真面目

好抵睇　通頂死頂 200分鐘　 SJ爆肌反串

韓國男子天團 Super Junior（ SJ），成軍 8年， 09年曾來香港開演唱會「 SUPER SHOW 2」。事隔 4年，上週六（ 15日）終於聯同 SJ-M兩位成員，再來港開騷，一連兩晚喺亞洲博覽館舉行「 SUPER SHOW 5」演唱會。開騷冇耐，隊員圭賢爆之前一晚全隊人通頂拍 MV，冇瞓過覺，但 10位成員一樣叉足電，由頭 high到尾，首場更唱足跳足近 200分鐘。
開場唱咗幾首歌後，一向最叻冧女嘅 SJ即刻大晒廣東話：「大家好，我哋係 Super Junior！」晟敏仲話等咗呢日好耐，全場歌迷當然叫到失聲啦。去到尾段高潮位，最靚仔嘅始源仲同跳舞至勁嘅銀赫鬥剝衫騷肌。始源曾自爆有 fans叫佢唔好再剝衫，但始源唔理照剝，識中文嘅佢唔通想挑戰家輝叔？

人魚始源

《 Super Show 5》中，當然以最靚仔始源最冧港女，佢先用廣東話話：「大家好，我係崔始源。」跟住轉國語：「很久沒有在香港開演唱會……。」最後再用英文：「 God bless you all…… Thank you so much!」尾段佢仲忽然除衫，大晒 8嚿朱古力腹肌同靚爆「人魚線」，全場粉絲叫到收唔到聲。

大「 S」銀赫

跳舞最勁嘅銀赫亦唔執輸，用唔鹹唔淡廣東話：「大家好，我係銀赫，大家鍾唔鍾意我哋？」之後自動波剝埋上衫露「 S」形線條，你睇台下班粉絲影得幾開心！

變身索女

SJ騷出名多視覺享受，除咗唱歌跳舞，佢哋仲鍾意扮鬼扮馬。今次中場，竟然大玩易服。強仁扮粗腰佳人、始源扮孫丹菲、厲旭扮 SES、晟敏扮泫雅，齊齊姣爆摸大髀唱 SISTAR嘅〈 Alone〉，全場笑到碌地。而晟敏仲因扮得太投入，露底走光，至正係佢！

潮玩 cosplay

由於隊長利特同藝聲正服兵役，所以今次 SJ就搵咗 SJ-M嘅中國成員 Henry同周覓補位。演唱會中段， SJ大玩 cosplay， Henry先扮《龍珠》裏面嘅悟空。銀赫就 update啲，黐晒鬚扮「狼人」，佢仲用「狼爪」幫隊員梳頭，笑爆嘴。


銀赫 

Henry 

晟敏趷籮

姣開有條路，晟敏扮完女人後又擺出趷籮甫士晒月光，始源笑到踎低咗！

英文都掂

 


尾場開騷前， SJ舉行記招，圭賢用廣東話講：「大家好，大家係我嘅心肝寶貝……開開心心！」一於冧到底。 

除韓文歌，當中 4名隊員（左起）厲旭、圭賢、周覓及晟敏用英文唱出 Michael Bolton名曲〈 How Am I Supposed To Live Without You〉，證明佢哋嘅英文有番咁上下。 

採訪、撰文：娛樂組
攝影：攝影組 

arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