謝天華貓到十字步，要由醉得嚟尚算清醒嘅洪天明，以及樂易玲老公陳君毅，做左右護法夾住佢走，肥苟就叫洪天明搭實佢膊頭，幫手引路。
同你吟一吟
樂易玲生日 謝天華醉攬肥苟
因為大前年廉署向無綫高層展開調查，搞到年年生日，收禮物收到手軟嘅無綫製作資源部總監樂易玲，唔敢大搞壽宴，家陣風聲冇咁緊，壽星女老公上個禮拜三晚（六月二十六日）响中環 ifc包下酒吧，幫老婆大肆慶祝。
同肥苟咬兩句耳仔，謝天華已經有所動作想攬佢埋身，肥苟一手護胸，一手捉實洪天明示意救命。
當晚群星到慶，陣容勁過台慶，包括已經離巢嘅佘詩曼、三哥三嫂、謝天華、吳卓羲、苟芸慧等，就連响清遠拍緊《巾幗梟雄 3》嘅胡杏兒都趕返嚟香港，同樂小姐賀壽。
生日派對，美酒唔少得，一早到場嘅謝天華，未散席已經貓到眼都擘唔大，影大合照更攬實洪天明老婆周家蔚，轉過頭同肥苟咬耳仔，居然想將對方攬埋身，好在肥苟醒目用手擋實心口，洪天明就企响旁邊拉開謝天華。
醉到不似人形，仲有大俠徐少強。當晚飲到面紅紅嘅樂小姐親自送佢出門口，徐大俠忽然攬實壽星女面貼面，仲發酒瘟大大聲叫樂小姐收留佢仔仔徐偉棟响無綫。徐大俠酒醉三分醒，識得幫仔仔搭路，至於樂易玲等二朝瞓醒仲記唔記得有件咁嘅事，難講！
樂易玲話叫咗班星嚟玩唔使買禮物，不過湯盈盈、 Toby同已經唔係無綫人嘅阿佘，照樣一人一袋拜見壽星。
全站熱搜
留言列表
