我要「平」反！(設計對白)路透社圖片 

電訊型科

平面革命 iOS 7得有道理

新一屆 AKB48總選舉，平胸兼冇樣貌嘅指原莉乃，竟然打敗性感代表大島優子同少男殺手渡邊麻友、上位做一姐；有人話佢影衰 AKB48、有人話時代要變、新人事新作風先至好！
喂，乜咁啱呀！上星期 6月 11日舉行嘅 WWDC 2013軟件製作人技術交流會上， iPhone全新系統 iOS 7放棄 6年來嘅介面，改以 2D簡潔線條同鮮艷顏色幾何圖案為本嘅 flat design風格，呢次改朝換代同樣係口碑好壞參半，被唔少老 fans插到體無完膚、批評係「反抄 Android」、「冇晒 iPhone風格」，究竟呢次平面革命有冇錯？

指原莉乃：我很平但我有性格！(設計對白) 

高層反面　 icon變平面

iOS同 OSX係由 SJ兩位愛將 Scott Forstall和 John Browett一手設計， Scott向來推崇擬真設計（ skeuomorphism），時鐘 app要似舊式行針鐘、電話簿要似一本簿，以求增加軟件的親切感。有傳 Tim Cook同 Scott因地圖 app出事單嘢互卸責任，最終 Scott同 John雙雙離職， iOS7改由管理產品設計的 Jonathan Ive接手，佢提倡清簡平面化設計（ flat design）先係新出路，原本個 concept係好清晰，但出嚟又真係冇咗舊 OS嗰種高貴感覺，睇落好似 Symbian同 Android呢類中價機作業系統，難怪果粉會覺得太 young太玩具。
跟 iPhone、 Android雙系統用齊的阿奴傾開 iOS7，佢話今次改版令佢有當初接觸第一代 iphone介面時的興奮同震撼，佢仲話：「雖然用法有少少似 Android，但我覺得 IOS7真係靚好多囉！」唔知將來兩個平台又使唔使因為抄襲打官司，但不得不同意 Apple設計真係最好！但 Apple自推出 iPad Mini後已走向大眾化市場，改介面吸引年輕用家真係唔奇，希望正式推出後用家能慢慢接受啦！

Jonathan Ive一樣係 Steve Jobs愛將，枱燈 Mac機就係出自佢手筆。 Fans冇怪佢，反而係怪 Tim Cook迫走班軟件高手，搵個硬件設計師去搞 OS。 

有網友提到顏色鮮艷的 iOS7係為將來推出多色、平價版 iPhone鋪路，仲 PS埋想像圖， iOS7果然跟彩色手機好襯！(網上設計圖片) 

（ iOS7將於 2013年秋季推出，免費更新，可運行於 iPhone 4及其後代、 iPod touch 16GB/32GB/64GB、 iPad 2及其後代。）

icon比比看

有冇醜咗係見仁見智，但新 icon真係平面化咗好多，拍埋睇就一目了然。

新設定：變得好勁，啲齒輪唔同晒樣。 

舊 

Safari：會唔會同指南針搞亂呢？


相機：由鏡頭變成一部 DC剪影。 


相簿：唔再係太陽花，而係扮某隻噴油 logo。 


App store：搵食靠佢，唔敢大改。


音樂：冇晒漸變，紅底襯反白音符幾突出。 

用家意見

麥兄　插畫家/iPhone用家
要時間習慣
用咗咁多年、大改都正常，睇落有 Apple風格唔覺得 cheap。新相簿、相機 icon可愛咗，以前朵太陽花太過似 windows個範例圖片。新功能喜歡相簿嘅分 folder同 AirDrop分享。（影相真係女用家最着緊同用得最多嘅功能。）

Dennis　資深 Mac友
樣醜功能正
已將 iOS7裝入 iPod touch試過，真係唔鍾意個新介面設計， icon冇陰影，太 flat，公仔亦表達唔到係乜 app，字體都唔靚。但幾滿意功能同操作，控制中心好實用， Safari無限 tab夠方便， multi-task睇到 app介面都好用好多，不過應該幾食 RAM。

