新車激試

7人平霸吸客　 Kia Carens 2.0 LX

30幾年前政府叫年輕夫婦生 2個就夠晒數，所以當年嘅夫婦買部小房車都夠晒用。但 30幾年後嘅今日，政府又話出生率唔高，叫人生多幾個，加埋老豆老母，小房車點夠用？但 7人車郁吓都要廿幾三十萬，一般小家庭其實都幾吃力。如果 7人車車價可以做到接近小房車、廿萬樓下就掂晒！車主供樓、養仔女之餘，供車可以慳一筆，生活壓力少好多呀！但邊有廿萬樓下 7人車呢？終於有嘞！新款 KIA Carens就以$199,900上市，平通全港！小康之家留意嘞！

KIA Morning車主 Samson今日亦有試車，仲對部車好有興趣，連個仔都好想買咁喎。 

或者有人會話：「買部易手車咪得囉！大把易手 7人車 under廿萬啦！」係呀，好多易手車都平過廿萬，但你都識講係易手啦，點同新車比？而且 KIA Carens有 5年或 150,000km保養，巴閉過唔少歐洲車，加上設備齊全，非以前韓國車可比，呢廿萬畀得過！

外表大革新

筆者雖然用韓國手機同埋間中食吓泡菜，不過自問非韓國粉絲，咩 SJ、少時，我全部冇興趣，但韓國近年極速抬頭，電子產品勁之餘，連汽車都有極大改進，進步得最厲害當然係 Hyundai，而被 Hyundai羅致嘅 KIA都一樣掂，淨係睇新款 Morning同埋今次新款 Carens就知。 Carens有啲似拉長咗嘅 Morning，吸引力相當之高，而且車身用好簡單線條組成，就算你唔覺佢靚，都唔會討厭佢，天生唔係萬人迷，但一定係長青甘草。
Carens車身長 4,525mm，雖唔及大熱 Honda Stream長度達 4,570mm，但就闊 110mm、高 65mm，所以望落更肥大，而且配備 16吋合金軨，一定比現時流行嘅 17或 18吋軨更慳油、更舒適。

原裝已有煞車燈尾翼。 

尾燈如用 LED，一定更加吸引。 

車頂設有啞色金屬旅行頂架，日本車都冇。 

16吋合金軨可以有較慳油又舒適行車表現。 

設備夠吸引

買得呢類平價 7人車車主都想部車有番啲玩味同高科技感覺，揸出嚟更有話題。 Keyless系統係標準設備，而且引擎加入咗 ECO模式，可以幫手慳油。行車系統方面都有新嘢玩，軚環設有 3種模式， Comfort、 Normal及 Sport，主要係令扭軚力度改變，切換軚感。此外，原裝已有泊車鏡頭及定速系統，設備之齊全，根本已超越三十萬車價嘅日本車。

中控台有大幅黑色仿鋼琴木裝飾，有啲似 VW嘅產品。 

Keyless已經係新世代新車嘅入門設備。 

軚環上有扭軚模式切換掣（紅圈）。

原裝設有泊車鏡頭，備有距離提示。 

雖然定速系統喺香港用途唔大，但好過冇啦。 

引擎輸出達到 177匹，比所有同級日本對手都要強！ 

6速自動波設有+/-系統，可以喺軚環或波棍操作。 

豪過日本車

老實講，廿零三十萬嘅 7人車真係好難用豪華嚟形容，始終成本問題，唔可以同 Alphard一類老闆車比。 Carens賣得$199,900竟然冇揸流攤， LX版本雖未有真皮座椅，但車內空間都唔弱，中排有全平地台，而且中間位有三點式安全帶及頭枕，安全性足夠。後座方面就比較狹窄，而且座墊比較低，雙腳少不免要屈住坐，舒適性唔及 Stream。
但係 Carens車廂就吸引到年青家庭，因為小朋友初長成，加埋雙親的話，全家人分分鐘有 6-7個， Carens可以輕鬆載 5名成人，再加後座較窄載小朋友，剛剛夠用。而為咗令小家庭出外郊遊更方便舒適， Carens車內都有唔少好用設計，如首飾櫃可作凍櫃、地台暗格、椅背餐枱等，媲美歐洲 MPV咁細心。

