Webber

我毒！但好笑　薑檸樂

香港互聯網創作及藝人協會班 YouTuber入面，薑檸樂算係最低調嘅一個，甚少被傳媒訪問，但偏偏 subscribers人數名列前茅。
訪問時見佢勁木訥，問一句答半句，但偏偏佢經常喺 YouTube自拍搞笑片，仲會妙語連珠，贏得過千萬 hit rate。
一身冬菇頭粗框眼鏡毒男 look，連自己都承認唔靚仔，但偏偏勁多網民 like佢。做網絡紅人，唔一定要靠樣！

Webber's Profile
薑檸樂

年齡： 24
職業：待業
拍片資歷：約 2年
YouTube Channel： gingerlemoncola
作品數量： 90（只計自己 channel，另有大量合拍片由他人發布。）
總 hit rate：超過 1,091萬
Subscribers：超過 81,000

點解會做 YouTuber？

個人最高點擊率作品係改編《多啦 A夢》主題曲寸爆亞視嘅〈亞視主題曲〉，共有逾 81萬 hit rate，亦係佢最成功嘅改編歌詞。 

我之前做會計，但其實一路好想做填詞人，先至會開 YouTube Channel，搵人唱我啲改編歌詞，再放片上 YouTube，跟住連工都辭埋。後來拍埋搞笑片，無非係想引人睇我啲詞，點知啲人鍾意睇我拍片多過聽我填詞；而我又識落一班識作歌嘅網絡歌手，嚟緊會搵佢哋合作寫原創歌，希望做到正式填詞人。

你覺得自己靚唔靚仔？點解會親自出鏡拍片？

加入咗香港互聯網創作及藝人協會，第一次出鏡就係客串佢哋個 MV。近排佢哋再有新歌〈隨街也是網絡人〉，薑檸樂都唱咗一句，但佢話自己唱歌難聽，個人作品唔會唱。 

以前靚仔啲．．．．．． 11年香港互聯網創作及藝人協會班 YouTuber拍《而我不知道呢班友是誰》個 MV時，佢哋叫我最後客串一個鏡頭，嗰次係我第一次出鏡。其實我一直好想出鏡㗎！之後無無聊聊自己做主角拍搞笑片，啲人又鍾意睇，咪繼續 keep住拍囉！

啲 viewer話你係毒男，你認唔認？

薑檸樂嘅毒男形象勁深入民心，連女子組合 As One嘅唱片公司都搵佢編導同主演微電影《毒男溝女記》，又有 31萬 hit rate落袋。 

應該係我之前留冬菇頭再加粗框眼鏡，第一次出鏡啲人就話我毒，但我覺得太膚淺喇！其實我冇一般毒男嗜好，即係睇動漫、迷 AKB48嗰啲，我全部都唔好。不過話我高登仔我就認，我有高登 a/c，雖然有成年冇出過 post，但有上去，上面啲人成日話我啲片唔好笑，話我低級趣味！

你覺得自己啲片係咪好好笑？點解會紅？

佢仲紅到俾 Snickers睇中，請過佢同另外兩個網絡紅人司徒夾帶同 HayHay合拍網上宣傳片。佢話不嬲都會同其他 YouTuber合作，試多啲唔同嘅嘢。 

好唔好笑呀？一時時啦，有啲片真係幾無聊，好似有個系列叫《退休生活》，求其拍吓我踢波、行山，啲人又會睇喎！算唔算紅呀？算啩。我諗係因為我個毒男 image好笑， YouTuber靚仔又有、唱歌好又有，但就冇人甘心做毒男，可能憑呢個人物設定我先跑出。

〈 Webber〉，每星期專訪一位網絡紅人，每星期展示一種網絡力量。

撰文：陳兆奇
攝影：彭自維