真面目
有你冇我 海報冇影避同台 黎明迫走古巨基
一連三晚的《雷頌德 Thank You演唱會》，一眾好友歌手黎明、陳慧琳、方力申和鄧麗欣等撐足 3場，而身為 Mark Lui死黨兼好兄弟的古巨基，唔單只宣傳海報冇影，連演唱會都只出現頭尾兩場，每晚唱完即閃，低調到離奇！
原本雷頌德一心打算與 Kelly、黎明和基仔齊齊影 poster谷宣傳，不過據知黎明卻要求海報只可以得自己一個配 Kelly，不可與基仔合影，搞到基仔好無奈。但為撐老死雷頌德，基仔惟有拍膊頭現身，在台上更盡量避免與金句王同時現身，都算捱義氣。
基仔唔得閒影 poster！（真實對白）週日完騷之後， Mark在後台被問到冷落基仔一事，他還死撐基仔第一晚有獨唱環節。
海報臨時改
好兄弟拍住上，到去年雷頌德宣布舉行紀念演唱會，基仔一早開口自薦演出，但年初演唱會的第 1款宣傳海報見街，竟只有黎明和 Kelly；到第 2款海報，亦只有一眾年青歌手，仍未見基仔出現。
知情人士說︰「初時海報構思的確係 Leon、 Kelly同基仔做膽，到拍攝當日，忽然改咗一王一后，大家都唔敢出聲。」黎明是 90年代天王，基仔 04年才回流香港樂壇，黎天王已經升格為唱片公司老闆兼捧新人，當然自覺身份有別。
正所謂手掌係肉、手背又係肉，據知度 rundown時，黎明亦要求有最多出場位，更不想與基仔同場現身。的確，在上週一連三晚騷，黎明和基仔完全沒有在台上碰頭；而尾場當晚，去到演唱會中段，基仔更要孖住方力申、 RubberBand和側田合唱一首〈年年有今日〉，連獨唱都欠奉，唱完之後就落台，未到 ending大合唱時，基仔已經鬆人。
方力申、側田和 RubberBand都各自有一 part表演環節，但尾場當晚，基仔只夾住佢哋唱咗首〈年年有今日〉咋！ 
Mark演唱會宣傳海報，惟獨欠缺古巨基。
雷頌德︰佢唔得閒影
眼見 Mark Lui是恩師，基仔在頭場都忍住啖氣，獨唱一首冷門歌〈大師作品〉，其他 Mark Lui監製的 hit歌，竟然完全沒有唱。
週日（ 23日）演唱會尾場，本刊記者問到 Mark Lui是否冷落了基仔， Mark解釋︰「佢當時唔得閒影，同埋影親嗰啲都晚晚唱，不過第一晚佢都有獨唱，今晚個 idea（與側田、小方合唱）係佢諗嘅，佢話想 remind番以前金牌嘅年代。」不過成個紀念騷，好似淨係 remind黎天王嘅光輝時代咋喎！
ending都冇影演唱會 ending大合唱，已經冇咗基仔嘅蹤影，而黎明就由頭唱到尾。 
古巨基喺雷頌德首場演唱會，只唱咗首〈大師作品〉，咁冷門，點贏盡掌聲呀？ 
《大雄》一碟中差唔多所有歌都係 Mark幫基仔監製，但離奇竟然在上週紀念騷內，一首大熱作都冇唱到囉！ 
Mark同古巨基以前同屬金牌，加上基仔得以重返樂壇，亦是由雷頌德引薦給 Paco，雷王古是當年金牌的「鐵三角」。
群星騷是非多
向來多星同場嘅場合就會多是非，唔係爭排位、就係傳不和，實行爭個你死我活。
Wyman千嬅泯恩仇《 YY Concert黄偉文作品展》雖則個個嘉賓都係 Wyman親自打電話邀請，幾乎集齊全港歌星，但惟獨欠缺千嬅。有傳 7年前， Wyman作〈最佳損友〉一詞暗寸千嬅，兩人積怨多年，直至 Wyman開 show當晚，千嬅才現身闢謠。 
陳淑芬惹火《開心果永遠欣想您演唱會》主辦人陳淑芬喺之前舉辦哥哥連串活動中，已經鬧出唔少風波，今次仲要被指渾水摸魚，借搞肥姐紀念騷嚟賺錢，而下週一的《七一巨蛋騷》更鬧出唔少是非， RubberBand和 MR.已先後宣布會把歌酬捐出，唱完騷後就去遊行。 
採訪、撰文︰娛樂組
攝影︰林迅景、鄭明川
留言列表
