丈夫三年前突然病逝，令陳太頓失方寸，一對子女更因憶父而出現情緒問題，幸得到贐明會協助，替三人解開心結。 

親壹親

如何與孩子談死？

對於死亡，孩子們各有不同「見解」：「老人家先會死㗎！」「媽咪話死咗即係瞓咗覺！」「好似卡通片咁，撞完車睇咗醫生就會翻生！」「因為我唔乖，所以爺爺病死咗。」小孩對死亡充滿好奇和想像，但奈何中國家庭偏偏對死亡忌諱，一頭霧水的孩子，當經歷親人離世、看到災難新聞甚至有關死亡的電視劇，除感到不開心外，還可能會有驚恐、憤怒及妒忌等令人意想不到的情緒問題！家長應如何安撫？原來向孩子解釋「死」，其實都不是易事。

憶述當日因證件未辦妥，身困羅湖關口而無法見丈夫最後一面的心情，一直平靜的陳太禁不住哽咽落淚。 

持雙程證的陳太（化名），於○九年十二月底處理完老爺葬禮後，返回深圳續辦證件，不料只離港數天，竟與枕邊人陰陽永隔。「我在深圳候證期間致電丈夫，佢話好肚痛同好攰，我叫佢快去看醫生，但佢又嫌我煩，收線後因為唔放心，所以聯絡奶奶探望他，奶奶上去望吓後，見個仔無事便離開。」

月初老爺　月尾丈夫

奶奶翌日再登門探望時，驚見兒子嘴唇發紫兼大便失禁，隨即將他送院，陳太獲通知指丈夫胃穿窿兼腹膜炎要即時動手術，她當時心想：「入咗院，有醫生睇住，應無事嘅。」點知，丈夫上午入院後竟於同日宣告不治，要承受這突如其來的噩耗，陳太哽咽：「我當時真係好震驚，但證件未到無得過香港，家人帶咗對仔女過來羅湖關口陪我，我當時崩潰晒，只係不停地喊，根本都理唔到對仔女無咗爸爸有咩感受。」
除了面對喪夫之痛，陳太生活更頓失依靠，要以一人之力養育一對子女，實在心力交瘁，當聽到四歲的長女不時問：「好掛住爸爸！爸爸幾時返？」，陳太即無法控制眼淚兼會推開女兒：「你唔好問我。」女兒除經常問爸爸去向，又會將與爸爸的合照放在床頭，有時，更會妒忌同學有爸爸接放學。

妒忌表妹　亂叫爸爸

「佢見到表妹有爸爸抱，就會好妒忌，會眼金金望住姨丈，見到男親友，又會好黐身扭計要抱，最尷尬係返教會見到男教友，阿女會叫人做爸爸，朋友話無所謂，但我會好嚴肅咁同佢講：『人哋對你好，都唔可以咁叫㗎！』她笑笑口應承，但轉頭又繼續咁叫。我明白佢需要感情寄託，需要父愛，但見佢搵人代替爸爸，我真係好心酸。」憶述當時情況，陳太亦感愧對女兒：「其實老公死後一年間，阿女都經常發噩夢或者喊醒，我只能抱抱她，我知佢其實內心好不安、好無安全感，但我根本都唔知點同佢傾。」
為讓女兒釋懷，陳太嘗試上網尋求協助，但發現服務機構收費高昂，令她猶豫卻步，直至有日帶仔女到社署申領綜援時，有社工上前了解其家庭狀況，並遞上「贐明會」的單張，才找到求助之門。贐明會為一個專為喪親家庭提供輔導服務的社福機構，該會社工戴詠君表示：「其實孩子太細，語言發展未成熟，只能夠表達唔開心，但無法講出背後原因，家人亦受情緒困擾而無法冷靜協助孩子處理情緒問題，所以我會透過遊戲治療，藉繪本、遊戲和玩具等作引導，協助他們講出內心的感受及進行輔導。」

遊戲輔導　解開心結

戴姑娘每星期都替兩姊弟進行輔導，其間向他們講一些關於生離死別的故事，並嘗試問：「如果你係故事中的孩子，無咗家人朋友，你會點呀？」讓姊弟嘗試代入角色，講出內心感受。戴故娘憶述：「有一次我給姐姐一個大型不倒翁，她接過後不停地打，我問她：『你點解不停打？你係咪好嬲呀？』但她當時只是點頭；我亦試過要她畫出當想起爸爸時的感受，姐姐當時畫了一個正在哭的臉。另外，細佬當時只有三歲，並無表現出有情緒問題，但同佢玩積木砌屋仔時，他不斷用好多積木圍住間屋，我問佢點解，佢答我：『圍住安全啲！無咁危險！』」
輔導約一年後，姊弟才願意打開心窗，透露唔開心是因為好掛住爸爸、想佢返屋企，姐姐亦講出當日猛打不倒翁，是因為她嬲爸爸拋棄佢，離開佢；另外，細佬積木圍屋的行為，是反映出因爸爸突然離世，要搬屋以及生活上其他轉變，都讓他對未來無法預料，失去安全感。
戴姑娘指出：「當孩子表達了因爸爸離世後感到害怕、不安及憤怒的情緒後，我便要向他們解釋，其實爸爸是因病離世，並非拋棄家人，若好掛住佢，可以同媽媽講，可以一家人祈禱，一齊睇生活照，講吓爸爸在家時的趣事。」她解釋：「我們要讓孩子每一次想起爸爸都是樂事，亦要他們明白並非孤單一人，唔開心亦可找家人分擔，同時，我們亦要陳太知道，當遇上如父親節或聖誕佳節時，一家的情緒都會被牽動，媽媽可安排節目，令子女感受到無爸爸的日子，一家亦可以過得開心快樂。」
當被問及想起爸爸的感受，現時七歲半的姐姐坦言：「我以前會覺得好難過同埋想喊，有時又會發噩夢，但同戴姑娘玩完之後就開心咗，無以前咁唔開心。」而陳太則表示：「經輔導後，仔女同我講好掛住爸爸時，我會回應佢哋我都係呀，我哋試過三個攬住喊，又試過一齊祈禱，我發覺大女少咗發噩夢。」

