鐘。教書係我抱負理想，所以就算做咗歌手都唔想放棄執教鞭。因為時間上返唔到傳統學校，所以咪做兼職補習老師。」
原名蔡小茵的龍小菌，原來連身份證都改埋名。「我喺單親家庭長大，細個已經好想改名跟媽咪姓，依家覺得龍小菌係我一生轉捩點，有代表性，所以決定身份證改埋呢個名，媽咪都唔反對。」
加入補習社即如天后級看待的她，以除罩及搶鏡黃裙影晒冷宣傳相。
由龍小菌自定的教學方法未知成效，但就憑明星效應令她可收$620的天價學費。
除做補習天后，脫罩後的龍小菌還將出自傳及接拍美容廣告，得綠魔 Karl幫她做 image，賣索樣即刻財源滾滾。
以歌諷刺時弊的小菌，日前出席 7.1遊行，還在台上率群眾大叫梁振英下台。
蛻變路
留言列表
