Sunny年多前毅然辭去記者工作，「做記者令我見識咗好多嘢，不過我份人鍾意冒險，一直都想試吓創意。」 

創業通

本土拖鞋 sell旅遊 feel　衝出香港

辭掉工作去旅行、去創業，是不少人的夢想，但不是人人有這個膽量，但 80後 Sunny卻做到了，為了他的創業夢，年多前毅然放棄記者工作，本想搞貿易生意，卻無意間想到出品自家設計拖鞋，結果 1年間，不但在香港設立了 13個分銷點，更批發到美國、台灣等地，半年即翻本，年賣逾千對拖鞋，月賺 3萬元。

今年貿易展，美國公司借來 ICE DREAM拖鞋，讓 model行騷。 

最近在 facebook，看到不少朋友 like了一個名為 ICE DREAM的店子，該版面差不多天天會上載新的旅遊相片，漸漸吸引到記者注意，好奇登入該店，才發現原來 ICE DREAM是一個拖鞋品牌，更是香港製造。「拖鞋畀人覺得好舒服，好啱着去旅行，而且我自己又鍾意去旅行，將兩者連繫埋，應該會更加吸引。」負責人 Sunny每天上載有趣或漂亮的旅行相片，這招果然湊效， facebook在 1年間已有過萬人 like，達到極佳的宣傳效果。「台灣有個進口商，喺 facebook睇到我哋嘅產品，以網上及寄賣形式，代理埋我哋嘅鞋。」
其實 Sunny設計的拖鞋款式很簡單，只是白底、彩色帶的人字拖，共有 12款顏色，每對售$298，並不便宜，但勝在鞋底共有 2層，上層是 eva料、下層則是 PPR橡膠料，穿上腳更舒適，「我哋唔熟拖鞋嘅物料，所以搵咗個 designer幫手，大家買咗好多唔同牌子嘅拖鞋，剪開晒嚟研究，花咗 3、 4個月時間，先做到呢個設計。」

找香港廠少量生產

Sunny找了十多間香港廠，最後只有 2、 3間願意少量生產，「喺造辦過程中，一路不停改設計，原本我想每對鞋底嘅鐘形圖案指住唔同時間，但要做好多個模，成本好大，所以就改番做同一個時間。」
Sunny一心想設計舒適簡約的款式，但聽到有些朋友說設計太普通，也有一刻灰心，「不過我知道永遠冇一樣嘢係人人鍾意，如果人哋話唔靚就停，就永遠唔會成功，惟有盡量搵懂得欣賞嘅人。」
最初沒名氣，要找知音也不容易，去年 5月和拍檔投資 12萬生產了第一批貨，約共 1,000對拖鞋， Sunny為節省租金，沒有開門市，想打入連鎖店如 Nike、允記、 LOG-ON等售賣，卻不停碰釘，「 LOG-ON有約我哋會面，但就話我哋唔似 fashion brand，而且拖鞋好難發大嚟搞，雖然佢哋冇入我哋嘅拖鞋，不過都畀咗好多意見，好似話女裝好賣過男裝，我哋先開始出埋女裝款。」

拖鞋鞋底用兩層物料製造，更加舒適，共有 12種顏色選擇，售$298。 

今年貿易展，美國公司借來 ICE DREAM拖鞋，讓 model行騷。 

新產品今年推出新系列拖鞋，可讓客人調校長度，將於今年暑假推出。

拖鞋底有時鐘圖案，想令客人有留下人生足迹的感覺。 

每對拖鞋也附送布袋，令品牌形象更突出。 

四圍跑街找銷售點

連鎖店不成功， Sunny轉攻特色店鋪，每天拖着一大喼拖鞋，四圍跑街 sell客，「唔知點解，每次我一跑街就會落大雨，成日搞到好狼狽。」他走過上環、灣仔很多店鋪都不果，幸而最後位於上環太平山道的 Chum 5覺得合適，願意讓他分銷，才傾成第一間，「開咗個頭之後，條路就順好多，陸續有唔少鋪都入貨，好似 Ice Fire、香港設計廊等。」分銷點高峰期有 13間，全部不用上架費，只需將利潤分拆，由 3至 5成不等。由於投資不多，首批貨只要賣出 2成已回本，「其實開業唔夠半年，已經回晒本。」
今年 1月，他還參加貿易展，成功吸引到海外買家，「有個美國品牌專做自然同旅行風格嘅衫，佢搵咗 model行 catwalk，點知冇預備鞋，於是個買家四圍搵，覺得我哋嘅拖鞋好夾佢哋，就借咗嚟行騷。」完騷後，不但這個美國品牌找他入貨，還吸引到印度及中東的公司，雙方正在接洽中。