首飾櫃隨時可雪藏 4罐飲品。 

中排地台有暗格，收埋工具或拖鞋最好。 

中排有餐枱，又有窗簾，小朋友同老人家都冧啦。 

拍低後排之後，可得出平坦空間。 

操控頗扎實

細 7人車車主多年輕人，雖然因為現實需要而低頭買 7人車，但心裏面團火其實未熄，間中都想開快啲放恣一下，如果唔係 Honda Stream同 Toyota Wish點解要做到咁 sporty？ Carens採用 2.0公升引擎，馬力輸出達到 177匹！比同級最大馬力嘅 Wish足足多 19匹，而且採用 6速+/-自動波，加速反應唔錯，比現時流行嘅 CVT波箱更凌厲。不過最令筆者另眼相看係 Carens嘅操控功架一啲都唔馬虎，底盤頗扎實，喺青山公路一帶大彎，行車表現其實有幾分似歐洲車，實在難得。

Toyota Picnic車主何先生Carens個車廂都幾舒服，而且呢個價錢咁齊料，抵買！ 

車架及底盤都有歐洲車味道，穩打穩紮。 

後排座位單薄，而且坐得貼地，小朋友先啱坐。

中排有齊 3個頭枕，而且中間位有三點式安全帶。 

前座設有座墊高度調校，女士們都啱揸。 

KIA Carens Spec.

Carens車身比 Stream及 Wish短，但車身較闊，所以車廂空間都不俗。 

引擎： 1,999c.c.直四
馬力： 177ps/6,500rpm
扭力： 21.5kgm/4,850rpm
傳動： 6前速自動，附+/-模式
懸掛：前麥花臣支柱，後多連桿
制動：前透氣碟，後實心碟
車身： 4,525 X 1,805 X 1,610mm
車重： 1,469kg
車價：$199,900起
查詢： KIA Hong Kong（ 2760 9933）

同級苦無對手

以前韓國車代表平價、質素一般，今時今日代表抵買、設備齊全。 KIA Carens以優惠價$199,900開售，唔單只平到車迷心動，連日本對手都人人自危。以 KIA Carens引擎輸出及車身大小，可以搵到 3個對手，分別係 Toyota Wish、 Honda Stream及 Mazda5。

6座最貴 Toyota Wish 2.0
想搵部平過$300,000嘅日本 7人車已經冇可能，想搵部超過$300,000就容易得多，同 Carens同級嘅 Toyota Wish 2.0，車價達$313,775，而且只設 6座位，中排有 walk through設計，會係同級中舒適性最高。此外， Wish 2.0輸出 158匹馬力，配 CVT 7速+/-波，玩樂味十足。

操控掛帥 Honda Stream 1.8
Honda Stream以往同時設有 1.8及 2.0型號，不過現時只有 1.8版本發售，配 140匹馬力引擎，而且波箱選用入門級別 5前速款式，吸引力相對唔大，好彩 Stream嘅底盤功夫相當好，揸落似房車多過 7人車，所以一直有唔少人追捧。車價方面唔算貴，$267,889起。

獨家雙趟 Mazda5
雙趟門多數只出現喺大型 7人車，要喺細 7人車上擁有，暫時只有 Mazda5。 Mazda5外表極之流線形，車門獨家有波浪線條，吸引到要靚樣嘅用家。此外， Mazda5都採用 2.0公升、 144匹馬力引擎，配 5速+/-波，性能唔算出色，但車價$236,900起，可能係最平嘅日本 7人車。

撰文：袁國基
攝影：葉偉豪