堅強哥即使失去了一隻後腿和尾巴，仍能在跳台上來去自如。牠見記者走近，即露凶相，想嚇退記者。 

Petbook

大難不死　堅強哥

一隻遇上交通意外而斷肢和尾巴的流浪貓，原以為生命已走到盡頭，幸好牠遇上阿芳，把牠從鬼門關拉回來。最後，這隻貓靠自己的意志，捱過重重難關，得以大難不死，故被一眾愛協的義工稱呼作「堅強哥」，在阿芳的家安定下來，找到了幸福。

採訪當日，記者來到阿芳位於大埔林村寨乪村的家，甫踏入屋，即見只有 3隻腳的堅強哥，極速閃到沙發背後，「佢之前喺街流浪過，仲曾經受傷入院，所以佢戒心好強，見到陌生人會匿埋。」
堅強哥身世非常可憐，全靠一班義工救了牠一命，由於牠死裏逃生，被一班義工稱為「堅強哥」，「我做咗愛護動物協會嘅『貓隻領域護理計劃』義工 5年，會幫手捉流浪貓去做絕育手術。喺今年 1月尾，有一位朋友通知我，林村新塘村嘅垃圾站，發現咗一隻尾巴同右後腿都受咗傷嘅流浪貓。」

由於堅強哥曾流落街頭，故對陌生人戒心極重，一見到記者進門，即極速閃至沙發後面。 

被車輾過身受重傷

阿芳接到通知後，即晚趕到新塘村垃圾站現場，「第一晚搵唔到佢，但我唔死心，第二日問朋友借咗個捕貓器去捉佢，結果俾我成功捉到；但佢當時受嘅傷，比我想像中嚴重，條尾差唔多要斷、隻後腳已經唔郁得，所以我當晚帶佢返屋企，叫獸醫上門睇佢，經過診斷後，估計佢應該俾車輾過條尾同後腿，而個傷口冇及時處理，已經壞死，要即時做切除手術。好彩手術成功，堅強哥總算捱過第一關。」
手術後第一日，堅強哥被送往醫院，但隨後獸醫發現牠不肯進食，便決定幫牠插胃喉，然後再替牠進行詳細檢驗，「堅強哥唔肯食嘢身體好虛弱，到咗第二日醫生幫佢驗血同照 X光，發現佢原來失血過多，身體上嘅血量只有正常貓嘅 10%，要立即搵另一隻貓同佢輸血。醫生之後發現佢有黃膽、肝炎同細菌入肚，要留院醫治。我當時好擔心，好怕佢會捱唔住，但經兩星期治療後，堅強哥總算慢慢恢復過嚟。

意外令堅強哥失去了右後腿和尾巴。 

剛送院的堅強哥，右邊後腿和尾巴已經嚴重受傷，需做切除手術。 

住院兩星期後，醫生發現堅強哥背部皮膚壞死，需要塗藥膏然後進行包紮，圖為治療期間的照片。

患病失被收養機會

當大家以為堅強哥可以出院之際，醫生又發現牠背部皮膚因為冇血到而壞死，所以又要留院治療兩星期。經過整整 1個月的醫治後，堅強哥出院了，同時亦找到新主人收養，但天意弄貓，令牠失卻機會，「收養者本身有養貓，我以為堅強哥去到一定識到好多新朋友，但佢出院前被驗到患有傳染性腹膜炎，由於呢種病會貓與貓互相傳染，所以收養者迫住要放棄收養佢。」
塞翁失馬焉知非褔，阿芳看到堅強哥經歷了這麼多苦難，即使自己沒有養貓經驗，都決定收養牠，給牠新的家。堅強哥在阿芳家已住了 3個月，生活也慢慢安定下來，「我養咗 8隻狗狗，其中一隻金毛會放喺屋裏面，堅強哥唔怕佢之餘，仲相處得好好，大家會不時玩吓。我見堅強哥習慣咗呢度嘅生活，而得番 3隻腳都可以活動自如，都好安慰，希望佢可以喺度過新嘅生活，我哋都會好錫佢。」

阿芳的家中的金毛尋回犬仔仔，跟堅強哥特別友好，牠們平時會睡在一起。 

堅強哥現在跟阿芳相處得很好，原本怕人的堅強哥在阿芳的懷中沒有感到半點不安。 

怎樣幫助流浪貓?

一向喜歡動物的阿芳，樂意做義工為動物出一分力。現時她家中養了 8隻狗，而堅強哥是她第一隻飼養的貓。 

愛護動物協會推行「貓隻領域護理計劃」，目的是透過先捕捉、後絕育，再釋放回原居地的方法來減少香港流浪貓的數量，亦令因數量太多而需要進行人道毀滅的貓隻數量減少。
阿芳說：「我一向好鍾意動物，唔忍心見到條村啲流浪貓不停生，但冇人理，好多貓因為咁而餓死、病死或被車死，所以我主動參加呢個計劃，幫流浪貓絕育然後放回原處。呢 5年間我大約捉咗 30隻貓去絕育，村內貓嘅數量都得以控制，死傷都少咗。𠵱家好多朋友一見到有流浪貓就會通知我，搵我幫手捉貓絕育，亦都因為咁，我先有機會遇上堅強哥。」
流浪貓比較難捕捉，有餵飼流浪貓的人士成功捕捉的機會會較大，假如你有餵飼流浪貓的習慣，而且又想幫助牠們，可以加入「貓隻領域護理計劃」當義工。
查詢：愛護動物協會 2232 5561

撰文：何倬然
攝影：傅新發
部分圖片由被訪者提供