Diana笑言超力是其「兄弟」，自出娘胎已密不可分，雖然曾經想過放棄，但為 daddy便充滿動力。 

青雲路

超力第二代 莫傑琳 力保父親心血

「超……力力力力……」這個經典的即食米粉廣告，有個超人飛出來叫着「超力」，老土得來又夠 hard sell，是不少 7、 80後的集體回憶。
超力是本土的品牌，更是品牌第二代「超力妹」莫傑琳（ Diana）口中的「兄弟」，為了它， Diana耗盡 10年時間，加入不同產品，又取得米牌，強攻批發生意，成功將公司轉虧為盈，令生意翻了 3翻，營業額年逾 3億元，如此拚命，只為保住父親的畢生心血。

生於 7、 80年代的香港人，一定對超力廣告充滿印象，當中那句對白「超……力力力力……」堪稱經典，最近廣告又在電台重播，令人驚喜又回味，內容雖然老土，卻又夠晒入腦，記者一開口讚， Diana即大笑幾聲，「哈哈哈！個廣告係我 daddy同廣告公司度出嚟㗎，搞到我細個成日俾人笑。」這個集體回憶，對於小時候的 Diana來說，卻是「瘀事」一樁，「當時我讀緊小學，喺學校走廊行過，就會聽到同學仔喺我後面嗌呢句對白，好鬼瘀。」
查實「超力」這個寶號，背後有段故，因創辦人莫國安做假髮起家，假髮最重要超級夠力，可以黐住頭部，「後嚟 daddy轉喺泰國設廠造米粉，就用番呢個名。」超力在 1972年成立，是本地品牌，大部分茶餐廳的米粉均是它出品，但超力曾經沉寂一時。
96年，莫國安自覺讀書不多，希望籌集更多資源搞好超力，因此把 6成股份賣給一間大財團，想不到賣股 3年後，便被迫出局，直至 01年， Diana才買回股份，重掌超力。「嗰時超力成盤散沙咁，幾年間由賺變蝕，成盤數都係紅色，新股東都做到冇癮，所以畀我哋買番啲股。」
這些年，新股東把超力當作大企業般營運，員工全部坐在 office遙控，連前線 sale也沒有落鋪見客，「我哋做米粉好似打爛仔交咁，唔埋身點 sell到客，啲客就係咁流失。」

父親莫國安自小已栽培 Diana做接班人，父女曾經關係疏離，如今卻感情深厚。「我唔畀 daddy退休，一有咩重要決定，都會知會佢。」 

超力於 72年成立，當年已是米粉業的龍頭，創辦人莫國安舉行春茗，不少客人也有出席。 

跑街汲取工作經驗

Diana要重整公司，先由自己做起，太子女日日親自去茶餐廳，跑街 sell客，「我唔跑過，唔會知道客人想要乜，亦唔知同事 sell客嘅難處。」她又對員工要求嚴謹，令整個 sale部門集體辭職，流失不少客源，「嗰排都好驚，會問自己係咪做錯，好彩 daddy淨係講，唔啱咪請過批新囉。」捱過一段真空期，最後請到理念相同的員工，塞翁失馬、焉知非福。
那時候資金不足， Diana寧把資源投放在批發上，縮減零售版圖。「超市嘅費用太高，又要上架又要拆佣，仲要大量宣傳，花 200萬做電視廣告宣傳，唔夠 1個星期已經用完，不如將資源用喺批發上，谷大個生意額。」以往只得米粉，競爭力不大，於是開始引入其他產品，如烏冬、魚餅等，到 03年政府開放米牌，更取得牌照賣米，「我哋米粉一箱先賣廿幾蚊，計埋運費，賺得好少，但米賣得貴啲，貨量又多，可以減低我哋嘅成本，收入自然增加。」

銀絲米粉是超力的經典產品，金牌原味每包$4.1。 

近年不斷推出不同口味的即食米粉，泰米粉每包$3.4。 

超力自 03年起賣米，只做批發，貨源來自日本、越南、泰國等地。 

賣米新手頻頻碰釘

客人覺得米與米粉同類，因此對超力賣米非常受落，但 Diana對米卻是新手，「我哋交咗唔少學費㗎！」快人快語的 Diana不只一次說，回想初賣米，找不到好的供應商，買來夾雜煙頭、石碎的越南米，結果數十噸米就此報銷，「後來先搵到好嘅供應商，入番啲有質素嘅米，同埋我哋買入米機，再篩過啲米先畀客人。」
又因為不知新米、舊米分別，經常被客人投訴，「啲客打嚟話我哋嘅米煮出嚟好爛，先知原來要溝舊米，至會軟硬適中，客人覺得我哋賣米，一定係呢方面嘅專家，我哋惟有慢慢摸索，仲要因應要求，教番佢哋點煮飯。」
她又曾嘗試改變米粉，卻惹來投訴連連，「試過為咗方便生產，將米粉由正方變圓形，點知不停收到電話，問我哋係咪俾人翻版。」原來銀絲米粉已在客人心中植根，不能有絲毫改變，「不過都值得開心，證明啲客好錫我哋，仲好記得我哋產品。」

