面對面
假如讓我拍 AV 《求愛》の綠魔 許嘉浩
許嘉浩,洋名 Karl,身兼公關、統籌、藝人經紀與形象顧問,為無綫真人騷《求愛大作戰》擔任人生導師,首集首曝光,有人說他「妖」、有人「妖」爆他,全靠個「妖」字,才 23歲,就一夜成名。
電視屏幕上的 Karl妖味極重,實情面對面時又有不少讓我意外的「男子」氣概。
比如拍攝開版照, Karl提議:「揀呢張好……呢張清楚見到喉核,等人知我真係男人。」
我發現他的濃密腳毛都還在, Karl補充:「加拿大毛都冇剃,中性打扮唔同易服癖,我唔係易服癖。」
他甚至說,自己平時也有看 AV的習慣(男女),影影吓相,主動扯下半邊上衣露膊,嬌嗲發問:「咁樣影我係唔係想推薦我去拍 AV呀?」
我忍不住反問:「你拍 AV,打算演男嗰邊定女嗰邊?」
Karl一點不覺得被冒犯:「咁以我嘅身體硬件嚟講,梗係演男嗰邊啦……」
這一刻,不知道大家有沒有像我一樣,腦海裏不由自主幻想起 Karl做起男優的畫面……雖然怎麼想怎麼覺得不對勁、不協調,不過我還是同意他的論點:「易服癖係病,中性係打扮,啲人咁得閒唔 WhatsApp吓女朋友,係要浪費嗰一分幾鐘留言鬧我,咁多留言、咁多個一分幾鐘,我要多謝你哋喺我身上用嘅每一分鐘就真。」
係囉,又要睇又要鬧,若非有個奇葩彈出有得你鬧,你班人咪又係嗌悶?一樣米養百樣人, AV都有得任君選擇傳統還是重口味,否則,你話個世界幾沒趣呢?
萬世巨星
兩週來,每天閒閒哋排五至八個訪問、照常還有公關活動以及為藝人準備服飾、星期一至五指定約埋《求愛》班底開 P看節目、凌晨 12至 3 clubbing、一不小心就直落早餐,然後又夠鐘買齊當天所有出版的報紙雜誌做功課……咁就八點,新的一天又開始。爆紅後冇覺好瞓, Karl卻處變不驚,一副萬世巨星的姿態坐在髮廊裏邊梳化邊做訪問,兩個助手一個執頭執尾、一個負責拍照即時發上 fans page,駕勢,不過態度良好。
「每個傳媒都有唔同要求,有啲搵我着女人衫、有啲就約我去唱 K,我都估到佢,係想知我唱男人歌定女人歌,到底可以唱到幾高音……喺呢行做咗咁多年,我點會唔知個遊戲規則。傳媒點寫我控制唔到,但點着我有得控制,無論笠膠袋定着女人衫,我一概自己安排自己設計。喺呢行咁多年,我一早學識,控制唔到嘅嘢無謂執着,但控制到,冇 100分,我都一定要做到 99分。」
重複幾次自己在娛樂圈生存已經好多年,實情 Karl今年才 23歲。不過有些人,天生就是�衛鰝熙 f,中學已經班長、風紀、各學會幹事、連升學輔導委員都撈埋,然後一己之力搞學校歌唱比賽,從自己校做到跨校、從跨校做到公開商業活動,中三就開始幫公關公司做兼職、中四就有自己 workshop幫星輝帶徐嬌、中五未畢業已經入職驕陽電影, Karl確係入行已經好多年, iPhone5裏的通訊錄,多達 3,497個人名:「記人名確係一個學問,有時真係分唔到,我就喺通訊錄入面寫清楚日期同活動名,慢慢合作多幾次再改名。所有 connection都係由中學儲落,工作有錢定冇錢,有時間我都盡量接,接得就一定唔會揸流攤,我嘅宗旨係,所有人都盡量唔想得失,你唔會知道,呢個人喺呢一單 job只不過係個打燈,我下個 job分分鐘就係佢一手介紹。唔係話𢱑撈,但係幕前幕後每一個角色,我都會尊重。」
真心好彩
