陳鍵鋒在 TVB不受重用,在內地卻套套做主角,而且劇組每次都為他買過千萬保險,又有替身,但他堅持自己做番吊威吔等動作。
真面目
小報告 佔領橫店 陳鍵鋒:起碼有番自尊
經常聽見藝人上橫店開劇,連林峯、王祖藍、佘詩曼都輪住去橫店拍劇霸地盤,香港藝人北上好似好馨香!
北上搵錢多過香港係人都知,好似近幾年才全力北上打滾的陳鍵鋒、第一批到橫店掘金的李彩華和劉愷威都已經穩坐一線長做長有。雖然北上掘金要離鄉別井,不過換來金錢之餘,原來仲有大台開工少有的尊重,難怪陳鍵鋒話:「錢係其次,起碼有番自尊。」
鍵鋒 3年前鬧爆無綫,指有高層大細超,又稱拍《學警雄心》車禍傷頸仍要開工,心淡離巢北上發展,繼而憑《美人心計》及《盛女的黃金時代》在內地竄紅。
5星級招待
現身處內地的陳鍵鋒在電話訪問中,表示曾經做到失去自尊:「以前喺一間機構工作,係冇自主權,返咗內地發展鍾意拍就接,唔鍾意就可以推,例如夏天拍古裝太辛苦,所以我唔會揀夏天去橫店開工,錢係其次,起碼有番啲自尊!而且唔會得罪人,因為我唔係一定要幫你拍嘛。」
陳鍵鋒解釋內地市場,演員可亮相任何電視台,只簽類似部頭形式的合約,而且提供一流配套:「有專車畀我哋,車裏面有床有廚房,劇組住賓館,我可以住五星級酒店,呢啲簽約前已傾好,只要製作單位想你參與,呢啲設備一定有。其實我要求好低,只要酒店夠乾淨,保安完善就 ok,收工唔好騷擾我,畀我打吓機做吓自己嘢就夠。」
陳鍵鋒做男一的《盛女的黃金時代》在內地好 hit,每隔一段時間便重播,他亦憑此劇在內地竄紅。
時裝、古裝連民初劇《亂世佳人》都拍過,陳鍵鋒在內地自言已經屬於產量少:「我唔會畀自己拍咁多,拍完一套一定要休息吓。」
《微博達人》有呂良偉等香港藝人合演,但陳鍵鋒話仍要盡量講普通話對白,配合其他國內演員。
1千萬保險
拍《學警雄心》傷頸冇人理,家陣陳鍵鋒每次斟拍內地劇,劇組都會為陳鍵鋒買至少一千萬保險,他亦要求在合約中寫明他並非武打演員,所有武打場面均需有替身:「但有時吊威吔呀,我做到都會自己做番。」
TVB拍戲忙到冇得唞,現時有自主權,有傳每集劇約收 15萬人仔的陳鍵鋒,希望每拍完一套劇都至少休息兩個星期,剛剛拍完《封神英雄榜》就去了沙巴潛水。「我覺得水裏面嘅世界好安靜,冇是非冇爭鬥、好平和,拍戲唔會拍到老,我已考咗潛水教練第二等牌,將來可以做潛水教練添㗎!」歎到咁,畀你仲返 TVB捱?
橫店多星睇
香港藝人湧住上橫店拍劇搵銀,如果秋天古裝劇高峰期,隨時有超過 20套劇及電影一齊開,現時炎夏亦至少有 7部電視劇在橫店拍緊,唔怪得人人話睇明星要去橫店。
《食為奴》
《老表,你好嘢!》原班人馬清裝喜劇,繼續有王祖藍、萬綺雯、張繼聰等,以清朝雍正時代為背景。
《大漢賢后衞子夫》
由加盟 nowTV的梅小青及劉家豪夫妻檔監製,而林峯因以過千萬身價參演此劇,而傳出有意過檔 nowTV,周麗淇亦有份參演。
《多情江山》
袁詠儀久休復出拍劇,與萬梓良合演,值得留意是袁靚靚與細她 11年的高雲翔有段姐弟戀。
《兄弟們上》
樊少皇剛剛慶祝完 40歲生日,就已忙住拍攝《兄弟們上》,他表示要 AB兩組日日早班連夜班,連拍 3個月趕工喎!
