數年前還對牛扒烹調一竅不通的 Andrew，現在已可流利說出每個部位的特性和建議食法。 

青雲路

80後聯席董事　由打雜做起 李智豪

職業無分貴賤，但現今飲食業給人的印象始終是低一線， Andrew（李智豪）反而覺得行行出狀元，由銀行界轉戰食品集團，憑藉不怕吃虧，事無大小都會親自參與，人事部、餐飲部及採購部都有他的影子，恍如一個打雜， 3年時間由助理升至聯席董事，更希望讓人對飲食業改觀，吸引人才，帶出任何職業機會是要自己把握和創造。

「張枱擺喺呢邊，望到個景可以開揚啲……客人對新推出嘅 dinner set反應點？……招聘新人方面順唔順利？……貨存量夠唔夠？……」去到位於青衣城的 Mr. Steak，只見 Andrew一邊巡視店鋪一邊與店鋪經理交流。
今年 29歲的 Andrew是鮮運食品有限公司的聯席董事，鮮運食品是專營中高檔次的食品貿易，在 00年開設了西餐廳 Mr. Steak。聯席董事聽起來頗為嚇人， Andrew笑說他只是一名高級雜工，「新店選址、點樣裝修；以至 menu設計及定價，我都會參與。入咩貨、去原產地睇品質，我要負責；分店請唔到人我要諗掂佢、客人有投訴要去了解……」看來一個見得人的 title，跟着的是一連串的工作和責任。
Andrew於 97年跟家人移民到加拿大，在那邊修讀經濟，畢業後便返港發展，「爹哋、家姐、姐夫都係做銀行業，可能咁對呢方面較有興趣，暑假會返香港喺銀行實習，覺得呢度嘅生活節奏適合自己多啲，加拿大嗰邊太慢啦，讀完書就入咗香港一間投資銀行做，一切都好順理成章。」

金融海嘯思考路向

Andrew（右）不時要到世界各地出差，嘗試新的牛肉用以引入公司，圖為出席澳門的和牛交流會。 

在投資銀行工作月入 3至 4萬， Andrew比大多數年輕人可算是順風順水，但在 08年碰上金融海嘯，令他重新思考自己的路向，「喺投資銀行工作好似玩緊數字遊戲，整一堆紙出嚟畀人買，賺咗就叫機會，但一個金融海嘯，見到更多係失望嘅臉孔，當時會質疑自己呢啲係咪自己想要嘅嘢。」
此時，有食材公司老闆給了 Andrew一個選擇的機會，「其實佢係屋企人嘅朋友，問我有冇興趣去佢間食材公司幫手，做佢嘅助理，好多人都話飲食業發展有限，但我又覺得行行出狀元，至少飲食係實業，想睇吓有冇新嘅發展空間，於是決定一試。」

由助理做起瓣瓣掂

店鋪的裝潢與設計也是 Andrew負責，可以說是工作忙個不停。 

成為大老闆的助理，很多人覺得成功就是運氣，但對於是白紙一張的 Andrew來說，要付出了 99分力氣去把握這份運氣，「主要工作係幫老闆整理開會資料，但實情係咩都會掂到，由入貨、餐飲及宣傳每個部門都會涉及，但自己一啲都唔識，惟有每晚返到屋企睇資料，一得閒就去唔同嘅餐廳、肉類市場睇吓，了解現時嘅市場，每晚只瞓到 4至 5個鐘。」
雖然 Andrew口說對飲食業沒有偏見，但心底裏不免輕視這份工作，「為咗盡快做出成績，自己覺得可行就同老闆講，好似試過行過一個鋪位，覺得人流唔錯，就同老闆提議喺嗰度開鋪，一定賺硬。老闆只係叫我唔好咁心急，我梗係唔服啦，但佢同我分析番附近有同類餐廳競爭，租金等成本未必 cover到，原來真係唔可行。」

