王老吉在內地銷售額高達一百六十億，更一心想將品牌打造成內地可口可樂。（東方 IC圖片） 

壹路向北

王老吉紅罐包裝爭奪戰

唔少香港人去打邊爐、 BBQ嗰陣，都會飲罐王老吉，呢個下火涼茶嘅紅罐幾乎人人認得。不過市面最近有隻又係紅罐黃字，同王老吉有九成似嘅涼茶，叫加多寶。查實王老吉曾經同加多寶爭奪王老吉商標，上週三，兩間公司再就呢個紅色罐包裝鬧上廣東法庭。

行勻香港兩大超市，記者都淨係搵到加多寶，最後喺一間小辦館先買到王老吉，不過老闆話而家多數香港店鋪都只賣加多寶，要買王老吉，第日可能要返大陸先得。 

兩罐嘢由包裝到成分都好似孖生兄弟咁，飲落味道又差唔多，真係好難分。估唔到單嘢原來又係港商同強國人之爭。相傳王老吉係清朝外號阿吉嘅農民王澤邦所創。阿吉好生養，後人四散廣州、香港等地後，各自用王老吉品牌賣涼茶。其中廣州一支嘅王老吉被內地政府沒收入國企，到了九二年更被當局註冊商標，交予廣州藥業所用。
而王老吉嘅第五代香港傳人王健儀，喺九二年拿出王老吉嘅秘方同商標嘅使用權與香港鴻道集團合作，仲決定大展拳腳，响內地設廠，但當時廣藥已經註冊咗王老吉商標。
香港鴻道唯有向廣藥租番個商標嚟用，仲創咗句口號「怕上火就喝王老吉」，令到本來喺大陸銷情麻麻嘅王老吉在內地一炮而紅，好賣過可口可樂。近年王老吉銷售額高達一百六十億，淨係呢個嘜頭已估值一千億！

著紅衫打官司

王老吉第五代傳人王健儀本來有意打入內地市場，點知內地將王老吉品牌「國有化」之餘，而家仲隨時連紅罐都唔俾用。 

瘦田無人耕，耕開當然有人爭，租用權合約喺一○年到期後，廣藥同香港鴻道就馬上開火來一場「王老吉」商標爭奪戰，打足年幾官司，舊年五月香港一方敗訴。而得到王老吉商標嘅廣藥就勁囉，收番王老吉個牌頭之後，得中央政治局常委汪洋欽點要打造成「中國的可口可樂」！
香港鴻道梗係唔忿氣啦，賣開嘅罐裝涼茶被迫改名加多寶，但照用番紅罐黃字包裝，仲喺廣告入面話「全國銷量領先的紅罐涼茶改名加多寶」。今次佢哋喺法庭上各不相讓，互告包裝侵權索償。
為咗強勢打官司，廣藥個副總經理仲特登著住件紅色衫出庭。最搞笑係，廣藥員工趁休庭去附近餐廳食飯，懶威咁大叫：「要王老吉，唔要加多寶。」點知店員話：「沒有王老吉，只有加多寶。」當時有大批記者在場，呢位員工當場以笑遮醜、半開玩笑道：「你再去問吓，無王老吉就唔俾錢！」當然最後店員答案都係無，而呢班忠心嘅員工就決定改叫都係紅色罐嘅——可口可樂喇。

抗日神劇過晒火　中央喊停

扭開大陸電視台，連 CCTV都係播緊抗日劇，不過啲劇情離晒譜，八路軍架衝鋒車仲型過蝙蝠車，而且士兵可以刀槍不入徒手殺死日本仔，即使身中四槍仍然可以揮旗過河。將八路軍搞到咁神化，連中央都頂唔順，《人民日報》上週率先開火，話抗日劇會「誤導國民歷史觀」咁話。國家新聞出版廣電總局也即刻出手，仲話已經對各電視台提出明確要求，重審黃金檔已排期播放嘅抗日劇，過晒火位嘅，隨時要修改或者停播！
呢一批騎呢古怪抗日劇，近期出街嘅代表作包括《抗日奇俠》，經典一幕係八路軍士兵徒手撕開日軍！不過呢套劇來頭唔細，聲稱斥資五千萬，美國後期製作，荷李活式拍攝手法，莫非係學緊美國拍《復仇者聯盟》？個導演原來係香港 TVB前監製劉仕裕，劉嘅代表作有《茶是故鄉濃》、《封神榜》等。
不過唔係個個都頂得順共軍好似哪吒、二郎神咁打不死！世界各地的網民睇到眼都突，紛紛留言：「悲哀，現在的大陸劇集編導還是義和團思想。」仲有人明寸：「這樣的話八年抗戰兩個禮拜就打完了。」

抗日劇其中一幕係有個日軍步兵持槍向共軍進攻，點知呢位共軍仁兄突然葉問上身，兼有神功護體刀槍不入，一拳打瓜日本仔。 

呢套明明係抗日劇《孤島飛鷹》，點知共軍用嗰架衝鋒車成架蝙蝠俠用嘅蝙蝠車咁。 

壹週豪語：「胸罩貴過樓」

插圖︰祝健中 

北京樓價天天高，內地小市民日日抱怨做樓奴。身為北京大地產商之一的華遠地產董事長任志強終於忍唔住反擊房價太高的說法，爆出一句：「胸罩那麼大一點，要好幾百塊錢，按平米（平方公尺）算，比房子貴多了。」引起網友嘩然。
任總上週六出席「商界木蘭」年會，當時連依文集團董事長夏華及當當網董事長俞渝也齊齊抱怨房價太高，稱「一套房把三十四輩子的收入都掏進去了」。任志強反問夏華：「一個房產項目從開發到最終完成要好幾年，你做一套衣服用多久？」「再說，胸罩那麼大一點，要好幾百塊錢，按平米算，比房子貴多了。」