7仔新功能

今次 iOS 7絕對唔係單單改樣，仲有以下多種新功能，最吸引本來係「 iTunes Radio」免費音樂串流，可惜只服務美國用家，香港未有得玩！

彈出控制中心

新介面可以從熒幕底部向上「撩」個控制清單出嚟，入面可以 set WiFi、藍牙等常用設定，似足 Android，不過好用嘅嘢真係唔怕抄！

真正多工模式

Multi-tasking新介面能顯示、保留、回復 app早前使用時之位置同狀態。 Apple強調其同步多工比 Android機慳電，且能用 sliding快速關閉。

上網 3D標籤

Safari新增 3D標籤瀏覽功能，方便你同時打開多個網頁視窗切換，仲要無限量任 tab。

AirDrop空中過相

睇 S4廣告，班友要用同款手機，背對背貼住嚟用 NFC過相， AirDrop簡單得多，大家都係用 iOS或者 Mac機的話，開 WiFi就可以互傳相片 file。

新相機相簿

全新 iPhone相機，只需要喺快門掣左右 slide就可以快速切換錄影/硬照/全景照同全新嘅 filter等 4個功能。新相簿除簡化介面，提供以時間、 GPS地標等標籤分成不同相簿，仲改到可以整個 folder打包快速 share，唔使再逐張篤喇！

最潮垃圾筒　新 Mac Pro

相比起幾款改良版 Macbook Air，更令人眼前一亮嘅係黑色圓桶形設計新 Mac Pro，因為佢飛走晒所有光碟盤，整部機光滑無縫，加上機頂有個巨型散熱口，睇落似足黑色垃圾筒。
新 Mac Pro唔只得個樣，仲加入 intel新一代 Xeon CPU、快速記憶體、雙繪圖晶片、對應 4K電視、最新 Thunderbolt 2傳輸，完全係最頂級規格。但有專業用家就驚佢機箱太細，擴充性不足，而且機價亦唔會平，究竟係想賣畀有錢潮童做擺設、定係啱 SOHO族喺屋企開工？都係等佢定咗價先啦！

（ 2013年尾推出、定價預計 2,499美元/約$20,000） 

拍埋一齊又真係幾似垃圾筒，畀我玩盡啲加個腳踏開機，扮到足。 

機殼係一塊過，向上拉走就見到所有零件，有左右共 4條 RAM槽。(美聯社圖片)

機背係 HDMI、 TB 2.0、 USB等 I/O駁口，佢冇內置空間冇法子再加裝硬碟同燒碟機，一個 10吋高黑色筒、背面拖滿 USB線，真係會好有型嗎？ 

去年奧巴馬向 Apple表示，希望其商品可以由美國製造，唔好只係貪人工平畀晒中國造，呢部 Mac Pro正是首批 made in USA的蘋果電腦商品。 

MBA電量大增

今次新 MBA機身設計冇任何改變，睇足 3年有少少悶，而且個芒冇改良，比唔少 1080p解像度的 PC Notebook更脫節，好在改用全新 Haswell架構硬件，令電量更足，宣稱可用 9小時（ 11吋）至 12小時（ 13吋），新用家買得過、舊玩家又想唔想升級呢？

兩款芒分別係 11.6吋（ 1,366× 768 dpi） 128GB$7,688、 256GB$9,188、 13.3吋（ 1,440× 900 dpi） 128GB$8,488、 256GB$9,988。 

同日仲有新 OS X版本 Mavericks公布，新增 200多種功能，會導入更完善的 Mac版地圖、 iBooks，改良 iOS支援、硬件對應、節電。（一般使用者版本於 2013年秋季推出） 

奴 COMMENT

最愛 Mac Pro有新意
現在世界各廠商的電腦外形都大同小異，已很久沒有能配得上「劃時代」三個字來形容的新產品。謝謝蘋果推出了這部 Mac Pro，大家終於可以再用這個形容詞了。你知這部 Mac Pro強勁的地方在哪嗎？超高速運作，以圓桶中心散熱，以上都勁！但真正厲害是連不需要用電腦的人，也想擁有一部呀！ 2013年，終於有真正的新嘢玩！

撰文：鍾世傑