探熱針
懶理封殺 Sammi做燈 薛凱琪變曱甴
薛凱琪( Fiona)兩年前因無綫與四大唱片為版稅問題鬧不和,當時人在華納的她被受株連,直到去年滿約轉投黃栢高揸 fit的太陽娛樂,為無綫劇集《名媛望族》唱主題曲重生。
解封半年, Fiona上週六原定與師妹雷琛瑜( J. Arie)演出公益金節目的安排突然被取消,連帶《勁歌金曲》錄影通告也被臨時抽起,隨時再被封殺的 Fiona索性疊埋心水,以鄭秀文為榜樣,練成曱甴肚,向紅館再進發。
潛水唔覆
去年轉投黃栢高話事的太陽娛樂後,薛凱琪重出生天,見光半年,但最近又被無綫封殺。
「其實都未知原因,臨時取消錄《勁歌》通告情況經常都發生,我哋唔會覺得奇怪,但公益金單嘢就唔同, Paco搵人了解緊,但問咗幾日,無綫嗰邊都冇回覆。其實我哋都好無奈, book晒 studio俾 Fiona同 J. Arie排舞練歌,但開 show前兩日先話取消佢哋嗰 part節目, cut剩 Fiona唱新歌嗰分幾鐘,公司一路問住點解又冇人覆,最後咪決定連 Fiona都唔唱囉!我哋都等緊無綫答覆,都想知道原因。」太陽娛樂員工透露。
Fiona以 Sammi為目標操練曱甴肚,據知每日起碼運動一粒鐘,跟 Sammi一樣都係運動狂。
百萬谷新歌
面臨再被封殺,暑假出唱片的 Fiona不想分心,萬事交唱片公司處理。
「而家錄緊歌,加上仲有好多海外登台要做,成日都唔喺香港, Fiona剩係幫新歌排舞已經花咗近兩個月,跳到有埋個曱甴肚,佢話咁著露腰衫跳舞先靚,好似鄭秀文咁喎。另外, Paco已經開始申請出年紅館期俾 Fiona再開個唱,所以佢一有時間就跑步練氣,周身唔得閒。」
用一百萬拍 MV, Fiona不敢掉以輕心,谷曱甴肚之餘,更狂擺甫士晒靚腿。
拍 MV當日, Fiona無嘢落肚,只飲奶補充體力,枱面上的大裝紙包鮮奶,就是她的午餐及晚餐。
Fiona近年工作量多,據知跟媽咪行街 shopping都要預早向公司申請。
紅人專用
據了解,公司為 Fiona的新歌《週末畫報》去到盡,投資近百萬包括找來名排舞師 High King的班底為她排舞, MV更是由羅志祥、蕭亞軒等台灣紅人御用的導演比爾賈操刀。
「公司對我好好,俾排舞師 High King同兩個 dancer陪我飛去台灣拍 MV,個導演好出名,佢仲特別為我設計咗個粉紅色嘅 set,入面有個大斜台,拍起嚟啲畫面好有趣。呢個 MV算係我入行以來其中一隻用得最多 budget嘅歌,希望大家會鍾意。」 Fiona說。
Paco揸弗的太陽娛樂,旗下的新人歌手陳惠敏(左一)雷琛瑜(左四),早前被無綫叮出公益金節目。
第一次在紅館開個唱, Fiona亦有請 Sammi做嘉賓齊 jam歌。
Fiona今年專心唱歌,早前跟 Kary、王菀之及林二汶做 mini concert。
Fiona年多前跟老友鄭融齊患抑鬱症,兩人現已病癒,全力在樂壇拼搏。
留言列表