開業初， Sunny不時要拿着大袋拖鞋 sell客，即使現在為慳成本，也會人肉速遞到各分銷店補貨。 

客人 Kapok店老闆 Bap好鍾意 ICE DREAM嘅設計概念，同埋拖鞋鞋身比一般厚，色調配搭簡潔，着上去好舒服。 

辭工成立貿易公司

Sunny除了把拖鞋放在 Zpecial的油塘店售賣，更與對方合作出服飾。 

生意漸入佳境，但原來拖鞋只是無意間生產出來，原本 Sunny一心想搞 trading生意。自小喜愛旅行和創業的他，大學畢業後，曾到澳洲 working holiday， 08年回港後加入報社工作，主要採訪工商新聞，因工作關係，認識了不少貿易公司、中小企廠商等，「當時我有唔少人脈，覺得搞貿易應該唔難，於是辭職，諗住同朋友一齊開 trading公司。」 11年 6月，他便辭職，接洽了數間公司，取得產品後，想 sell給 city'super等連鎖店，誰知對方對非自家設計的產品不感興趣，「於是想轉軚，推出自家產品。」
沒有設計底子的他，與拍檔上廣州服飾批發市場找靈感，「睇到全部都係衫褲，太大競爭，完全冇靈感，回程時一路冇心機，頭耷耷，點知就見到有人着住對拖鞋，心諗香港好少本地拖鞋品牌，不如試吓。」 ICE DREAM拖鞋就是這樣誕生出來。

新產品美國開新店

不過由設計到生產，過程花了大半年，沒有收入， Sunny當時只好靠接採訪的 freelance維生。雖然現時生意漸穩定，但也有淡旺季，暑假高峰可月賣 4百多對，冬天銷量會減 4、 5成，現時維持每月賣約 200對拖鞋。「到咗冬天，我哋嘅分銷點都縮減咗，𠵱家香港得番 4間。」
別以為他們生意急跌，其實 Sunny正忙於推出新產品，除了第二個系列的拖鞋外，他還會與美國公司合作，於當地開設專門店，「美國公司搵咗幾個牌子一齊開門市，我哋係其中一間，不過對方想行環保概念，所有物料都要 recycle同經過測試，𠵱家我就忙緊搵新物料，預計下年就開。」
另外，他又將與香港的泳衣品牌 Zpecial合作推出衫、褲及配件等，實行由腳玩到頭，「 Zpecial係成衣工廠，本身又有自己品牌嘅泳衣，佢哋想包裝成 travel brand，覺得我哋嘅產品好配合佢哋，而我哋都想出其他產品，大家一拍即合，由佢哋出資金，我哋負責 design同 marketing，目標係今年內做好晒設計，下年暑假就推出。」別以為這些機會來得很容易，其實全靠 Sunny懂把握機會，「我哋同其他公司合作模式好 open，乜都肯去試，好似我經朋友識到 Zpecial個老闆，佢舊年 8月喺廣州展覽有幾個展位，臨尾仲有一個位剩，好急咁搵我哋，我哋都肯即刻 join，跟住大家先熟絡咗傾合作，之後大家都磨合咗幾個月。」看來，下年暑假 ICE DREAM又將邁進一大步。

為拓展海外市場， Sunny今年 1月參加貿易展，成功得到美國等地的訂單。 

Sunny把握任何參展機會，去年 8月便到廣州 4日。 

開業成本

租金：$0
入貨：$110,000
雜項：$10,000
總投資：$120,000

每月開支

租金：$1,000（元朗貨倉）
入貨：$19,000
人工：$10,000
營業額：$60,000
盈利：$30,000

ICE DREAM
網址： http://www.facebook.com/icedreamhk 

點打入 Ice Fire、香港設計廊？

想像 Sunny打入連鎖店如 Ice Fire等售賣產品，他表示最重要做足準備，「我之前都不停俾啲大牌子同連鎖店拒絕，跑咗 3個幾月街，先轉而搵細間嘅特色店合作，不過同連鎖店傾嘅過程中，都學到唔少嘢，好似我 send資料畀佢哋，佢哋會要求我畀晒價錢同全部顏色、 size等，最好有齊配套，如包裝、宣傳品，之後我哋就整理好份資料，亦會有晒包裝布袋同 poster，再同 Ice Fire傾先成功。」
另外，為了減輕對方倉存問題，分銷店每次落單，只需取 100至 200對鞋，令對方不用積存大量拖鞋在店鋪，「我哋應承會盡快補貨，盡量喺 1至 2日內，就會送貨到店鋪，咁做可以方便到店鋪，就會更樂意同我哋合作。」

撰文：洪芳俠
攝影：傅新發、黃家活
部分圖片由被訪者提供