社交圈
同場較量
人比人，比死人，但娛樂圈勝在有比較，落差大先夠八婆、夠吸引，有相為證。
高䠷 vs肥矮
上週五， ball后薛芷倫穿一身金色超低胸裙，出席馬德鐘和太太張筱蘭的瓷婚晚宴，同場遇到薛家燕，正所謂同姓三分親，她即主動要合照， Fanny說：「好難得遇到又係姓薛。」唔企埋猶自可，一拍埋就呵呵呵！高矮就話天生啫，但肥同瘦就真係靠各自修行。
艷肥 vs清瘦
上週五東華晚宴，身為主席的賭王三太陳婉珍帶埋兒子猷啟（中）出席，她與主禮嘉賓林鄭月娥都穿旗袍來貼題，一個濃妝艷抹，一個淡描蛾眉，拼埋一齊真正環肥燕瘦。但三太的身形遠不及她兩個女超雲和超蓮的愛情生活吸引，「我係睇報紙先知，對超雲復合 no comment，吳克群做女婿？嘩，你哋快唔快啲？」
甩難 vs不捨
同樣剛甩拖的余文樂及謝婷婷，上週四齊擔任寶馬車展嘉賓。當晚余文樂還未公布已跟吳雨霏分手，全程談笑風生，更好戲地笑答關於拍拖問題，「唔好車震，好傷避震。」反觀謝婷婷提起四年情的安志杰時愁眉苦臉，「我仲愛佢，有時諗起都會喊，唔係話放低就放低。」
禮前 vs禮後
田北辰上週六又嫁女！大女田植恩同做社企的教友謝惠敏拉埋天窗，有了上月嫁三女經驗，田二少一早到聖約翰座堂打點，「個女俾我困喺葵涌（公司）十二年，冇機會識男仔，呢個都係喺教會識。」當日天氣熱到無風，連教堂內六百多位賓客均汗流浹背，禮成後新郎哥熱到不停抹汗，新娘子連頭髮都走晒樣，都幾狼狽。
大膽 vs驚青
澳門威尼斯人舉行恐龍展，歐陽妙芝話八歲的大仔方玉丞是恐龍迷，所以上週六專登帶他與細佬玉亨來看。大仔一入場興奮到要跟每隻恐龍合照，但五歲細仔聽到恐龍叫聲便驚驚，雙手掩耳攬實菲傭（圓圖）。兩個仔性格迥異又常鬥嘴，日日激到妙芝噴血，「我以前好斯文，依家係潑婦罵街。」
童真 vs老積
一向招積的呂良偉兒子呂善揚由媽媽楊小娟陪入場，十歲人仔天不怕地不怕，話之身邊的李樂詩（左）三歲半大仔 Maxton郁唔停，佢就老氣橫秋似葉問上身，落到台又老練地話：「我放暑假會去美國同澳洲，阿媽，你同我做住訪問先。」然後不理小娟就自己入場。
留言列表
