同你吟一吟
霍震霆鋪王有惑
盛傳霍啟剛同郭晶晶嘅愛情結晶將會响八月出世，仲要一索得男，最開心當然係準爺爺霍震霆。話晒佗住霍家第四代掌門人，霍家好識做，响家族基金撥出二億，喺沙宣道買咗間獨立屋俾佢哋一家三口，等 BB出世之後，可以住得舒服啲。
家有喜事，應使得使，不過早排就有地產代理唔知定，居然撩霍老爺買天價地鋪收租。
當日霍震霆一支公企响時代廣場候車上落區，等司機嚟接佢，企响附近嘅地產代理，見到家族有百億資產嘅霍老爺，於是主動埋去力 sell位於銅鑼灣波斯富街、現為周大福珠寶嘅千七呎鋪王，作價 7億，每個月可以收 128萬租，回報有兩厘二咁多。
7億，對霍家嚟講當然係濕濕碎，但對於每個月只能夠响家族基金入面攞得五萬蚊零用嘅霍震霆，根本有心冇力，見地產死纏爛打，霍老爺雖然左閃右避，又扮講電話，不過都會「射喱眼」𥄫住鋪王份資料，買唔到，八吓都冇壞啫！
經紀路過見到霍震霆，硬銷波斯富街 7億鋪王，霍老爺忍唔住八卦望份地產資料。
八卦完，霍老爺扮講電話行埋一二邊，點知經紀死唔願走，仲响公事包再攞資料出嚟，霍老爺雙眼開始唔耐煩。
位於波斯富街鋪王，面積達一千七百呎，現以每月 128萬租俾周大福。
全站熱搜
留言列表