收起自傲虛心學習

Andrew不時會巡視各區店鋪，了解客人的需要。 

收起了自傲， Andrew多做事少說話，「老闆去開會，就喺隔籬聽，需要唔同部門嘅資料就親身去嗰度問。有啲嘢我都主動話想幫手，未必一定要係大事，好似宣傳單張嘅標語、招聘日嘅攤位布置及人手安排等，主要想了解到公司嘅日常運作。」
慢慢 Andrew開始在公司業務發展上，提出一些不錯的建議，香港西餐廳多提供西冷、肉眼、牛柳的牛扒選擇，而他認為可以作一些大膽嘗試，引入不同品種的牛和不同部位，讓餐廳更具特色，「港人鍾意啖啖肉，西冷、肉眼就成為主流，但其實一隻牛仲有好多唔同部位都可以製成牛扒，好似牛臀肉、側胸腹肉等，畀大眾有更多嘅選擇。」為公司處理的業務漸多，在 12年被擢升為聯席董事，月入超過 6萬，是對他付出的一種肯定。

商場開鋪吸區內客

中途加入的 Andrew，沒有傳統的桎梏，大膽的嘗試令公司業務得到更大的發展，「本身餐廳做開$400至$500人均消費，但當擴充去一啲商場嘅時候，未必符合到當區大部分人嘅消費能力，我就建議不如試吓推出$200至$300一個扒，可能有啲前輩會擔心搞 cheap咗，又怕間鋪維持唔到，我會耐心同佢哋解釋，最後佢哋都接受。」現時 Mr. Steak共有 7間分店，有 3間開設在消費力較高的銅鑼灣區，其他開設在青衣、沙田及旺角，多方面的發展，讓公司的盈利增長了約 40%。
帶來創新之餘， Andrew亦堅持一些傳統，「香港食牛扒好多人習慣叫幾多成熟，但其實分唔到，對傳統西餐嚟講，應該係 blue rare、 medium、 medium-well等以核心溫度嚟區分生熟程度，咁廚師先準確畀到客人想要嘅嘢。」
除了生意額外， Andrew更希望令人對飲食業改觀，讓人平等看待這個行業，同時吸引更多的人才加入，曾在金融業打滾的 Andrew，對於飲食缺少培訓計劃，向公司提出有關建議，「好多人會覺得入飲食業冇咩前景，我參考咗銀行業提供嘅培訓計劃，畀畢業生喺唔同部門做嘢，令佢哋熟悉公司運作，完成咗個計劃有機會管理一間餐廳，有明確嘅晉升階梯，𠵱家都有十幾個大學生參與緊呢個計劃。」

Andrew（右）喜出海釣魚，享受生活。 

放假時， Andrew（右二）會與朋友旅行放鬆心情，圖為到北京時攝。 

副經理 Jim參加公司嘅培訓計劃入嚟，樓面、寫字樓都有機會接觸到，對管理員工同埋與公司配合上，可以有更親身嘅經驗，學到唔少嘢。

引入冷門部位吸客

香港愛啖啖肉，故肉眼和西冷扒大受歡迎，成為主流牛扒選擇，但 Andrew認為牛的不同部位也可作牛扒，他率先引入牛臀和側胸腹肉，吸引愛刁鑽的食客，牛臀幾乎沒有脂肪，口感柔軟；側胸腹肉則瘦肉與脂肪適度混合，味道濃郁。

後記

小事做起成就大事
記者與 Andrew在會議室做訪問期間，不斷有同事找他詢問，只訪問數句，就要處理新一件事情，看着 Andrew在辦公室與會議室來回奔走，開口總是不好意思、對不起，在記者看來已身居高位的他仍抱着這敬業的工作態度，明白到成功真要由小事開始建立。

點入行？

Andrew為吸引更多人才投入飲食行業，向公司建議在 Mr.Steak增設 Management Trainee Program，「參加 program嘅員工，會喺 1年嘅培訓期內到唔同嘅部門實習，令佢哋可以全面咁了解公司運作，而且有明確嘅晉升階梯會令員工更加有目標，視乎表現及本身經驗，完成 program嘅員工會任職 Supervisor或者 Assisant Manager。」

晉升階梯

Manager$17,000起
6年或以上經驗

Assisant Manager$14,000至$14,500
完成 Management Trainee Program/ 5年或以上經驗

Supervisor$12,500至$13,200
完成 Management Trainee Program/ 4年或以上經驗餐

Management Trainee$10,000至$12,000
大學畢業或中五畢業及從事飲食業 3年以上

Mr. Steak
查詢︰ 2972 4111

撰文：曾志恒
攝影：彭自維
部分圖片由被訪者提供