十五歲的 Pakka為賺快錢做私影，他在尖沙咀碼頭，挨着黃色小鴨，擺出各種誘人性感 pose，旁邊的中年漢為之側目。 

城市脈搏

15歲私影仔　妖男的誘惑

誘騙少女私影，繼而發生的風化案，單是過去三個月，差不多每隔兩日便有一宗。最新鮮的是上週五，十四歲私影女答應男龍友到深水埗住宅拍性感照，其間教女童擺 pose，上下其手，事後少女無知得不清楚被非禮，後得社工發現方被揭發。
無知少女墮入陷阱，父母以為生仔安全得多，不過，本刊發現近期開始出現一批私影「男」。
這批少年被有「特殊癖好」的男龍友看中，誘騙他們出來擺迷人 pose，龍友按下快門，亦誘惑犯罪。
私影界，少男被淫慾的暗湧，初現。

「私影男等錢洗，有意 FB INBOX傾。」十五歲的 Pakka在網上討論區 3boys2girls的私影區發帖。
記者留言，找到 Pakka，在尖沙咀碼頭見面。

男影男變態

少男在網上討論區留言，自薦做私影 model，收費每小時一百至一百五十元。 

在五支旗杆下，身高一米六，只有一百磅的 Pakka，穿著恤衫、短褲，腳踏 Dr. Martens皮鞋，站在陽光下的青澀少年，與黃色鴨仔挨近擺起性感 pose。
Pakka憶述︰「我上年暑假第一次私影，其實嗰次係陪個女仔 friend去，影影吓個攝影師叫埋我一齊影。」他指該攝影師年約三十歲，滿面鬚根。「我覺得佢個樣好噁心，好猥瑣，但我見可以同個 friend一齊影幾得意，咪試吓囉。」 Pakka「處男下海」，攝影師由頭到腳打量他，想起也打冷顫。「佢一時叫我用手托下巴，一時又叫我擺三七面，嘟嘴、側頭、繑腳，咩都做齊。佢影完之後，望住啲相好滿意淫笑。」
有過第一次， Pakka膽生毛，認為私影可以搵快錢，開始在網上留言自薦做私影男。每小時收費一百五十元，不久便有攝影師找上他。「都係三十多歲的男人，約我去赤柱、屯門蝴蝶灣私影。我唔會問佢（攝影師）為乜影我，影完有錢收咪得囉。」 Pakka坦言︰「（私影）都驚㗎，唔知對方嘅性取向，如果佢好大隻，我都走唔甩。
「講真，男影女，多數都係鹹濕﹔男影男，點都有啲變態。」 Pakka兩手交叉抱着自己說。

邊有咁好彩

記者問他明知危險，為何仍要繼續？ Pakka無知對答：「無咁好彩，如果係咁好彩，嗱嗱聲去買張六合彩，哈哈哈。」
十五歲 Pakka覺得最好彩是中六合彩，因為錢在他心目中是「萬能」，「我想搵錢，但因為太細個，無人請。況且而家最低工資得三十蚊個鐘，私影一個鐘就一百五十蚊，好賺好多，又唔辛苦。」 Pakka直言如有攝影師叫他到室內拍攝，只要每小時加收五十元便可。「响室內影驚啲，咪收多啲囉。」私影賺來的錢， Pakka說︰「用嚟行街、買衫、食飯、玩囉。」
Pakka現於大埔區中學讀中二，他指老師曾提及有人在私影時，被拍下性感相勒索。「即時全班指住我，不過我覺得我唔會有事喎，唔好諗咁多咪得囉。」
Pakka父母離異，與母親、婆婆、舅父同住。他稱自小在女人堆長大，動作「乸乸哋」，所以私影擺 pose絕對難不倒他。 Pakka說︰「媽咪都知我做私影，佢唔鍾意我做，會鬧話危險，但都係叫我小心啲就算。」他指任職化妝品銷售員的母親每晚十二時才下班，婆婆不會理會他常外出晚歸。「我照做佢都理唔到我咁多。」 Pakka嘟起嘴地說。