近年不斷加入新產品，如熊井讚岐急凍烏冬$33。 

熊井日式圓葱魚餅$28.5。 

重新拓展零售市場

憑藉多年努力，超力再度轉虧為盈，生意已翻了 3翻，每年生意額逾 3億，最近對手「統一」被收購， Diana重整旗鼓，想再拓展零售市場，吸納埋對方的客戶，「其實我哋仲有做零售，只係冇乜宣傳，比較低調。」低調得幾乎令人遺忘，只靠每年美食展，喚醒港人記憶，「我將宣傳資金投放喺美食展，寧願整靚個展位，畀人見到，超力仲喺度，不過都試過聽到啲客講，話乜你哋仲未執㗎咩？講真，我最驚 daddy聽到唔開心。」
說到 daddy， Diana又敬又怕，自小， Diana已被爸爸視為接班人，對她尤其嚴格，「一唔啱就會鬧。」在澳洲留學時，她想選讀化學，即被爸爸越洋電話炮轟； 96年畢業後便要回港打理生意，磨擦漸多，當年一個後生女走遍歐洲搞出口生意，不管多累、多辛苦，還要被爸爸迫着交數，「佢一打電話嚟，劈頭就問我今日跑到幾多個客？」曾經有一段時間，關係疏離。為了逃離爸爸掌管， 27歲便結婚，「就係想快啲搬出去住。」

客人海港酒家負責人栢哥傳統酒家整焗龍蝦其實用煎米米粉做底，超力嘅米粉韌度剛好唔易斷，又唔會糊口。 

Office經常飄來陣陣香味， Diana表示同事每日也要煮米粉試味，自己也經常食埋一份。 

成為母親了解父心

Diana每年也參加美食展，藉此宣傳，更會投放大量資金整靚展位，以證明超力在行內仍然有地位。 

父女畢竟沒有隔夜仇，見爸爸被迫離開一手創辦的超力，又為公司走下坡而難過， Diana怎會忍心？於是多麼辛苦也要重奪超力， 4年前生了女兒，升呢做了母親，更明白父母的苦心，「佢對我嚴，都係想將畢生經驗傳授畀我。」
Diana果然沒辜負爸爸期望，現時超力產品不但進佔全港大部分茶餐廳，更打入連鎖快餐集團、會所、幼稚園和老人園等，客戶單位達 6千個；零售方面，除了兩大超市外，又在 city'super及佳寶等上架，「將來除咗想再入多啲新產品，亦想喺零售方面再做好啲，投放多啲資源落去，令大家再次記起超力。」

後記：每日食超力

Diana笑言自小家中沒有其他牌子的食物，日日也吃超力米粉，就連到外國讀書，父母也會寄米粉給她。 

Diana童年離不開超力，每天都吃超力米粉，「連同學仔嚟我屋企玩，都食米粉，佢哋會忍唔住問，有冇其他嘢食㗎？」她一出生，就與超力繫上不解結，彷彿一生都要揹上責任，「我個女𠵱家都日日食超力產品，今朝早先食咗超力嘅烏冬。」
還以為 Diana跟父親一樣，想找女兒繼承生意，可是她與記者談到湊女經時，卻說：「佢讀緊蒙特梭里嘅學校，我想由佢自由發展，將來開開心心！」女兒不用步上 Diana的後塵，要背負上一代的夢想，實在需要太多代價。

點入行做 marketing？

不論大小公司都需要 marketing部門，工種甚多，要涉獵到宣傳、推廣方面， Diana亦是由這個崗位做起，「做 marketing工作要好了解客人同市場需要，亦要夠健談同有耐性同客人溝通，仲要度橋諗方法宣傳，工作範疇都幾廣。」一般公司聘請 marketing，會由 assistant做起，起薪點約 9千至 1萬，之後可一路晉升至 manager等職位。

晉升階梯

Marketing Manager（ 6年或以上經驗）
約$20,000至$30,000

Senior Marketing Executive（ 4年或以上經驗）
約$13,000至$20,000

Marketing Executive（ 1年或以上經驗）
約$10,000至$13,000

Marketing Assistant
$9,000起

撰文：洪芳俠
攝影：傅新發
部分圖片由被訪者提供