黃智雯首集成績尾二當晚即刻出局，而被巫啟賢勁鬧話「侮辱咗首〈等〉」嘅唯唯，第二晚成績尾三，要捱過第三集相信已經有難度。好彩第三集 7月先錄影，唯唯仲有得加操。《蘋果日報》圖片
真面目
星夢傳奇 一將功成 谷蕭正楠做歌王 梁烈唯黃智雯變《星夢》炮灰
近年內地歌唱真人騷《中國好聲音》同自韓國引進嘅《我是歌手》等勁 hit，個個爭住網上追睇，一向抄得快嘅無綫當然唔執輸，最近即食搞咗個《星夢傳奇》，搵班藝員圍內鬥唱歌。
不過要班當紅小生姐仔喺自己地頭被評判當面批評，班一線紅星當然睬你有味。冇大星肯做，惟有犧牲一班二線演員，梁烈唯和黄智雯率先成為炮灰，反而唱得嘅前歌手蕭正楠就獲厚待喺節目後段先出場，除多時間練習外更免除集集被人踩，無綫待蕭正楠算不薄囉！
小生花旦陪襯
《星夢傳奇》自稱面試過百藝員參加，據知總共有 17位藝員亮相，其中以經理人合約藝員居多，在上週有份亮相的張名雅、黄智雯、袁偉豪和張景渟，都已經在頭兩集玩完。《蘋果日報》圖片
三，四綫星搏命唱，但求有一唱成名機會，但無綫又怕啲星太奀冇人睇，所以點都要靠一班較出名嘅小生花旦撐場。
知情者說：「佢哋都知嚟做陪襯，贏咗又冇錢、又唔會幫你出碟，仲要企喺台俾評判鬧。而且個賽制係每集 foul兩個，由另外兩名頂上，即係你愈遲出場愈着數，早出場就要俾人評足咁多集，畀你都唔制啦！」
首集《星夢傳奇 》搵嚟黃智雯、梁烈唯和張名雅等上陣。結果兩位女將以最低分成績出局，而唯唯雖然過到骨，但第二集分數尾三危危乎，好難捱到落尾。
知情者說：「人哋內地啲節目真係有晒時間畀你練、又有專人教你唱歌，現場音響又靚， TVB班人就要顧住拍戲，邊有時間練？想唱得都好難啦！」
又玩全民投票
陳太失場《星夢傳奇 》有過百名藝員報名面試，據知第一日面試連升為陳太嘅陳茵媺亦有份，仲唱歌劇參賽，而且評價甚高，可惜最後要結婚生仔，所以玩唔到。《忽然 1周》圖片
全輯《星夢傳奇 》共 10集， TVB為了讓後段節目更吸引，已預留決賽位置畀蕭正楠、胡定欣等唱得之人出場。
蕭正楠表示：「我係冇面試，因為日日都開緊《巾幗》，我都好想玩，但暫時冇期。（預咗你入決賽喎！）點會呀？啲評判好嚴㗎，又會全民投票，冇可能內定。我驚到時最快叮走我添呀！」難得你咁快知會全民投票，話你冇準備都唔信啦！
四大壓軸
蕭正楠 最淡定
蕭正楠歌星出身，當年橫掃新人獎。近年隔個星期就北上登台搵食，唔使點練都應該唔會差得去邊。
最近到佛山忙拍《巾幗 3》，據知第二男主角嘅蕭正楠，場場有份，劇組不願放佢參加《星夢傳奇》。
胡定欣 決賽膽
胡定欣跳舞耍家， 99年仲入過全球華人新秀 4強，同屆有關心妍。最近忙拍《貓屎媽媽》，《星夢傳奇 》劇組可能要最後三集先要人。
王浩信 後期出
出過碟嘅王浩信亦被指穩入三甲，同樣全被安排後期先上《星夢傳奇 》。
王君馨 唱快歌
王君馨擅長快歌、跳舞，好大機會同蕭正楠最後一集登場。
夾定開火
周啟生、巫啟賢針鋒相對，兩個互窒火藥味濃，原來事前夾好。《蘋果日報》圖片 
周啟生張名雅首集最低分 146.3包尾出局，但周啟生就力撐：「我畀佢最高分㗎！其實佢可以唱得好㗎，起碼靚女先啦，佢跟我學幾堂肯定唱得好好多。」 
葉蒨文葉蒨文亦有份擔任評判，但周啟生就話佢：「 Sally淨係嚟睇靚仔，見人袁偉豪靚仔就畀多幾分。」
譚詠麟除咗火爆嘅周啟生、巫啟賢嚟緊仲有譚詠麟、甄妮、倫永亮做評判。不過《超級巨聲》入面好搶嘅 Miss Chan Chan同杜麗莎就冇份。 
甄妮 
倫永亮
五線鄭俊弘彈起
鄭俊弘首集唱陳奕迅〈時代曲〉技驚四座，攞 174.9分。第二集鄭俊弘唱 Robbie Williams〈 Angel〉繼續無敵姿態封王，評判巫啟賢激讚仲叫佢做 8月演唱會嘉賓。蘋果日報》圖片 
當年得監製梅小青𥄫中，喺其下作品有唔少演出機會，但自《法政先鋒 2》後突然星途急跌。 11年簽無綫做經理人，一樣要等運到。 
01年當時得 17歲嘅鄭俊弘參加新秀攞第二，可惜撞正華星結業，結果歌星夢碎。《蘋果日報》圖片
採訪、撰文：娛樂組
留言列表