Pakka在尖沙咀文化中心外，坐在樓梯上，嘟起嘴，花樣少年式望鏡頭。 

與朋友外出時， Pakka不時與女性朋友合照，擺出同樣可愛 pose。 

網上近期出現大批私影男，粗獷、柔弱、可愛，任有特殊癖好的龍友選擇。

Angelababy& G-Dragon

𡃁仔無知，總以為悲劇不會發生在自己身上。廿一歲，香港大學讀副學士二年級生 Jolue，四年前，就讀中五時便開始私影。
Jolue的名字，是他父親用法文拼音出來。他也像極法式少年，身形瘦削、皮膚白皙，訪問當天面搽粉底、眼畫眼線，戴着有色隱形眼鏡，陽光下要撐傘遮光。他以柔弱的聲線說︰「由細到大我都俾人話乸型，但我覺得呢個係我性格，我係『細心』，唔係 gay。」
在廣州出生，中五才來港的 Jolue，入讀了𡃁模 Angelababy所讀的學校︰「 Angelababy同我都係十幾歲從內地來港，讀同一間學校，佢都可以（做明星），點解我唔得啫？」
記者指 Angelababy是女，他是男，他即解釋說︰「俾人話乸型無所謂， G-Dragon（韓星）咪仲乸，你睇佢幾紅？」他說希望市場 buy他這類花美男。「大多數香港人鍾意羅仲謙嗰種肌肉男，但我都希望做啲嘢，起碼影私影可以儲多啲相做 portfolio，到真係有機會做明星時，我有舊相俾人睇。」

廿一歲的副學士二年級生 Jolue化了妝，撥起秀髮，對着鏡頭含羞地笑。 

Jolue坦言曾遇過變態龍友，偷拍他除褲。 

Pakka明知私影有危險，但為了賺快錢，唯有冒險。他的使費都是買手機，去街，與朋友吃喝玩樂。

已遇見變態

陶醉在明星夢中， Jolue說，所有「夢想」，都有付出。例如，私影中遇着變態。
「十八歲，中六放暑假，有個三十幾歲嘅男人响網上 add我想私影，佢話自己係中環時裝店老闆，响觀塘工業大廈有貨倉，叫我去觀塘私影。」 Jolue與該攝影師見面，第一眼已覺對方鬼祟，二人雙雙進入貨倉。「入到去，我見到有幾套衫，佢拎起其中一條黑色皮短褲，指住一個有塊布簾嘅角落，叫我行過去換。」 Jolue指拉起布簾後，愈發覺不對勁，「我四圍望，望到天花位有嚿黑色嘢，見到有嘢閃閃吓，我搵嘢揭開佢，發現裡面係鏡頭。」
他憶述︰「我當時勁驚，但怕出去直接踢爆佢，唔知會有咩事發生，於是我就出去同佢講話條褲唔啱著。佢個樣有啲唔滿意，就行咗去倉另一邊搵衫。我趁機衝出去，佢追出嚟，好彩大堂有個工人响度等𨋢，佢先好嬲咁入番去，嚇死我。佢三十幾歲，又高過我，真係反抗唔到……」 Jolue指手畫腳回憶。
Jolue指他私影十多次，九成是男攝影師，年齡介乎三十至四十五歲，「開頭私影，諗都無諗過會有事發生，始終我係男仔。」 Jolue猶有餘悸地說。「不過，原來呢個世界好變態。」

私影男安全意識低

早在今年二月，警方發現私影界出現了少男私影，警員放蛇，結果在網上找到四名中學男生，開價「齋影」收二百元，肛交收費五百至一千二百元。
男警於本月十二日與四名男中學生見面，當他們提出性服務收費時斷正，四名中學生涉嫌誘使他人作不道德行為被拘捕。行動中檢獲二十段淫褻影片，其中十七段影片涉及「少男」。
循道衞理楊震社會服務處社工謝紀良指，很多少男都過分樂觀，明知私影有危險，但危機感比私影女更低。
「男仔一般覺得自己無咩地方會蝕底，所以安全意識好低。佢哋會覺得就算出事，自己都搞得掂，其實高估咗自己。」
謝提醒少男私影，隨時有機會被雞姦，亦有可能被拍下性感照，繼而作出威脅。
律師梁永鏗指出，根據《刑事罪行條例》 118A《未經同意下作出的肛交》，任何人與另一人作出肛交，而在肛交時該另一人對此並不同意，即屬犯罪，一經定罪，可被判終身監禁。

撰文：陳剛
攝影：田俊、韋平