殿糖級大圍店的形象及定位跟舊鋪相近， Xavier（右）和 Jackal（左）指﹕「我哋嘅定價較大眾化，所以絕對唔似舊鋪。」

壹盤生意

加盟店火併五代同糖

新派糖水店「五代同糖」是近年本地冒起得最快的甜品店。○九年開業，一○年接受《壹盤生意》訪問時，只有兩間分店，之後推出特許經營，分店數目迅速擴展至十四間。但很快，加盟店陸續「出事」。其中，大圍分店斬纜，易名為「殿糖級」，生意即谷底反彈，新老闆劉健強（ Xavier）力斥「五代同糖」「幫唔到」加盟商；而上水舊墟分店，甚至要分租兼賣小食，老闆 Johnny坦承「打錯算盤」。
經過一輪淘汰，「五代同糖」只剩下六間分店。本刊找來老闆之一的 Antony，回應各方指責。這個故事提醒各位創業初哥，如以為加盟大品牌就可以穩賺，絕對是大錯特錯。

今年三月，位於大圍積信街的五代同糖分店，突然將招牌換成殿糖級。時間倉卒，店內裝修不變，仍是舊店的招牌紫色梳化及餐椅，就連餐牌上的甜品款式，亦大同小異，包括五代同糖最出名的雞蛋布丁。原來，姓張的舊老闆做唔住，找來擁有兩間分店的殿糖級入股，店鋪則交由新老闆劉健強（ Xavier）和周健雲（ Jackal）打理。訪問期間，張氏離港工作， Xavier透露易名過程：「張生曾經向五代同糖求救，對方嘅回應居然係﹕『我哋都無辦法』。張生最後終止同五代合作，走來搵我哋。」 Jackal補充：「我哋接手大圍店後，頭兩星期營業額至少升咗廿五個百分點。」
大圍分店易名自救，但上水兩間加盟店的老闆 Johnny，雖然「賺得少」，仍決定「死守」。原來他正職做貿易生意，糖水店只是副業。
對於一眾加盟店的情況，五代同糖負責人 Antony承認部分加盟店經營不善，並逐一駁斥各方言論，指加盟店老闆亦要負上責任。

對於先後有加盟店易名或自立門戶，五代同糖的負責人 Antony表示沒有感到難受﹕「呢個係商業社會，佢哋覺得有能力立足嘅絕對無問題，有競爭即係仲有生存空間。」 

上水舊墟的五代同糖加盟店將門口租給小食檔，連招牌也被遮掩，店主 Johnny坦言沒有得到母公司同意。 

殿糖級出售的雞蛋布丁賣相與五代同糖如出一轍，售$36，但 Xavier指該甜品是他們從台灣學來的，並非抄襲。 

Johnny﹕上水五代同糖加盟店老闆
Xavier﹕殿糖級老闆
Antony﹕五代同糖老闆

一､揀錯位孤立無援
Xavier﹕「大圍競爭好大，同區有七､八間糖水鋪，呢條街都有三間，而且五代同糖嘅定價太進取，未必區區適應到。位置最重要，揀鋪要睇附近有咩食肆､門口有無位泊車及統計人流。殿糖級旺角分店都係加盟店，仲有四間加盟店想開，但未有心水位置，唔開住。」
Johnny﹕「上水中心分店一開始好好生意，一個月營業額有成三十八萬。但過咗蜜月期後，一路只係收支平衡。對於上水物價嚟講，啲嘢都係貴咗啲。至於位於上水舊墟嗰間分店，最初打算做甜品外賣生意，以為上水咁多自由行，有得做，點知打錯算盤，生意未如理想，惟有朝早租個門口俾人賣小食，幫輕吓租金。」

回應

殿糖級接手後，除了減價，還加入新產品，如榴槤拿破崙，售$48。 

Antony﹕「我哋唔會熟晒各區嘅行情，所以揀鋪時都偏向聽加盟店老闆嘅主意。以上水店為例， Johnny有新主意話做外賣店，佢有信心又說服到我哋，就會俾佢去試，最後效果唔好都無辦法。位置重要，但係老闆都好重要。好多時加盟店老闆都係兼職經營，以為俾嚿錢買個經營權就有錢賺。老闆唔落鋪､唔以身作則，服務質素唔好，生意自然差。所以老闆擺幾多時間落盤生意都係重點！」

二､餐牌食材受限制
Xavier﹕「張生搵我哋合作嘅其中一個原因，係覺得五代同糖工場來貨嘅質素每況愈下。我哋睇過都覺得有改善空間。另外，佢哋為咗控制成本而轉咗食材供應商，張生都有啲不滿，但無辦法。」

