漫遊毒物

貓巴士到港！　直擊千呎龍貓店

香港人跟日本文化密不可分，大抵由 30年前開始，唔少港人細個都會跟父母入場睇過一齣宮崎駿電影， 70後係《天空之城》、 80後係《移動城堡》，再細個啲就有《涯上的波兒》。最近宮崎駿間吉卜力動畫精品店： Donguri Republic橡子共和國，已來到尖沙咀海港城 LCX開首間外國店，近 1,400呎店面有部 1： 3貓巴士作鎮店之寶，一齊入去搵番你嘅童年開心回憶啦！

地點：尖沙咀海港城 3樓 LCX Shop 19
電話： 2376 3363
營業時間： 10:00至 22:00
網頁： http://www.facebook.com/dongurirepublic.hk 

香港獨家專車

香港 fans真幸福，日本店都冇呢部貓巴士，只有三鷹之森美術館內的兒童圖書館先有另一部。嗰隻能夠讓幼童爬上去玩，香港呢隻 1： 3比例嘅貓巴士，就禁止任何人攀爬，但大人細路都可以走入佢貓身體內，感受吓乘坐貓巴士嘅體驗。

車廂內都有晒毛毛，樓底夠高、 1米 8都可以企得直。正式開店時貓肚仔入面仲會有貴重展品 display添！ 

車頭地方牌寫住香港，有心思！ 

貓巴士對「車頭燈」仲識得着！但唔知乜嘢情況先會點燈。 

日本原味直送

記者都係宮崎駿影迷，去齊日本汐留同晴空樹兩家龍貓店 Donguri Republic，行入呢間佔地 1,400平方呎的香港店，裝修跟足日本，木地板配白木牆，四圍都係人工樹幹同青草，好似走咗入宮崎駿筆下動畫世界咁。店方話隻 1： 1龍貓同 1： 3貓巴士係日本原廠製作空運到港，仲搵番日本 staff親手來港插花、 set燈、油牆，真係一絲不苟。
其實點解會揀香港做全球龍貓首間海外店？專營吉卜力商品的 Benelic公司發言人戴小姐表示，雖然英國同法國都曾邀請到當地開店，但老闆認為宮崎駿作品係代表亞洲，所以想先喺亞洲開店，揀香港係因為我哋自《天空之城》時代就跟日本觀眾一齊睇宮崎駿電影長大，最能夠融入其文化中。而揀海港城 LCX係貪呢度有內地遊客之餘，個場夠 young有本地後生仔，希望兩路客人都能在店中認識吉卜力作品。

店內嘅陳設都由日本 staff飛過來 set，佢哋仲有負責人留港半年，傳授晒招數畀一班徒妹先至回國。 

大量使用仿原木材料，感覺好似走入龍貓森林一樣。 

天花板上都見細心位，比如有煤炭屎鬼、小龍貓同借東西的小矮人亞莉亞蒂！ 

精選商品

香港店商品款式達 700多種，商品售價比飛去日本買更平，更重要係 display得好靚，真心建議排完高峰期長龍掃貨後，將來可以再嚟慢慢行，買同睇都咁開心！
大門口右邊係毛公仔總匯，感覺好似重現緊動畫故事。左起貓巴士紙巾套（$890）、車站金屬紙鎮（$80）、 20cm高次子（$160）、中龍貓（$140）、白色小龍貓（$90）、後排大龍貓（$250）。此外，前頁 model身邊的 50cm龍貓（$1000）

3款布料摺扇，扇骨用色同通花各有不同。各$220 



龍貓耳連帽 zip-up parka，料唔厚、等入秋就啱着。（香港店限定品/$350） 

《千與千尋》 4R相架。$240 

《魔女宅急便》黑貓小天師刺繡圖案 Tote bag，各有 2隻 size。（香港店限定品/大$320、細$210）

天氣熱，帶條小方巾出街抹汗啦。（各款式分三種尺寸：大約$230、中約$90、細約$50）

專為 SkyTree店而設的和風布料荷包，雙層間隔。$330（另有橙色）

仿瓷花盆系列，有巨神兵頭像、龍貓花甫及其他款式。（各$240） 

絕少見《夢幻街少女》音樂盒，各售$380 

跟日本「洋食器」西餐用具權威品牌 Noritake合作的斯里蘭卡製骨瓷：連碟茶杯（$610）

等身大龍貓　合照有禮送

鎮店之寶除咗貓巴士，大門口左邊仲有隻實物原大龍貓，戴小姐話睇卡通時因為草子、次子兩個係小朋友，企喺龍貓身邊睇落以為佢好巨型，其實 Totoro只有 1.9米高，都高唔過姚明。
留意呀，店方搞緊個大龍貓合照活動，返出 LCX大門口外，仲有隻平面紙板龍貓，又有雨傘準備好畀你扮草紙合照，影完先去專門店排隊買嘢，畀錢時出示合照，每日頭 100位朋友仲可得到「煤炭屎鬼」襟章 1個。

記得合照送禮係搵呢隻紙牌龍貓，唔係店內嘅 1： 1龍貓！ 

每日頭 100個客人出示合照即可得「煤炭屎鬼」襟章 1個，每人限換 1個、不可揀色。

撰文：鍾世傑
攝影：傅新發
Model：麥兄