張耀揚撇傑仔 偷笑會潮男
張耀揚與同性密友蔡一傑多年來關係親密，有指兩男6年多來情比金堅，不過前日張耀揚卻撇下傑仔，反而與一名貌似陳國邦的大隻潮男雙雙前往中環置裝。期間，張耀揚見記者在場表現淡定，潮男更忍不住掩口偷笑，二人還大方任影，未知傑仔會否打爛醋埕？
49歲的張耀揚與蔡一傑相識多年，友情升呢，雖然曾傳出二人情海翻波，但傑仔早前出席活動時直認對方是好朋友，可見二人關係恩愛如昔。
姣爆襯衣唔啱key
不過，前日張耀揚卻撇下傑仔，相約一名貌似陳國邦、與傑仔同屬潮男一族的大隻男往中環行街。當日傍晚約6時，西裝上陣的張耀揚拿着手提袋，與大隻潮男於該處商場行逛，二人邊行邊傾，之後更雙雙步入附近一間大眾化時裝店揀選新裝。兩男甫入店後即專攻$399的T恤，潮男不時向張耀揚推介多款姣爆的花花襯衣，但他似乎興趣不大，轉揀淨色系列，潮男亦全程陪伴左右給予意見。
張耀揚與潮男在時裝店內見記者影相即笑不攏嘴。
二人懶理記者，繼續「蜜蜜斟」揀選新裝。
淡淡定任影唔嬲
正當張耀揚與潮男「蜜斟」時竟發現有記者在場，他們初時表現愕然，未幾張耀揚已一臉淡定笑笑口任影，身旁的潮男見狀亦忍不住掩口偷笑，其後二人繼續揀選新裝，但最後不合心水，兩手空空的張耀揚先行步出，潮男即緊隨其後，雙雙繼續往逛街。
文、攝：追蹤組
張耀揚孖開胸壯男濕平 
■張耀揚發現被影相後，即同壯男冇癮離開。
【中環ifc】現年49歲嘅張耀揚，自從06年被傳喺健身室識咗性向成疑嘅蔡一傑後，兩男驚爆斷背情，不過佢哋唔多介意。張耀揚前日一身西裝look現身中環ifc，而跟住佢身後嘅大隻仔，竟然唔係傑仔，換咗另一位chok男。
見記者速逃
前日下晝4點幾，張耀揚拎住個公事包，急步入咗商場內嘅Zara，尾隨有一名年約30幾歲、身形高䠷嘅短髮男子，上身恤衫仲係半開胸，加副太陽鏡箍頭，步法好似行catwalk，chok到惹人注目。
佢哋喺男裝貨架度係咁睇，不時有傾有講，唔知chok男講咗乜，冧到張耀揚係咁笑，笑到哨牙都出埋嚟。不過當佢哋發現有記者影相，張耀揚立即冇心機買嘢走人，chok男就刻意同佢保持距離，有啲此地無銀感覺。
■張耀揚前日撇甩同性密友蔡一傑，同一名年約30歲嘅壯男行商場。 
■只見壯男甚得張耀揚歡心，搞到張耀揚笑到露出哨牙。 
■有傳蔡一傑（左）同張耀揚斷背六年，佢哋仲不時孖住出席公開場合。
資料圖片
張耀揚舊年曾被傳同傑仔秘交六年，有指佢哋成日互訪對方屋企，佢哋舊年又前後腳去李璨琛婚宴，離開時因俾記者撞破，被迫冇癮分頭走。
傑仔其後大方承認大家係好朋友，仲自爆識咗27年。咁佢哋一定好多共同朋友，唔知張耀揚身邊呢個男性好友，又有冇介紹畀傑仔識？
採訪、攝影：彭琮然
留言列表
