胡志偉即刻飛奔去張國柱個位，幫佢㩒「出席」掣。（羅國輝攝） 

八卦陣

張國柱熟睡　胡志偉代投票

曾鈺成出手剪布，歷時六十幾個鐘嘅拉布戰終於落幕，但議員依然無得休息，仲要逐一否決嗰幾百項修正案，即係不停咁㩒掣，做橡皮圖章。有建制派議員同記者呻，話表決期間仲慘過拉布嗰陣，事關唔可以隨便行開以免流會，又不停㩒掣，連廁所都唔多敢去。

上週四，工黨議員張國柱都有出席會議，但唔知係咪㩒掣㩒得太悶，定係曾主席把聲太催眠，張國柱竟然瞓着咗。曾主席宣布開始表決第 616項修正案之際，亦發現張國柱被睡魔纏身，於是呼喚咗兩聲「張國柱議員」，但佢都無反應。就喺呢個時候，胡志偉跑去張國柱身邊，一邊幫佢㩒「出席」掣，一邊搖醒佢，然後即刻走開，留低一臉迷惘嘅張國柱。
不過，議員要按出席掣，先正式投票，即按出席掣都係投票一部分，代人㩒掣係咪真係冇問題？胡志偉向本刊坦認當日幫過張國柱㩒「出席」掣，但佢認為張國柱本人真係喺會議廳，佢亦唔係代佢投票，喺無影響投票意向嘅情況下，應該冇問題喎。立法會秘書處話現時《議事規則》無規定議員喺會議廳內因任何原因，未能按下出席或投票按鈕，可唔可以由其他議員代為按下，仲話立法會主席會視乎實際情況而作出決定。咁都得？

張國柱瞓到接近昏迷狀態，曾主席連叫兩聲「張國柱議員」都叫唔醒佢。（羅國輝攝） 

解放軍幫湯顯明大逃亡

醜聞纏身嘅前廉政專員湯顯明上星期六終於現身立法會，出席政府帳目委員會公開聆訊。不過，貪湯答非所問，主席石禮謙都忍唔住批評佢「拉布」，最後宣布將向貪湯發傳票，令佢喺下次聆訊所講嘅嘢，唔會成為其他刑事調查嘅呈堂證供，即係唔俾佢再迴避提問。
會議結束後，貪湯坐駕一直擺脫唔到傳媒追蹤，決定揸去佐敦三軍會。貪湯落車後敷衍咗記者幾句就匿入會所。記者守候期間，會所職員唔單只驅趕記者，仲聲稱已報警，幫貪湯幫到出晒面。
回歸前，三軍會係駐港英軍同家眷嘅會所，為會員提供康樂設施和服務，回歸後交駐港解放軍管理。三年前有立法會議員質疑三軍會會籍開放，已非作軍事用途，建議政府收回土地，但事件不了了之。雖然名義上市民可申請入會，但會費相當昂貴，個人會員要十萬。聽聞唔少紀律部隊高層都係會員，間唔中都去密斟。

貪湯蒲頭，唔單只傳媒緊張，連三軍會保安都大陣仗布防護送佢。（翁少陽攝） 

聆訊當日，貪湯除下眼鏡，配以一頭白髮，明顯扮頹。（翁少陽攝） 

黃毓民最愛細胞分裂

上週四，毓民同大嚿一齊到法院等宣判，但唔知有心定無意，當日兩人前後腳到場，又前後腳走人。（鄒潔珊攝） 

黃毓民星期一突然向人民力量主席劉嘉鴻同黨友陳偉業發信，宣布退黨，但冇講原因。今次毓民「退黨保平安」，政界流傳主因係不滿劉嘉鴻接受「真普選聯盟」二○一七特首選舉設立提名委員會嘅立場，又有傳毓民要保住同人力中人早有芥蒂嘅黃洋達，真相係點查實冇人知。
毓民○六年成立社民連，後尾拉隊離場另組人民力量，跟住又同蕭若元反目，人網因此摺埋。社民連前主席陶君行直言，一早睇穿毓民玩咩把戲，食花生嘅時間都慳番，「呢個人真係生人勿近，佢要同你合作時就稱兄道弟，背後有其他政治目的時就反轉豬肚、抹黑人，呢啲人點同佢合作？嗰堆所謂離開（人力）嘅理由，根本係戇居！」毓民因乜事退黨，阿陶話唔方便公開講，費事毓民告佢誹謗。
俾毓民用完即棄嘅又點止阿陶？去年網上炮轟黃教主專制獨裁嘅「馬草泥」任亮憲，就形容毓民係「分裂細胞」，有毓民嘅地方就有分裂，仲話唔明點解毓民總係揀個黨發展到有啲成績時先嚟搞啲咁嘅嘢喎。三年前同毓民擘面嘅社民連前秘書長季詩傑，仲即時喺 facebook吹雞叫人競猜毓民下一個組織名稱添！
黃洋達回應話黃毓民冇打算加入「熱血公民」，亦唔打算搞聯盟政黨。可能黃洋達諗多咗，以黃教主嘅性格，佢又點會唔另起爐灶？

商交所爆煲　陳冉隨時跳船

上週六陳冉老闆張震遠見記者回應商交所爆煲，佢連影都冇，呢個主席助理職位真係易做。（《蘋果日報》圖片） 

深受梁振英器重嘅「共青女」陳冉，特首選舉過後因為未住滿香港七年，冇得做特首辦項目主任，去年底被安排去張震遠嘅商品交易所做主席助理，但上星期張老闆「爆煲」後見傳媒，陳冉由頭到尾冇現身幫手，主席助理似乎都係花瓶居多。
根據可靠消息，舊年陳冉「失業」後，梁振英安排過佢去董建華做主席嘅中美交流基金會做嘢，但聽聞呢位大小姐見完工後嫌人工低，賺錢唔夠買花戴，於是轉過頭去咗商交所，但佢勢估唔到泊錯碼頭，半年後再次面臨失業。
記者打電話問陳冉會唔會跳船，佢笑到好尷尬咁話︰「我唔會答你，你留低電話，我叫同事覆你。」吓？你跳唔跳船，要同事代答？張震遠就拍晒心口，聲稱唔會裁員，陳冉暫時可鬆一口氣。

河蟹剋星救龍尾蟹

港大新聞及傳媒研究中心助理教授傅景華成功研發「微博視野」資料庫還原軟件，趁微博帖子被刪之前複製留底，仲打算將資料翻譯成英文版，令全世界都可以了解內地民情，堪稱「河蟹剋星」。不過本週日傅景華公然「撐河蟹」，究竟所為何事？
傅景華撐嘅「河蟹」，原來係喺大埔龍尾灘生活嘅蟹，佢同屋企人出席守護龍尾大聯盟記者會，反對政府漠視申訴專員調查，拒絕撤回龍尾人工泳灘環境許可證。查實傅景華一家舊年去過龍尾撐海岸生物，佢順便向子女灌輸人類同大自然可以共存嘅訊息。
傅景華細仔好生性，主動提出將今年小學畢業功課主題定為保育龍尾，喺記者會完咗之後「訪問」有份出席嘅張超雄，傅景華全程幫個仔錄影，真係廿四孝老豆！

隆線強蟹 

傅景華本週日現身守護龍尾大聯盟記招，順便錄影囝囝發言。（江永健攝）