插圖：詹震寰 

中環人語

陳復生有得分身家

豪門烈女子十姑娘（何婉琪）久未露面，去年阿女麥慧貞同八姑娘何婉鴻一度登報尋人，有傳十姑娘患咗腦退化症，現於養和靜養。過往時時傍住十姑娘嘅私生子何東舜銘同媳婦陳復生，亦相繼潛水，但其實就「匿埋」打離婚官司。二人為咗爭身家，由○九年鬥到依家。舊年十月，佢哋單離婚官司喺高院舉行閉門聆訊。小宗收到風，法官判咗陳復生贏，何東舜銘要將二億五千萬身家嘅一半分俾前妻，另加每月十萬贍養費，以及一子一女每月各有萬五蚊書簿費。咁都未算，何東舜銘仲要繳交二千三百萬堂費，都咪話唔揦脷！只不過，小宗聽聞，何東舜銘一直對老婆實行財政封鎖，結婚嗰時一炮過俾咗三百萬禮金，但結婚後，一直只係提供大屋、私家車俾老婆用，但加名、轉名就無份，今次裁決可謂一鋪攞番晒。

自此無拖無欠？未住！十姑娘仲入稟追緊前媳婦還番隻鑽戒，何東舜銘又報警話前妻去佢屋企偷信。最近，又俾陳復生找到證據，當年十姑娘同燊哥喺澳門開嘅珠寶店 Florinda（以賭王母親命名）退股後，分得一億九千萬，俾咗何東舜銘，咁陳復生應該又可以分一半，多九千五百萬囉。所以話，兩個人結到婚係緣分，離婚仲咬住唔放，都咪話無緣分，孽緣個緣囉。

啤梨張震遠唔震近

張震遠（左二）嘅商交所自我引爆後，已報名嘅參加者會唔會叫回水呢又？ 

下個禮拜一，左派龍頭社團中總舉辦「企業家論壇——港台合作與交流」，「從經濟、文化、社會等不同角度，探討香港、台灣在新形勢下的合作機遇」。兩個作「專題演講」之企業家，其一為林建岳，另一個係張震遠。
張先生一向打開工，首次創業，成立香港商品交易所。論壇登告白之時，商交所資不抵債，交番個牌俾證監會，即係承認檔生意失敗。張先生咁都算係企業家？中總更加搵佢作專題演講，（仲收埋入場費添？！）張先生個大號都有得你叫啦，震遠仲或者得，震近就肯定唔拿手啦！

回收馬仔「廁紙」

上期《壹》仔踢爆馬會每日將過百噸本來可以攞去回收嘅馬糞送去堆填區，小宗聽聞馬會都不敢怠慢，搵緊回收商，想將用來載住馬仔米田共嘅報紙墊料攞去回收。即係廁紙回收？原來，將馬仔便便同報紙分開，需要特別技術，有回收商獅子開大口，掉轉頭問馬會收番運輸費。馬會就心思思諗緊呢筆錢係咪由馬主用者自付。小宗打俾搞緊廢油回收、又貴為馬主嘅張宇人，以為佢會舉手支持環保，點知「廿蚊張」果然係算死草：「邊個肯收先？如果回收返嚟啲嘢有用，有乜理由要我俾錢？收返嚟無用就要俾啫！」廿蚊張仲話佢將廢油回收，改做生物柴油轉口去歐洲，所有廢油全部都要真金白銀買返嚟咁話。
不過馬房管理係由馬會同練馬師話事，馬主無乜 say，只能個個月 pay。連本身係馬主嘅馬主協會義務秘書吳嵩都耍手擰頭話：「環保嘢我唔識，唔敢答。」話怕其他馬主唔高興喎。其實做得馬主，個個都係大孖沙、有錢佬，每個月肯出四萬蚊養隻馬仔，邊度在意嗰少少錢，幫堆填區減少負擔，算係做善事啦。

馬會急急腳搵人回收馬糞（箭嘴），但「廿蚊張」（圖）就唔信有回收商有興趣咁話。 

Give me a break中環免費靚景位

要睇靚景，唔一定要上山頂。喺中環呢個高樓大廈林立嘅地方，其實有好多選擇。首選梗係國金二期五十五樓，樓層夠高，而且臨近海皮，一面俯瞰整個中上環，另一面遠眺昂船洲大橋，甚至成個九龍半島。呢層係金管局資訊中心，訪客喺國金二期地下登記後就可上樓，內有展覽館及圖書館，介紹香港嘅貨幣發展及金管局運作等。展覽館內可拍照，但圖書館書籍就全部不設外借。
另外，舊地標中銀大廈四十三樓，同樣開放俾公眾影相，上面望到西九以至紅磡嘅風景，但部分景觀就俾前面嘅友邦金融中心擋住。最後就係灣仔嘅中環廣場，其四十六樓原本係俾用戶轉電梯嘅，但公眾都可以上去影相，由兩層樓高嘅落地玻璃望出去，可以一百八十度欣賞成個維港景。

國金二期嘅金管局展覽館，呈 L形設計，一邊看到中環景，一邊向海。 

中環廣場轉𨋢大堂樓底夠高，而且三百六十度都可以看到風景，經常吸引遊客參觀。 

金牙大狀講嘢

破格重新委任啤梨張做市建局主席之時，佢檔生意已成敗局。 

689刻意護短
啤梨張成世人打工，自己一出嚟做生意，開商品交易所即見真章，折㦸沉沙，要交番個牌俾證監會，失敗率百分之一百。佢老哥係唔係做生意嘅材料，仲使多講乎？
按理 689破格重新委任啤梨張做市建局主席之時，證監老早已經知道佢檔交易所唔掂。既然係咁， 689照樣搵佢主掌市建局呢間全港最大、擁有最多最貴重市區地皮而又手瓜最有力之地產發展商，咁又與攞香港最寶貴之資源較飛何異？
啤梨張做研究顧問出身，佢把口叻無可置疑。佢係 689嘅競選辦總舵手，化劣勢為勝局，佢肯定有見得人嘅戰績。（手法見唔見得人，另議。）但做生意係唔係佢杯茶，完全無須拗矣。佢仲適唔適宜繼續做市建局主席又仲使研究乎？

中環人語迷你版

“從無向任何所謂「大地產商」借貸。”
估中邊個中環人講呢句說話，送你 PNY 4GB Micro SDHC Card with Adaptor一件
有意參加者，請於五月二十七日 24:00前將答案電郵 mailto:centralman@nextmedia.com
小宗只接受電郵，郵寄免問。

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年五月三十日本欄揭曉。

上週人語揭曉

“以和為貴。”
答案：趙國雄
得獎者： Cindy Lai
中獎時間： 1:00pm 15/5/13