《盲探》擺明車馬係偵探片，劉華同女警 Sammi都喺查案過程中暗生情愫。雖然途中險象環生，細細聲話你聽，緊張過後都係 happy ending嘅！
真面目
鐵三角 盲撐 Sammi 蒙眼劉華玩煮飯仔
今年夏天，有兩個劉華！
六月率先上畫，「特工劉華」(《天機•富春山居圖》)俾劇本同女主角林志玲所累，全民喪插，想挽回英名，可能要等下個月 4日《盲探》上畫，八年一遇同杜琪峯、鄭秀文嘅鐵三角陣容。
電影作品過百套，原來劉華都係第一次扮盲，為扮盲入戲，劉華上足年半堂，蒙住眼跑埋樓梯煮埋飯體驗盲人生活，咁辛苦都係為配合杜 Sir捧 Sammi做影后，呢啲咪最佳拍檔囉！
黑媽媽煎魚
雖然為就劉華期、 Sammi又突然耳水不平衡搞到要停工兩個月，一波三折嘅《盲探》去年 9月至開工，不過劇本一早完成、男主角亦一早落實人選，所以始自 11年初，勤力過牛嘅劉華已經定期返盲人學校上堂，專人指導由行路、食飯、認字開始，從頭學習做盲人。
唔只上堂努力，落堂後劉華仲有功課做，自發烹飪盲人飯：「我試過返屋企熄晒燈、蒙住眼煮咗餐飯，炒埋菜、煎埋魚添。要親身嘗試，先至知冇咗對眼幾唔方便，同埋點樣靠其他感官，好似味覺同嗅覺嚟感受啲菜同魚到底熟未。嗰餐飯最後結果係……都食得落口嘅。」劉華咁肯講家居生活，都算破天荒。
雖然拍攝電影用唔着，劉華喺香港盲人中心學足半年，都學識 26個英文字母和好多中文盲人凸字，勁敬業！ 
劉華為咗體驗盲人生活，仲自己返屋企摸黑玩煮飯仔，煲飯切菜落鑊煎魚上碟，全程蒙眼仲自稱食得落口。 
年半以來一有時間就上香港盲人中心向專人求學，劉華話最難忘係開晒眼同盲人導師鬥跑五層樓梯，竟然跑輸。
無敵友誼波
《盲探》劇情係話意外失明嘅神探劉華帶住女警 Sammi一齊查案，尋找陳年失蹤少女秘密。唔只係入行以嚟第一次做盲人，劉華角色仲衰衰格格搵人笨，經常老點 Sammi做跑腿。
雖然係女主角，上山落水揸車玩槍幾乎所有動作戲都落喺 Sammi一個身上：「相比起上次合作已經隔咗八年，不過我同華仔合作得仲流暢仲開心，因為互相信任，互動起來就更加夠膽更加用力。我覺得我哋兩個好似打波隊友咁，我交個波畀佢，佢可以用好適當嘅力度打返嚟，咁樣拍出嚟嘅戲，一定又好玩又好睇。」劉華同 Sammi玩到男女混雙咁又默契，吸引力確係多過林志玲好多嘅！
週日(16日)，《盲探》班底齊頭現身上海國際電影節，杜琪峯明撐 Sammi一早係心目中影后：「《龍鳳鬥》香港電影金像獎沒有把影后給鄭秀文，我氣了十年！」 
《盲探》華仔係失明警界前輩輔助 Sammi查案，無論動作場面定心理重頭戲大多落在 Sammi身上，難怪有報道指杜 Sir今次明捧 Sammi做影后。 
聽晒劉華話投入受害者角色查案，在《盲探》中狂換三十個造型， Sammi話最難係身為哮喘患者要煙駁煙。
鬧自己
有特工劉華配搭「華女郎」林志玲、張靜初，有動作有激情有神偷仲玩埋 3D，《天機•富春山居圖》就被強國影評、觀眾評為年度爛片。 
天機內地上畫首日已經狂收四千五百萬，不過個個睇完都鬧。 
採訪、撰文：娛樂組
留言列表