《喋血女人花》
劉愷威飾演抗日時期的國民黨高級教官,要秘密訓練一隊女子特工,負責暗殺、偷取情報、破壞日本特工組織等任務,勁過斯諾登。
《大漢情緣之雲中歌》
首次拍劇的 Angelababy在劇中捲入漢朝帝位爭奪戰中,戲中仲會有搞笑的風格和男裝造型。
《匹夫英雄》
馬德鐘即將拍完《匹夫英雄》, 7月就返港拍無綫的《飛虎》續集,他說:「當然鍾意喺內地拍劇啦,不過香港始終係自己屋企,唔使下下睇錢份上嘅。」
李彩華:人工多 60倍!
去年在內地播出的《五台山抗日傳奇之女兵排》,李彩華與惠英紅及張衞健合作。
內地拍劇待遇優厚,就如經常演女一的李彩華就有私人專車,車內有床有廚房等設備,等埋位時都可以休息一下。
阿媽做經理人
前年李彩華開始請媽咪做經理人,北上一齊住,照顧埋起居飲食,有錢搵梗係益自己人啦。
她每年平均拍四至五部內地劇,有時會選擇夾得來又高效率的拍攝單位,可以拍多幾部,搵錢最緊要快手。「呢兩年媽咪做咗我經理人叫好好多,照顧我又煲湯我飲,而且接劇一定以我做考慮先,其他經理人可能用錢行先,冇愛喺入面囉!」
雖然愛在港買樓,但在內地跑慣江湖,卻表示不會在內地置業:「對內地樓市唔認識,而且次次拍劇都唔同地方,好難買。」
搵埋老婆
香港男藝人北上難免感寂寞,難怪好多港星北上耐咗,都會惹上北方姑娘,連之前出名好丈夫的羅家良,都擺脫唔到拈花命運,拋妻跟北妹再婚。
魏駿傑 溝大學生
跟滕麗名拍拖 9年,終於在 09年不敵內地大學生張利華而分手,翌年魏駿傑亦火速跟張利華結婚生女,但至最近滕麗名再爆魏駿傑婚後用短訊求復合,賤男真面目。
陳浩民 娶強國模
03年開始主力拍內地劇的陳浩民,一直跟佘詩曼的關係糾纏不清,雖然陳浩民出名花弗,但最後都被湖南模特兒蔣麗莎收服,兩人於 11年結婚,同年 11月生下女兒陳雅薷。
羅嘉良 火速再婚
本跟前妻方敏儀結婚 9年,育有一子好幸福,可惜撈家長駐內地聚少離多,二人終於 08年離婚,半年後撈家便火速跟內地演員蘇岩再婚,婚後長駐北京,今年 4月誕下一女。
劉愷威:內地勁渴人才
本來完全唔識普通話的劉愷威,為求跟演戲對手有交流,苦練國語,現已能夠全劇以普通話演出。
拍劇 8國語言
劉老闆說:「要自己籌備班底、搵金主贊助,內地對所有崗位嘅需求都好大,我家搞製作就知,攝影師、化妝師、燈光、造型、剪接都好搶手,所以唔係香港藝人最吃香,係成個環境都好渴人才。我一年會製作最少兩部劇,其餘時間接其他單位嘅劇,都有時間拍吓拖㗎!」
在內地拍劇有一特色,就係無論你識唔識普通話,香港演員一定講番廣東話,寧願後期再配音,對此劉愷威就解釋,「其實香港、韓國、台灣有好多演員去內地,就算台灣人嘅普通話都唔標準啦,所以拍戲時都係各自講自己語言,後期配音係好普遍。當然演員聽唔明對方講乜唔係咁好啦,所以我用兩年時間練習,家已經全程講普通話喇。」
劉愷威自立門戶拍內地劇,正在上海拍攝《一念向北》,自己做埋男主角。
劉愷威與女友楊幂感情穩定,他說:「經常都見嘅,佢會嚟探我班!哈哈!」甜到漏。《蘋果日報》圖片
橫店傳說
農民建影城
橫店影城董事長徐文榮原來是農民出身, 75年開螺絲廠起家, 95年大導演謝晉拍《鴉片戰爭》物色外景來到橫店,卻嫌樹木不足打退堂鼓,徐文榮即動用財力移植大片樹林到橫店,建造成影城,發埋大達。
姦殺女演員
無綫在橫店拍攝《金枝貳》期間,傳出由吳奇隆投資的《白髮魔女傳》內有兩位內地女臨記遇害,被姦殺兼切胸肢解,雖然傳聞無法證實,但連當時在橫店開工的苟姑娘都表示擔心。
夏天要唞暑
原來影城都有淡季,由於橫店是古裝場地,夏天氣溫又可高達近 40度,演員穿着古裝非常辛苦,所以如陳鍵鋒、劉愷威等都不會在夏天接橫店戲,劇組亦多在夏季拍時裝劇,古裝街就顯得淡靜。
留言列表