近年不少「星二代」入行，黃日華亦與現年二十三歲的校花女兒黃芷晴加入香港電視（HKTV），以「父女檔」形式替芷晴響頭炮。最近忙於拍劇及宣傳電影的黃日華，雖然豬籠入水，卻繼續在平靚正的九龍城出口店置裝，認真慳家。有見及此，修讀設計的芷晴即趁父親節前夕四出搜羅禮物，更專攻潮tee及時款波boots，務求將衣着平實的爹哋打造成「潮爸」！

行足三小時，芷晴終於在猿人tee店覓得心水禮物，扑槌購入一件潮爆的恤衫給爸爸黃日華。

黃日華絕不反對女兒入行，更常常一家三口出席活動。

專攻出口店

黃日華去年簽約王維基旗下香港電視後，即拉攏剛大學畢業的女兒黃芷晴加盟，父女檔演出劇集《開腦儆探》，為女兒打開演藝之門，他說：「我同個女講，如果佢真係鍾意做演員，入娛樂圈嘅第一步，我一定會幫佢，但以後就要靠自己。」難怪黃日華一直以身作則，教導芷晴要有演員道德，私底下亦貫徹低調及慳家作風，希望乖女腳踏實地。

日前下午四時許，正趕拍《歲月樓情》的黃日華以人字拖街坊裝現身九龍城，他先與助手到茶餐廳醫肚，再殺落附近一間時裝出口店。雖然身為大明星，但黃日華懶理店舖門口貼滿「結束清貨」等大字報，施施然挑選各式T恤，更對一件價值六十元的平民tee情有獨鍾，臨行前一睇再睇，可惜睇足半小時仍空手而回。知慳識儉的他，平治房車只泊在咪表位，慳得一蚊得一蚊！

早前黃日華到九龍城出口店睇平價衫睇足半小時，令助手在門外呆等。