So Comment

Last Call燒肉油豬腸粉　七十一肥仔腸粉魚蛋

快！快！快！！！
快乜得㗎？快啲去元朗食七十一肥仔腸粉囉！點解？肥仔佢兩公婆，半世人就係對住啲腸粉，由街邊剪腸粉剪到入鋪仔。鋪租又要加了，於是決定剪埋呢個零月，到 7月中 8月就退休，䟴䟴腳了！

元朗人真係唔使瞓……夜遊人天堂！

如果我後生時，我諗晚晚入元朗，後生時真係冇日冇夜！晚晚四圍蒲，蒲完 happy hour去食飯，食完飯一係 disco、一係劈酒，一間打烊又去第二間，玩到冇嘢玩，喺九龍就去美麗華酒店樓下 24小時 coffee shop，不過非常唔鍾意，因為好雜！喺香港就一定係去 Hilton eat street食啫啫雞煲飯！坐得又舒服，人又斯文。總言之，唔玩到「雀仔叫」都唔返屋企。哈，好多時打麻雀，打幾多圈呀？打到「雀仔叫」啦，都費事講幾多圈！
而家元朗真係可以話夜遊人天堂。香港、九龍都已經好難搵啲 24小時開嘅鋪頭，來來去去都係翠華，冇趣。但入到元朗，真係乜都有，三、四點仍有雞煲、酒吧、潮州打冷……燈火通明！真開心！由中環去 40分鐘，九龍 30分鐘，一於元朗一夜遊。
七十一肥仔並非由七點開到十一點，亦非「 7-11」咁開 24小時，乃係由下午三點開到凌晨三點，上半由肥「佬」看檔，下半由老婆看檔，我鍾意老婆畀的汁醬多啲。

腸粉

而家已好少地方自己做腸粉，大多批發返來。好彩肥仔都識貨，搵一間叫潘記的供貨，腸粉好滑，少少煙韌。
腸粉事小，汁醬事大，全部醬料係肥佬老婆自己調的。非常聰明，麻醬好稀，豉油唔鹹，芝麻好香（我不落甜醬和辣醬的）。咁點解我話佢聰明呢？因為其他麻醬多數很杰，只能在腸粉面鋪住。但係肥仔啲麻醬稀到可以同豉油撈埋一齊，咁你一定要將腸粉自己撈一大輪，真係一大輪，等豉油同麻醬都在腸粉上了顏色，再 make sure腸粉卷中亦有汁，咁你食落去就內、外、中都有香香的麻醬和豉油。
不過，最精彩都未講！我從來都未食過腸粉係咁味的——有少少煙燻味的，但又好 subtle，好鬼佬 feel，一啲都唔似食緊廣東腸粉，究竟係乜味呢？肥仔老婆好驕傲地細細聲話：「包你估唔到！係燒肉啲油！」嘩！真厲害，好香好正！真係一世都食唔到咁正嘅香味！一間連位都冇，大家都拎住隻碟喺十字街頭企喺度食的腸粉，竟然係天下美食。每次入元朗，就算飽到嘔都要去鏟碟腸粉，大家仲唔去，就一世都冇得食了。所以快！快快！唔係走寶！
「再一次證明所有好食嘅嘢，都係冇益的」！！