贐明會社工戴詠君（中）藉講及生離死別的故事，讓姊弟倆講出內心感受。 

輔導期間，姐姐透露因感爸爸將她拋棄而憤怒，故藉打不倒翁洩憤；但三年過後現已再無憤怒感覺，只與不倒翁「玩吓」。 

舅父忌日　忽然傷心

媽咪 Carmen坦言兩年前已向 Jack灌輸生死教育，故從家庭相簿看到逝世舅父與公公的生活照時， Jack已不再感到驚慌。 

就算沒有親身經歷生老病死，原來孩子看到離世多年親友的相片以及海難地震片段，亦會感到驚恐不安。與丈夫育有六歲兒子 Jack的 Carmen憶述：「我爸爸同細佬已離世超過十年，所以 Jack根本無見過佢哋，以往拜山時他只知拜公公和舅父，並無細問，直至兩年前，當時得四歲的 Jack在櫃內找到舅父的生活照，然後問我『點解佢會死？』我當時心寒一寒，因當日恰巧係細佬死忌，我答 Jack：『佢病死，係血癌。』他聽後再問：『佢點解病？做咩唔睇醫生？』我細心解釋：『佢有睇醫生，但醫唔好。』 Jack聽後即淚流滿面哭訴：『我唔想佢死呀，我都未見過佢。』
「我即時抱住佢解釋：『其實人人都會死，唔好太傷心，到你大個仔時，媽咪都會死㗎！』但阿囝愈聽愈驚，猛話『我唔想！』我再同佢講：『人大約有七、八十歲命，但人生有好多好開心嘅事，我最開心就係生咗你，我哋好好珍惜相處嘅時間，到時你掛住我，你可以嚟拜我囉！』 Jack當時似明非明，往後一個月，不斷問我『人死咗會去邊？佢聽唔聽到我唱歌？媽咪你唔死得唔得？』」 Carmen坦言：「有時我真係唔識答佢，我又無宗教信仰，學校又無教，問我人死咗會去邊，我只好同佢講上天堂。」

含糊其辭　曲解生死

Jack曾經摘花送給媽咪，但得悉花草樹木也有生命後， Jack賞花時會小心翼翼。 

中大社會工作系助理教授陳智豪指出：「孩子年紀太細，認知能力未成熟，根本難以明白何為死亡，當有親友離世或新聞見到有天災或意外死亡，孩子便會有許多問題，更會因擔心自己或父母死亡而感到不安，但有家長為免多花費唇舌，或擔心會嚇怕孩子，所以會用去旅行、移民、瞓着咗等解釋，有時反令孩子擔心得唔敢瞓兼唔准家人去旅行，怕會一睡不起或唔會返嚟。
「過往亦有求助個案的孩子因親友離世後缺乏關心，經常詐肚痛及扭計唔返學，令家長要請假照顧，家長初時以為孩子唔生性，但後來才明白孩子詐病，是想家長陪伴。所以，家長發現孩子受生死問題困擾時，要先鎮定孩子情緒，清楚解釋死亡是每個人都會經歷，是無可避免及無法逆轉，然後就給予孩子安全感，讓他知道，人不會無端死亡，患有普通傷風感冒，經治療後是不會死。」
到底幾時要開始向孩子解釋死亡？陳智豪認為：「家長可透過日常生活中的植物、寵物，教孩子要愛惜生命，讓孩子明白無論人或動植物都會有死去的一天，亦可透過人命意外的新聞，讓孩子知道有時候意外是可以避免，以加強自身安全意識。」

教你談「死」

從日常生活中無論電視新聞、探病問喪以至清明時節，孩子都有機會耳聞目見與死亡相關的事件，為免令孩子感到不安，家長們可參考以下數招應變方法。

話你知

贐明會除為喪親家庭提供輔導和治療外，早年更設立「共童導過——兒童哀傷輔導服務」，免費為十八歲或以下兒童及青少年提供輔導小組、講座和工作坊，助面對喪親、喪友問題的青年及兒童走出困局，詳情請瀏覽贐明會網站：http://www.cccg.org.hk  keyword服務「共童導過」

與孩子談及生命如何結束時，自然會講及生命如何誕生，但不少家長認為兩性問題實在難以入手。想有計劃地向孩子灌輸正確的性教育，家長可瀏覽家計會網站： http://www.famplan.org.hk  keyword性教育網頁

撰文：陳美莉　
攝影：陳健邦