登機證

日圓喪跌　買起東京

我第一次去日本旅行，在大學時代，報名參加新華旅遊。為儲旅費，入有線電視當暑期工，日日孭住張大型海報浪遊銅鑼灣，宣傳九八世界盃，遇到同宿舍的女生，被嘲笑。
去完日本一趟，我覺得超值。事隔十年多，收入比暑期工增加了，但日圓不斷升值，在日本消費始終不夠痛快。終於等到難得時機，日圓日日跌，接近記憶中低位了，又是時候重拾購物慾。很誠實，你可能依然選擇新宿、原宿、涉谷、池袋、秋葉原。悶不悶？東京不會悶，新購物點不斷湧現，如圖中這間位於東京站的新商場 KITTE，隨時歡迎你開拓新 check point。

弱建築販賣設計

KITTE不似一般商場。
一般商場，店鋪最好有咁多得咁多。七層高的 KITTE，五樓六樓是食肆，總數只有九十八間鋪。請來建築大師隈研吾操刀設計，隈研吾出名弱建築，主張重視天然，減少人工。在名家的妙手下， KITTE沒有什麼連鎖品牌進駐。你會失望還是驚喜？
KITTE解切手，即郵票，前身是東京中央郵便局， 07年與東京車站齊齊復修，改裝成新商場，當中店鋪，接近一半是首次登陸東京。消費指數偏高，未必是掃貨或購入指定手信的好去處，難得地方是你還可以發掘出一些只此一家的新元素。

1F-4F

四樓是整個商場的靈魂所在，幾間售賣雜貨的特色店鋪都在四樓，例如精品酒店的姊妹店 CLASKA Gallery& Shop"DO"。但我更愛專賣木製精品的 Hacoa。鍵盤$6,750，滑鼠$741。係好鬼貴，但好鬼靚。

膠紙座$79。我至少捨得買呢個。

顧慮一般遊客的購物需要，在二、三樓，都有啲如呢間賣帽的 override，或者賣襪的 Tabio。男士方面，有香港人很愛的金子眼鏡店，唔會一味得藝術品欣賞。

前身既是郵便局，翻新後，仍保留右圖的局長室對外開放作參觀之用。一樓的郵局又特別發售有關東京站的紀念品。

6F

六樓天台，大半層是空中庭園，面對面望向東京站外貌，坐在草地旁，心曠神怡。是男士們等待女士掃貨時，上佳的休息勝地。

B1F

牛奶布甸$53@北海道岩瀨牧場，質感似雪糕，即場食，略硬。

萬代太古$7.9@新潟大阪屋，百年老店的傳統洋菓子口味。

像一般東京商場，地庫都是賣食物的，但 KITTE的 KITTE GRANCHE，網羅全日本不同地區的名牌，很多是東京獨家，吸引力又大增。

KITTE
地址：東京都千代田區丸の內二丁目 7番 2號
電話：+81-03-3216-2811
交通： JR東京站丸の內南口
營業時間：週一至週六 11:00-21:00，週日及假期 11:00-20:00
網址： http://jptower-kitte.jp/

掃貨之選帶定多個喼

去大阪，會去 Rinku Premium Outlets，因為近關西機場夠方便又整齊。去東京，很少去 outlet，因為迪士尼附近的幕張三井 outlet，又唔就腳又混亂，基本上買唔到嘢。
情況有變化。在成田機場附近的 Shisui Premium Outlets，管理是信心保證，接駁到機場的巴士只需十五分鐘車程，由東京站搭巴士去也只需五十分鐘，完全方便作為你的最後掃貨目的地。仲要網羅香港人最愛日本品牌如 Francfranc、 Mercibeaucoup、 United Arrows、 Nice claup等等，平均半價，部分低見兩折，仲要好多係當季貨色，少女去到，死得，仲要細心到安排埋地方俾小朋友玩樂，師奶去到，更死。老豆？睇仔啦！

呢張相片，想講幾樣嘢。第一， outlet地方夠大，行人空間充足，即使遊客多，依然行得非常舒服。第二，好多人帶埋寵物去行，似一個遊樂場。第三，模特兒忍唔住手即場買即場換新裝。

成個 outlet，有成百幾間鋪，大把選擇，其實唔會點需要排隊，係呢間 Garrett Popcorn Shops長期見人龍，唔係特別平，只係在場小朋友多。香港人去番 IFC幫襯可以了。

你估到在 outlet也有好嘢食嗎？ Food Court內的 Kamukura Soup with Noodles屬關西人氣品牌，一個套餐約$80，以 food court水準來說，味道有驚喜。

Food Court內，有航班消息展示，如果你咁都買到遲到，實屬不幸。

甚少有減價的 United Arrows也有店，但賣新貨多，大部分八折，只有小量貨品半價，吸引力其實一般。

如果你帶小朋友去，唔方便拖住佢掃貨，可以放低佢在 outlet內的遊樂場。成班日本小朋友陪住玩，叫你老公得閒𥄫吓咪得囉。

嫌曬，掟佢入 Lego店囉。 Outlet內另有 Disney Store，但只售毫無吸引力的貨色，反而 Lego勁有誠意。《星戰》、 Marvel漫畫人物的鎖匙釦（左），只售$37，平香港好多，啱晒做手信。

Shisui Premium Outlets
地址：千葉縣印旛郡酒酒井町飯積 689
電話：+81-043-481+6160
交通：東京站專車，一日五班，單程$92，來回$153
營業時間： 10:00-20:00
網址： http://www.premiumoutlets.co.jp/

睇 Skytree舊區大翻新

從 EKIMISE天台，可望到如此景色。晴空塔每晚七點亮燈，吸引不少龍友上去影相。

晴空塔 Skytree即將開業一周年，已經成為東京旅遊必到之地，例如嚟緊週六五月廿五號，將會舉辦螢火蟲節， Skytree下的水面將被 LED燈點亮成藍海一片，預計必定逼爆淺草區。
有人流，自然有生意， Skytree附近的區域紛紛被開發，例如東武淺草站上蓋就被翻新成新商場 EKIMISE，老老實實，你話好多嘢買，好多嘢睇，肯定不是，始終舊區，店鋪不是一般連鎖店，特點是大懷舊。如果，你去開 Skytree，可以順便來逛一逛；又或者，醉翁之意，上來影 Skytree也可。

商場內店鋪，講真，較有特色的都是賣和服或傳統手工藝之類，斷估你唔會有太大興趣，反而位於七樓的忍屋比較搞嘢，除咗售賣大量忍者精品外，仲有掟飛鏢遊戲，又可以借套忍者服嚟影相，可惜家陣的小朋友不是睇金密基長大。

忍者貼紙$53

掟飛鏢遊戲$23/5次