代購店 GeTheMall由 facebook起家，現時已發展到有鋪位作交收之用，老闆 Trevor（左）和 Ivan表示這算是有點成績。 

創業通

facebook宣傳掘金

在上年 5月上市的 facebook，令 Mark Zuckerberg一躍成為億萬富豪。 facebook不只社交網站咁簡單，這平台還提供了很多商機，據官方統計香港已有 400萬名用戶，滲透率和互動性都十分高，不少人已藉 facebook創業及宣傳賺到第一桶金，但不知怎樣將 facebook效益最大化，今期〈創業通〉就請來專家教精你。

Case1：代購店用 facebook作試金石

facebook： gethemallfans：約 8,000月賺：$30,000 

記者去到旺角花園商業大廈 9樓的 GeTheMall， Trevor和 Ivan正在整理貨物以騰出空間辦公，一個不足 2百呎的單位堆滿貨物，餘下的地方只足夠放一張枱，環境不可以說是理想，但創辦人 Trevor笑言已不錯，「已經好好，有個地方落腳，我哋喺 facebook起家，之前要約啲客喺地鐵站交收，又驚俾人趕，好唔方便，𠵱家算係有個固定地方交收。」
GeTheMall是一間網上代購店，集合一群人訂購外國產品，令運費可以共同分擔，消費者支付平運費有着數，而他們收取運費差額來營運，「我哋會揀啲外國比香港平嘅品牌，或者做緊減價嘅名牌，喺 facebook專頁 post呢個產品出嚟，睇吓有冇人有興趣一齊訂，好似喺美國訂一對減價嘅 new balance波鞋，貨品會照兌換率計算，但每個客人都要畀$135嘅固定運費。可能件貨品要 10人訂先成團，唔夠數就會取消。愈多人訂個運費愈平，我哋賺運費嘅差額就愈多；客人畀嘅運費相對又平過自己訂，一舉兩得。」

確認入數訂貨交收

當客人看到 facebook的產品表示有興趣後，他們便用 email寄一張表格給客人填寫，「要確認番款式同數量，會要求佢哋入咗數先，之後 send番張過數紙畀我哋，我哋就訂貨，收到貨時會約佢哋出嚟交收。」
Trevor、 Ivan及兩個同伴在 12年 6月創立 GeTheMall，並於 facebook開設專頁，「喺 facebook開始又唔使錢，又多人用，宣傳效力大，最初都係叫身邊朋友用吓同時 share出去，慢慢多咗人知。」現時 GeTheMall累積約有 8千多名粉絲，並於今年年頭租用樓上鋪作交收之用，扣除租金等成本，月賺約 3萬。

貨物到港後， Trevor會幫一些貨品拍照上載至 facebook，宣傳一下。 

Toms經典鞋款在港標價約$650，而在外國訂連運費只需約$400。 

客人 Karen我不時上 facebook睇最新嘅產品訂購資訊，有疑問時佢哋答得好快，啲嘢跟得好足。

專家點睇？

Jack表示 facebook可以減低年輕創業者的投資成本和風險。 

facebook創業減低蝕錢機會
eMarketing Technology Limited的創辦人 Jack，專門協助企業推行電子行銷業務， Jack認為 facebook給予了很多年輕人創業機會，成為一個免費創業平台，尤其是像 Trevor和 Ivan這些資金有限的創業人士，「代購店呢種需要人多嘅生意，幾適合喺 facebook開展，尤其𠵱家智能手機嘅普及，輕易上到 facebook，可以吸納到唔同年齡層嘅客人瀏覽。作為創業新手，喺 facebook可以作為試金石，如果反應理想可以學 GeTheMall租鋪發展；相反嘅話都唔怕輸到血本無歸，蝕錢嘅風險大大降低。」

Case2：貿易公司老闆靠 facebook轉型

10年創立的 Ocean Three同樣是在 facebook起家，現時已有兩間分店，每月盈利約有 20萬，創辦人 Hamish本身做海鮮貿易生意，但一次投資失利反而令他發展新事業，「有次幫間餐廳喺外國訂生蠔，點知我哋拎晒貨佢先撻訂，啲貨放喺度，要諗方法散晒佢，冇理由租間鋪㗎，於是喺 facebook開個專頁，上載生蠔圖片同電話，畀客人外賣生蠔，主要想散貨所以定價比市價低，點知好受歡迎，嗰陣先知生蠔個市場利潤唔錯，於是開始發展生蠔外賣服務。」
在創業初期 Hamish只是在原本的貨倉租了雪櫃擺放生蠔做外賣， 11年才在葵涌開店，「有地方之後，除咗生蠔仲有其他海產，好似三文魚、長腳蟹等。我仲不時搞啲開蠔班，客人上到嚟學識開蠔後，好多時會影張相放上 faceebook留念，咁會吸引到唔少人八卦吓，咁都吸到唔少客，同建立到口碑。」