回應

綿綿冰是新派甜品店必備的甜品，製作方法大同小異，售$40。 

Antony﹕「係轉咗食材供應商，正常都唔會轉間貴啲嘅。我哋一路都係想搵又平又穩定嘅貨源，以呂宋芒為例，喺同一個季節，唔同品種，價格都有好大差別。着重質素同時我哋都要控制成本，所以轉換供應商唔出奇。」

上水兩間五代同糖加盟店的老闆 Johnny指，開鋪一年半，現在兩間鋪都不賺錢，但做落有感情，三年合約後，仍希望繼續做下去。 

三､宣傳無自由
Johnny﹕「舊墟分店日頭分租出去賣小食，我無問過五代同糖呀。上水中心鋪下午就做緊優惠，凡叫吐司，飲品半價，呢樣就係五代同糖同意嘅。另外，主餐牌唔可以減價，咪集中推銷價錢較平嘅糖水囉。」
Xavier﹕「以前明知大圍接受唔到個價位，但餐牌都要跟足總店，唔可以自己減價。我哋接手之後，部分甜品比之前平一成至一成半，客人反應好好。不過，我哋都唔接受加盟店賣其他嘢。旺角店曾提出賣咖喱魚蛋谷生意，影響品牌形象，梗係唔俾啦。谷生意仲有其他辦法，我哋睇番資料，發現旺角店嘅客人最鍾意食榴槤，於是全線推出榴槤主題甜品系列。旺角店營業額兩日內升咗十幾個百分點，仲好過你去賣咖喱魚蛋啦。」

回應

Antony﹕「我知上水舊墟間鋪賣小食，唔通即刻叫佢執咩，但合約到期後唔會再合作。某啲區嘅客接受唔到五代嘅價位，我哋可以做嘅好有限，會幫佢哋宣傳派傳單，拎住傳單幫襯有九折。其實大圍店試過俾佢做特價，如逢星期一某樣產品九折，但佢哋可能覺得唔夠啦。我哋唔可能容許某一間賣平啲，咁對其他店唔公平。」

洗牌效應

大圍的殿糖級分店，為節省成本，仍保留舊鋪的裝修，但生意較以往暢旺，有食客指新舊店由風格到甜品款式都甚似，但新店較抵食。 

近年，不少糖水店以加盟形式迅速擴張， Antony警告，行業正經歷洗牌期﹕「愈嚟愈多競爭，係時候睇吓邊個有實力留低。我哋曾經有十幾間分店，但因為租貴，依家暫時剩番六間。競爭咁大，我哋都唔知開幾多間先啱，但一定唔係之前咁多。」殿糖級的 Jackal亦同意要限制加盟店規模：「我哋暫時以四至六間為目標，因為想保持水準，要花好多功夫。寧願做好呢四至六間，好過一次過開十幾間，但半年或者一年之後就唔見晒。」

記者放蛇

Antony不肯透露五代同糖的加盟費，記者於是致電該店的加盟熱線，表示想加盟開店。接聽電話的鄭小姐表示，加盟費為三十八萬，並強調：「我哋之前有十幾間分店，但有啲老闆對甜品同盤生意無咩熱誠，搞到經營不善，所以我哋依家嘅要求都會嚴格啲。」她表示，公司要求老闆親自看鋪，或安排親戚等幫忙。另外，已有五代同糖的地區不可再開店。

營業資料（ 04/13，同上）

營業額：$320,000
租金：$80,000
人工^：$65,000
入貨：$130,000
雜費：$10,000
盈利：$35,000
^4個全職、 3個兼職，不包括老闆

開業資料（ 12/11，五代同糖上水中心店）

#連按金租金#：$300,000
裝修：$600,000
入貨：$150,000
雜費：$50,000
特許經營費：$380,000
總數：$1,480,000

一點意見

司徒永富
鴻福堂集團執董，兼任香港樹仁大學工商管理學系行政系主任及副教授。
鴻福堂曾有近八成分店是加盟店，但因為難於管理，鴻福堂已將所有特許經營權收回。司徒永富形容特許經營是「針無兩頭利」，無論對發展品牌或創業來說，都不是好選擇，原因如下：
1.難以統一形象：「加盟店難於管理，容易出現良莠不齊。唔守規則嘅分店會損害品牌形象，其他做得好嘅分店就無辜被拖累。」
2.問責難：「母公司通常設有中央工場，但仍難避免部分食品要在分店做加工，所以食物質素存在變數。如有客人向總店投訴，母公司難以向被投訴嘅加盟店問責。」
3.缺自由度：「加盟店嘅生意未如理想，母公司可以做嘅確實有限，因為每樣新政策都要全線一齊做。九九年，鴻福堂生意好差，有加盟店自己賣燒賣腸粉，其實我哋自己都掙扎緊應唔應該賣，但為咗對其他分店公平，都唔可以俾個別店賣先。」

撰文：黎俊鍵
攝影：關永浩
協力：鄧詠筠、黃秋娥