FBI
鬼鼠遊銀座 何傲芝買$4,000袋蕭正楠碌咭
蕭正楠同何傲芝自前年傳出拍拖後，二人一直收收埋埋，最近仲有傳何父因嫌蕭正楠窮，反對兩人交往，所以佢哋拍拖都要偷偷摸摸。
喺香港唔敢光明正大，惟有去外地大解放。上週六（ 15日）， FBI老死就喺東京撞到蕭正楠同埋何傲芝拍拖濕平。當晚，兩人室內都戴黑超，孖住喺東京銀座掃名牌貨，其間手上已有兩袋戰利品嘅何傲芝，入咗老牌百貨公司松屋專攻日牌手袋，而蕭正楠就一直陪住佢行，仲喺旁邊畀意見，最後傲芝睇中一個價值港幣 4千幾蚊、好多翻版嘅日本名牌 Issey Miyake手袋，一直齋睇冇幫襯嘅蕭正楠，見女友勁鍾意個袋，即刻碌咭畀錢。日圓雖然升返上 8算 2，但 4千幾蚊一個袋，對上緊位嘅蕭正楠嚟講唔貴。𠵱家唔買，行多兩間女友睇中個 2萬蚊嘅仲大鑊啦！
前年 3月傳出拍拖後，二人一直低調拍拖，上年就被影到佢哋喺尖沙咀海港城行書店，男嘅戴帽，女嘅戴超。其實又唔係偶像派，使唔使咁驚先？ 
曾經傳過何傲芝老豆嫌蕭正楠窮，最近蕭正楠即刻搏命搵錢，去日本前一日即上週五（ 14日），蕭正楠仲喺韶關嘅新地名店酒吧唱夜場騷。雖然品流複雜，但最緊要賺多啲錢威畀傲芝老豆睇。 
喺《巾幗梟雄之諜血長天》內，蕭正楠做「男二」，仲會喺戲中強姦胡杏兒。 FBI聽聞佢戲分同「男一」黎耀祥差唔多，角色仲好搶。 
前年拍《法證先鋒 III》時，蕭正楠曾傳出力追同劇拍檔陳茵媺同陳豪拗手瓜，最後當然係陳豪爭贏，上週二（ 11日）仲喺巴黎結埋婚。蕭正楠即時喺微博祝賀話：「 So happy for you!!」好有風度。 
撰文、攝影： FBI
全站熱搜
留言列表
