買家馮女士（中）與香先生（右）本週一踩上長實總部，最終只是對着黃姓職員（左）手邊的錄音機申訴。 

財經脈搏

直踩長實　苦主埋身擊

長實單方面一句「取消交易」，令「劃時代地產投資項目」雍澄軒，極速變成劃時代的爛尾盤。買家不滿長實只連息帶本退款及只賠一萬元，不少強烈要求發展商遵守地產市場慣例：「撻訂賠雙」，甚或賠償一切融資損失。
本週一，記者跟隨買家馮女士及香先生，直踩長實總部，見證長實如何以「人肉錄音機」，繼續狂耍買家。

本週一早上，雍澄軒買家馮女士與香先生，在沒有預約下，直踩長江中心，要求了解雍澄軒取消交易的最新賠償情況。兩人在地下大堂及八樓大本營等了足足半小時，長實一名黃姓職員才現身。一來到，他隨即展示手上的錄音機，按下開關，施施然坐下。
兩名買家還未開始講有何賠償要求，該職員已搶先「人肉播帶」：「為咗更統一，我哋已交晒俾胡關李羅律師行的鄭律師處理，你哋或你哋嘅代表律師，可以打去同鄭律師傾。」
兩名買家申明不想與律師「交手」，因為，「佢哋係專業人士，我哋唔係，邊拗得過佢呀！」該職員只重複「人肉播帶」，並伸伸手指着錄音機示意，所有對答都已錄低。買家香先生遂直接望着錄音機說：「最好叫李老闆出嚟，對住電視講，賠番雙倍訂俾所有買家！咁就唔使傾咁多，博到七百萬人掌聲添呀，希望李老闆聽到我哋的聲音、要求啦！」

二月時長實「劃時代」拆售雍澄軒單位，買家蜂擁而至，逼爆長江中心大堂。（張國慶攝） 

馮女士原本六十萬元人民幣定期，息率達四釐四，但提早取回，十個月只收回約千八元利息。（嚴寶權攝） 

買家：「唔會就咁算！」

雍澄軒拆售時，政府辣招仍未包括非住宅物業在內，如今買家就算接受取消交易，退回的錢再投入物業市場，其使費亦已大增。 

半小時的會面在長實職員不斷重複「搵律師」下完結，其後買家之一馮女士，依照該長實職員所言，先後兩次跟胡關李羅的鄭律師電話對話，馮女士事後氣沖沖向記者大呻：「佢幾寸呀，同我講：『我哋唔會賠㗎，你有證據就叫律師嚟索償啦！』即係耍我哋啦，我啲錢唔等住使㗎，一定唔會就咁算！」
做運輸生意的馮女士，近月被李家玩得團團轉，其本業被 HIT工潮拖累，交收貨櫃已搞到一頭煙，今年二月買下雍澄軒高層單位，更讓她煩足多個月，「最初聽到話買咗就有人打理，永無租霸，諗住收租退休；點知，長實話肯造按揭嗰三間銀行，都唔願意借嘅！」為滿足銀行要求，她先以四萬元的雙倍價錢，要會計師樓加班趕起其公司賬目，但銀行仍以其要供兩部車為由拒借。
為免最終不夠錢完成交易，她把在內地的人民幣定息提早提走，「原本六十萬人仔有四釐四息，提早攞番得一千七百幾蚊息咋！少咗九成，仲有匯率呢，人仔升值呢，分幾次運番香港呢，頻頻撲撲，呢啲數我點同佢計！」最激心是上週一她剛於銀行提早贖回兩架拖頭，以應付銀行借貸要求，「哎！三點五十分俾咗錢，轉過頭四點（長實）就話取消交易。」她拿出銀行存款單證明，贖回入數時間，的確是上週一下午三時五十一分。

損失「潛力」無限

香先生坦言：「雍澄軒抵買，唐樓都要五、六千蚊一呎，所以先會加按兩樓層嚟 full pay。」（嚴寶權攝） 

開跌打館的香生當初搵銀行造按揭亦處處碰壁，最終把自住及收租物業加按，打算「 full pay」雍澄軒單位，本月九號簽下加按合約，「唔知使唔使罰息，筆錢唔用就要俾估價費。總之現在係佢提取消成交，唔退訂加賠訂嘅，我咪堅持成交囉！」
而以六百多萬買下雍澄軒唯一「總統套房」的陳先生，亦強烈要求賠雙倍訂，「買時話個單位連一百六十萬裝修，我諗住收樓後住番幾晚享受吓。又係當初趙國雄話可以自住，電視條片有晒㗎，呢啲係欺詐，刑事嚟㗎！」
做貿易公司的陳老闆原來亦為「好戰」一族，「如果要計損失可以好多，好似長實退番錢俾我，我用來買番一樣價錢嘅物業，印花稅都因政府出招而加倍啦。如果其他買家話要搵消委會搞集體訴訟，搞大聯盟，要夾錢嘅我即刻俾！」據知現時已有不少買家互相聯繫，尋求傳媒、議員、律師等幫忙向長實索償，雍澄軒買家與長實「鬥智鬥力」的第一波已然展開，其他行動將陸續有來。

撰文：鄧淑慧
資料：黃翠蓮