Ocean Three在今個月新開了觀塘店，老闆 Hamish表示 facebook給予了一個機會令他找到商機。 

facebook： oceanthreefans：約 25,000月賺：$200,000 

客人 May喺朋友 facebook見到呢度，自己好鍾意食生蠔，試完覺得真係唔錯，𠵱家都不時上嚟幫襯，都會影相上 facebook同朋友 share。

專家點睇？

食店上載食物相上 facebook，可以增加 fans追 post興趣。 

facebook宣傳唔 hard sell
Jack表示 facebook可以達到平面及電視廣告做不到的效果，「 facebook本身係一個社交網站，原意係畀朋友互相分享近況，當朋友分享去到一間好好食嘅餐廳或者買到一件靚衫嘅時候，個訊息可信度就會高咗，唔會有廣告 hard sell嘅感覺。仲有同一個朋友圈子，年齡、收入、興趣及家庭狀況等都比較近似，當分享一個活動嘅時候，好大機會畀到同樣有興趣嘅人睇到，咁個宣傳效果就好大。」

要揀時段出 post
除了要定時留言和更新專頁上的資訊外， Jack建議發布訊息時附加一些短片，宣傳效果會更好，「有片同圖會比純文字嘅 post吸引到更多人嘅注意，所以出 post最好附上圖片，據我哋統計，最多人瀏覽 facebook嘅時段喺早上返工、 lunch time同晚上 9至 10點呢幾個時段，揀呢啲時間出 post會收到更好嘅宣傳作用。」

Case3： promoted post加強宣傳

10年在旺角銀城廣場以小本 3萬元開設自助狗零食店「狗餅物語」的 Yanki，便用 facebook宣傳，吸引到不少愛狗人士注意，在今年 1月 Yanki更在旺角花園街的舊樓開了間狗 cafe，因樓上鋪的關係，宣傳成了一大困難，而 Yanki就想到再次利用 facebook，令 cafe現時已達至收支平衡。
「初時真係冇人上嚟 cafe，有喺街度擺易拉架，但上嚟嘅客人唔多，見之前喺 facebook推出購物優惠有效，我就再推 cafe優惠，好似成為 fans再 like個 post同 share畀朋友，就可以優惠價食二人餐。但 cafe優惠推出後反應麻麻，之後我就花咗$30推 promoted post，可以畀 2萬 7千人睇到，反應真係熱烈啲，不過唔會個個 post都咁做。」現時透過 facebook宣傳，狗 cafe已經由蝕變成收支平衡，而「狗餅物語」則有約 6萬盈利。

Yanki對於管理 facebook專頁十分上心，盡量與粉絲進行多些交流。 

facebook：狗餅物語fans：約 4,000月賺：$60,000 

上載資訊與 fans互動

不時更新 facebook狀況的 Yanki，像最近自製寵物糉時，將製作過程上載，應節之餘又起到宣傳作用。 

除了一些產品優惠外， Yanki亦上載可愛的寵物照片和有關寵物護理的資訊，「每日都會更新資訊，但唔會更新得太密， 1日 2至 3個 post，驚太多嘅話啲人會覺得太煩 unlike咗佢。端午節我就分享自製狗食，盡量同 fans互動，多咗話題性嘅 post，專頁都會多咗人 like。」

專家點睇？

為提高曝光率， Yanki選用 promoted post，只需花數十元已增加可瀏覽人數。 

唔怕洗 fans版
可能大多用家會以為發布了訊息，所有 fans都會看到，其實不然， Jack解釋：「𠵱家喺 facebook專頁出 post，唔會喺所有粉絲嘅動態消息內出現，會因應粉絲人數計算比例，數萬 fans嘅專頁出 post只有約 10%至 16%嘅粉絲睇到，而幾百萬 fans嘅專頁，就只有約 2%嘅 fans睇到。咁樣 fans嘅頁面唔會出現晒同一個專頁嘅 post，你不斷出 post，都唔會洗到粉絲嘅版。」

建議用 promoted post
Jack建議商戶在 facebook宣傳，可以選用 promoted post功能，因為價錢相對平面及電視平，但接觸到的人數相對較多。「可以選擇將個 promoted post出現喺 like你嘅 fans或者其朋友嘅動態消息上，價錢由幾十蚊至幾萬蚊都有，視乎用家自己選擇用幾多錢去推 post，愈多錢當然有愈多人可以睇到，好似 Yanki用$30便可以畀 2萬幾人睇到個 post。喺用呢個功能嘅時候，可以揀啲已經幾多人討論或者 like嘅 post，吸引更多人參與討論，咁就更多人留意到你嘅專頁啦。」

醒多你兩招

1.現時網上出了不少收費系統 apps，用戶可直接將 apps加插在 facebook專頁上，讓客戶可直接在網上付費，做交易更加方便。

2.出 post時我們可以選擇目標發布，如性別、年齡、地區等，從而令更多的理想目標用戶可以看到。

Facebook行銷有得讀

Mobile Marketing完全行銷術
機構︰ fMarketing
對象︰有興趣人士
學費︰$800
堂數︰兩堂、共 8小時
內容︰ facebook推廣及管理方法、使用者習慣剖析、行銷個案分享及設置商貿平台應注意的技巧等。
日期： 7月
查詢： 3111 6899

撰文：曾志恒
攝影：傅新發、彭自維
部分圖片由被訪者提供