兩個城大仔膽粗粗去台灣環島，咪以為佢哋踩單車好叻，譚嘉傑就話：「我住沙田屋企有單車，不過唔係成日踩，咁啱有單車鋪贊助我哋，我哋先有架 pro.啲嘅單車咋！」黃英傑城大資訊系統學系 Yr.3(左)譚嘉傑城大中文系副學士 Yr.1(右) 

U Spy

城大仔念亡母環台踩車籌款

畢業旅行（ Grad Trip）係大學生指定動作，不過 spy八到城大有兩個劍擊隊嘅猛男唔係齋玩咁簡單，喺 18日嘅環島單車之旅中，除咗約其他台灣大學做劍擊交流之外，最主要係透過踩單車為台灣癌症基金籌款，佢哋除咗每踩一公里自捐一蚊外，仲搵埋大學同中學籌款支持佢哋，暫時兩人已經籌到 2萬 6千多元！

發起呢次「載夢騎行」台灣環島單車活動嘅譚嘉傑（ Bone）同 spy講，「我同黃英傑（另一成員）係大學劍擊隊隊友，我哋想喺畢業前一齊做啲熱血嘅事，而近排我媽咪因為癌症過咗身，我哋想為佢做番啲嘢，所以 6月 1日就起行去咗台灣環島，將籌到嘅錢捐畀香港癌症基金會，希望出一分力幫吓病患者。」
2人現仍在台灣努力中，到本月 18日先回程，希望佢善款愈嚟愈多啦！

死頂踩 18日

對一般人嚟講踩足 18日認真唔容易，好彩佢哋係劍擊隊平時有操開，「我哋都要唞㗎，頭幾日唔慣，返到酒店要狂搽按摩膏先頂到！」

勁操體能

為咗有體力應付呢 18日嘅車程，兩個一於做好準備去 gym房操 fit自己， Bone話：「環島預咗要日曬雨淋，上斜落斜體力消耗得好快，唔操 fit啲一定應付唔到！」

U Spy：

校園至爆猛料， U Spy一定睇實。

撰文： U Spy