說到尊重,三五年前一次工作機會,和 Karl有過一面之緣。三五年後,致電約訪問,一接通就聽到 Karl像是熟人一樣直呼全朵,又說一直有支持每星期這五版專訪欄目,本人確實感到尊重;說到妖,算是接受能力頗高的本人,見到 Karl每天在 facebook上的那些非男非女造型,本來亦頂不順。不過看到九成留言都係插、都話「想中佢」, Karl依然能夠保持鎮定禮貌、 EQ極高,我又覺得,比起圈中某些表面懶型內裏婆媽的男星,這位綠妖,其實胸襟廣闊有氣概得多。
「的確係, 100條留言有 90條都係鬧,嗰十個撐我繼續做自己嘅,我真心覺得溫暖。至於另外 90個,其實有時間,你大可同屋企人食飯傾偈,或者 send個 WhatsApp去氹女朋友,但係你將嗰一分幾鐘畀咗我,都要講聲多謝。反正點做都唔會可以討好地球上每一個人,點解我要為咗人哋去改變自己?」
六月十日《求愛大作戰》首播當晚, Karl已經因為一身綠衣與妖氣成功洗版,上位速度確係極速。
節目開播兩週, Karl每晚約埋《求愛》班底聚頭欣賞節目,被男學員包圍時,顯得極之享受:「我從來冇試過因為男性有生理反應。」《蘋果日報》圖片
本來是奀模黃榕、李蘊的經理人,做完《求愛》, Karl人氣勝過旗下藝人九條街,去到邊都被大量傳媒包圍。
出動訪問,梳化、助手四人跟身,架勢似巨星:「呢啲係準備充足,但係我唔係扮女人,我唔會搽唇膏。」
回憶初夜
有關性徵, Karl明顯有喉核,亦明確指出擁有男性硬件,有關性向, Karl一再強調,自己戀愛三次、三次都是女孩,試過露出修長白腿去看電影,被隔籬座的陌生男子借整跌爆谷抽水摸腳,第一個反應係起晒雞皮:「我冇特登去幫自己釐清性向,但係我諗有啲反應係本能、係天生,嗰次,我好嬲,一啲反應都冇囉。」
打扮中性,試過被摸腳亦都常被同性打 pat pat, Karl說不享受,不過亦不排除遇啱對手、夾啱氣氛,男男亦有可能 work。就像是他的第一次,就是女孩子做主導,半推半就再借點酒意才失去的:「等我諗諗先……中三……中四……應該係中五,拍拖送女朋友返屋企,事先我哋飲過酒……太 detail我唔想講,不過性呢方面,我 so far未因為同性起過反應,而女朋友,有啲感覺我冇得迫,每一次,我想講,我同對方都得到滿足囉。三次拖,三次都係對方主動,十幾二十歲嘅男仔,多數用下半身思考,呢樣嘢其實有得訓練,我一早出嚟社會打滾,中學開始已經識得訓練自己上半身思考,唔係下半身,所以嗰啲扮基溝女嘅指控對我嚟講,唔會成立。」雖然女方主動, Karl說每一次亦都是真心喜歡、沒有勉為其難的,不過有時衰黐身、有時衰難溝通,三段關係都是分手收場,他希望三十歲,可以帶個真心交往的另一半,回家見父母:「我都有人生計劃,都想按部就班,不過呢一刻,我享受嘅係工作體驗囉。」
除了形象顧問和公關,亦做過林莉經理人,對於二人因財反面傳聞, Karl說:「我試過因為年紀細被公關界前輩白眼,但從來未試過同人嗌交反面。」
中學在玫瑰崗中學是熱心搞手風頭躉,小學年代已經自選紅色褲着:「無論屋企學校定出邊,我從來冇試過俾人藐我嘅衣着同行徑,最多都係望多我兩眼。」
葡萄綠妖
Karl每天閒閒哋五至八個訪問,所以,打開電視翻開報章雜誌,鋪天蓋地到處是綠妖倩影,我看到有圈中經理人在社交網絡發表怨氣,話真心做表演工作的人好吃力,行為怪異的人就受到吹捧喎……
姑勿論 Karl呢股妖氣可以盛行多久,我想話,觀眾的眼睛是雪亮的,表演工作是否真的做得好,唔係你自己話囉。咁唔憤氣,到底係真心做緊表演工作、定純粹追求被追捧呢?所以我話,外表可以更 man、資歷可以更老,不過論到遊戲規則, Karl比很多人可能更耐玩。
留言列表