笑談反彈周一（ 17日），楊思琦笑住回應谷底反彈，見她心情開朗，唔使再擔心冇 job冇收入，不過人就愈來愈瘦。思琦妹搏命搵錢之餘，都要注意健康呀！
娛聞樂
出雪櫃狂𢱑銀 楊思琦：唔介意母女檔接 job
楊思琦自去年在美國未婚誕下女兒楊卓穎（ Krystal）後，經過年多辛苦經營的單親媽媽形象才開始為人接受。上月首次演出舞台劇《山水又相逢》，逢周日亦有份主持《 May姐有請》，同時更密密到國內登台搵人仔。
無綫缺花旦，思琦終於解凍。據知楊思琦近月回歸劇組，下半年會連拍兩套劇，就連周一（ 17日）獎門人曾志偉都邀她上《獎門人終極篇》玩遊戲。為收復失地，楊思琦要開 turbo，仲放風話唔介意母女檔接 job㖭！
過往無綫每逢旗下藝人有負面新聞，都會放入雪櫃過冷河。楊思琦去年狠撇「空心老倌」吳帥後亦難逃一雪，事業與形象都陷入谷底。但她每月要應付供樓及家庭生活費近 18萬的開支，惟有頻返內地登台搵人仔。
出力玩 
雖然做咗媽媽，但楊思琦上《獎門人》一樣好投入，玩遊戲時出盡力。其實上得呢類遊戲節目嘅嘉賓都有一定嘅人氣，思琦當然想長做長有啦！
慳錢唔請工人
經過一年的苦心經營，楊思琦的好媽媽形象開始入屋，今年初她變得活躍，登台、商演兼做纖體代言人，經濟壓力得以紓緩，但慳妹性格始終如一。知情者透露：「思琦見報多咗，收入亦開始穩定番，但佢都唔敢請工人，囡囡交由媽咪湊，慳得就慳啦！佢話有錢寧願儲起，第時俾囡囡讀書用。佢呢排開心咗好多，至於抑鬱症，睇咗成年醫生，依家都好番啦！」
身為全職單親媽媽的楊思琦，周一（ 17日）為《獎門人終極篇》錄影時，向本刊記者表示只要不用開工，會親自照顧囡囡，「工人唔請住喇！聽過好多朋友講請工人湊 BB，好多都係啲唔好嘅經驗，我真係唔放心將囡囡交俾個工人湊囉！」好彩楊思琦有個好媽媽幫手，她才可以安心外出工作。
6月 2日 攜女郊遊單身媽媽唔易做，楊思琦早前唔使開工，即揸車帶女去西貢西沙郊遊。思琦媽抱住熟睡的孫女 Krystal，思琦負責收好 BB車，冇男人冇工人，一樣咁溫馨。 
囡囡今年 2月一歲生日，楊思琦為她舉行了一個小型生日會。 BB期的 Krystal被指似足爸爸吳帥，現在反而愈大愈似媽媽。
搶手花旦
楊思琦多年來都是「現代美容」的代言人，去年產女後形象大跌，廣告商仍對她不離不棄。今年她更續約留任，一年拍兩輯廣告，仲可以收起 33C，以健康媽媽形象示人㖭！
眼見楊思琦單親媽媽形象為人接受，無綫年初亦找她主持飲食節目《 May姐有請》，節目一直拍到 8月中。楊思琦近日更回歸劇組，為《廉政公署 2013》（暫名）開工，還有監製找她拍一套 30集的時裝劇。
有劇組人員爆料，「公司花旦數埋都係得嗰幾個，青黃不接情況好嚴重。思琦妹呢類肯搏肯捱嘅真係唔多，俾咩角色佢都接。」
對於再次被重用，楊思琦顯得非常高興：「好多謝 TVB俾咗咁多機會我，係有監製搵過我，上星期亦啱啱試咗造型，知道會拍一個單元劇。無論拍幾多集，我都會做到最好㗎！」
除了拍劇，無綫更不斷為楊思琦接外面的工作。與她合作多年的纖體公司，上月不單止續約一年，還拍下新一輯纖體廣告，穩袋八十萬酬勞。
囡囡卓穎（ Krystal）轉眼已一歲多，楊思琦甚少帶同 Krystal出席公開場合，唯一一次是為慈善活動拍攝月曆。眼見圈中不少母女檔上陣𢱑銀，楊思琦亦坦言唔介意：「 Krystal依家識叫『媽媽』同『婆婆』，大個咗好多喇！雖然已經有奶粉贊助，但都想 Krystal之後生活得再好啲，我絕對唔介意同囡囡母女檔上陣㗎！」楊思琦為賺錢連囡囡都出賣，睇嚟除了女兒排第一外，搵錢應該排第二。
搏命搵奶粉錢
楊思琦經濟負擔沉重，既是單親媽媽又要供三層樓，唔努力搵錢點得？今年事業人氣都谷底反彈，思琦當然唔會錯過任何機會。今年的工作已排得密麻麻，但她希望工作以外能抽多點時間陪囡囡，做個家庭工作兩兼顧的好媽媽。
留言列表
