亞熱帶
福山雅治 教壞細路
近排 TVB周日深夜重播
《神探伽俐略》第一輯，搞到不少師奶要
捱夜睇「神探」福山雅治。近日福山雅治 hit爆，除了《神探伽俐略》第二輯及其電影版在日本同步上映，佢更憑電影《然後變成爸爸》首次在康城影展行紅地氈。福山雅治外表正經，其實獵女無數，把口仲唔收，他曾在電台節目公開說：「我試過搭飛機時自慰！」真係教壞細路！
外表斯文的福山雅治，飾演《神探伽俐略》時就一本正經，不過他在電台主持節目時，一向語不驚人誓不休：「我試過搭飛機時自慰！」、「我係自慰之神嘅仔！」、「我下半身太瘦，搞到我『細佬』都冇乜睇頭！」 44歲人，仍然冇厘正經！
不過，講到溝女，永遠都係靚仔大晒，雖然福山雅治自稱是「小小鳥」，但他一直食女無數。多年以來，福山雅治獵女範圍廣泛，女友包括偶像派（內田有紀、木村佳乃）、成熟型（瀨戶朝香、常盤貴子）、水着女（吹石一惠、小西真奈美）及體育主播（白石美帆、竹內由惠）。而其中竹內由惠更傳出與福山最近好事近。畢業於名校應慶大學的竹內由惠，入行前已經係校花，佢醒目在識得行奶奶政策，成功取悅福山阿媽。
再做伽俐略
《神探伽俐略》第一季女主角係柴崎幸，第二季就換咗吉高由里子（右）。雖然佢得 24歲，後生過柴崎幸 7年，不過樣貌同名氣就輸晒。第二季於 7月 6日喺 TVB有得播，邊個好啲到時分曉。
電影版《神探伽俐略 2：真夏方程式》 6月 29日香港、日本同步上映，福山 26日起更訪港三日。電影講福山去到沒落小鎮，在查案之餘仲遇上一名麻煩細路。
專食嫩口
早年福山揀女都係睇樣貌，後來年紀大見識廣，就鍾意出名身材好的小西真奈美及吹石一惠。不過最近一年他又轉口味，轉攻斯文可愛型的女主播竹內由惠，唯一相同的，就是女友都細佢至少十年。
吹石一惠●細 13年
31歲的吹石一惠，去年曾被拍到上福山屋企過夜，不過福山死口唔認拍拖。兩人一度談婚論嫁，但因為福山要女方婚後退出娛圈，吹石唔肯而分手。
小西真奈美●細 10年
小西真奈美雖然賣性感，不過佢出道時都攞過日本奧斯卡最佳女新人。佢同福山相戀五年，奈何準奶奶嫌棄，兩人於 11年分手。
竹內由惠●細 17年
福山雅治去年做奧運節目嘉賓，認識 27歲的竹內由惠。竹內由惠係日本音樂節目《 Music Station》主持， J2都有得睇，大家不妨為福山幫幫眼。
做「父親」即攞獎
除了溝女叻，福山雅治唱歌都好巴閉。他是日本史上男歌手單曲總銷量及專輯總銷量冠軍，累積唱片銷量超過 2,127萬隻。有強大人氣支持，難怪他廣告價企硬 500萬港元，和木村同 grade。他的最新啤酒廣告更由吳宇森執導，認真巴閉。不過，這位型男近年面對脫髮危機，為保靚仔形象，他亦急急投資逾百萬港元植髮。都啱嘅，搞到神探伽俐略甩毛就唔好啦！
在《神探伽俐略》第二季，福山飾演的湯川學仍然是主角，不過女主角就由柴崎幸改為奀星吉高由里子。至於福山在新片《然後變成爸爸》就飾演一名爸爸，故事講述他在兒子 6歲時才知道原來當年醫院搞錯，令他錯養別人兒子，他要在親情及血緣之間作出選擇。
福山另一新作《然後變成爸爸》勇奪今屆康城評審團大獎，福山有望打入國際。 
雖然口不擇言，不過福山在日本是「入屋」男星，好似《多啦 A夢》都有將佢動畫化，佢仲係靜香偶像㖭。 
撰文：阮英維
留言列表
