鄧萃雯寸爆：冇人叫我！
無綫重頭劇《金枝慾孽貳》首周平均收視僅得23點，劇中「宿敵」鄧萃雯與伍詠薇亦由戲裏鬥到戲外！對於新劇收視低開，雯女一於少理，更炮轟無綫沒邀她宣傳。反觀伍姑娘則拉埋近期人近勁升的苟芸慧上床，更將床照上載微博瞓身谷收視！
重頭劇《金枝慾孽貳》首周平均收視僅得23點，低過處境劇《愛．回家》！劇中仇深似海的鄧萃雯與伍詠薇，原來戲裏戲外一樣水火不容！雯女昨日出席慈善活動時，對於《金枝貳》收視欠佳先是表現輕鬆：「我做唔到啲咩，盡力而為啦！」她直言不會理會收視高低。提到她前晚沒與陳豪等拍宣傳片，她說：「關我咩事！唔係我唔拍，係冇人搵我拍！我好被動，但冇人叫我拍，我都有啲意外。可能佢哋拍夠晒啲片，唔使再叫我啦！」
「零劇本梗係唔明」
雯女又稱一早預了很多觀眾睇唔明《金枝貳》，因是監製戚其義等人的風格，但對於有演員都睇唔明時，她則寸爆地說：「零劇本，梗係唔明啦！如果早啲有劇本，有時間參詳會好好多！」據知雯女因推拍新劇《Aerobic Girls》而與無綫鬧僵，不過雯女表示會配合《金枝貳》宣傳活動，只是本周六因有工作在身，才未能出席。
而無綫外事部副總監曾醒明接受電話訪問時，亦否認無綫待薄雯女：「之前陳豪佢哋個宣傳係即興拍嘅，Ada（蔡少芬）都唔喺度啦！雯女同Ada都係女主角，一定會搵佢哋幫手宣傳。」
雯女對收視濶佬懶理，另一演員伍姑娘則對收視後勁信心十足！繼早前約了《金枝貳》全女班演員好友在酒店開派對睇首播後，日前再次舉行第二次派對，苟芸慧、梁嘉琪等均有出席，伍姑娘硬銷是「金枝2之開房周記part2」，她更將與苟姑娘的床照上載微博，實行借苟姑娘的強勁人氣吸收視。伍姑娘的落力宣傳，成功更吸引Ada留言，令她笑言下次開派對一定要預埋Ada。
「洩露」劇情吸引觀眾
其實無綫對《金枝貳》收視失利亦大為緊張，出盡招數谷收視，前晚找來陳豪、伍姑娘等人拍宣傳片，除罕有地「即拍即播」，即時放上官方網站及安排在節目《東張西望》播出外，無綫更安排Ada亮相本周六宣傳活動，以Ada誕下次女後首次出席公開場合作招徠。此外，無綫亦一改將《金枝貳》劇情保密態度，讓傳媒先睹為快尚未播出的集數，實行「穿橋」搶收視！
《金枝貳》插水有理
雯女自爆睇唔明
#video_player{width:100%;height:100%;}
■雯女坦言對《金枝貳》收視失望，相信無人不認同。
鄧萃雯挾如妃娘娘之口碑演出無綫新劇《金枝慾孽貳》，原本是萬眾期待，可惜劇集播出首周平均收視23點（約148萬觀眾），成績差強人意。昨日雯女在奧海城出席慈善活動時回應劇集收視低，衝口而出竟然說：「吓？關我乜事！」
冇人叫做宣傳
如妃的身份何等重要，但前日《金枝貳》的宣傳活動竟然失場，雯女踢爆事前未獲通知：「唔係我唔做，係冇人叫過我，你哋應該問點解唔叫我嗰個人，我好被動，我可以宣傳㗎！太意外，冇人叫、冇通知，或者佢哋夠片，唔使我啩？」她自言一向也不太重視收視，不過對此成績亦難免有點失望：「收視好唔好都唔會上心，天時地利人和，觀眾之前萬眾期待，係應該會好啲，𠵱家係有啲失望。」
■雯女在活動上強顏歡笑，辛苦晒。
■蔡少芬與雯女鬥戲，且看能否帶起收視。劇照
有指劇集內容太深，觀眾睇不明是收視差的主要原因，雯女亦坦言：「睇唔明就預咗，之前已經講過呢套劇要好靜心去睇，重睇至明。」問到對此劇明白多少？她竟面露不屑說：「零劇本梗唔明，如果有長啲時間參詳鑽研會好好多。」問到會否認同致命傷是內容太深？她說：「我唔想去論斷，我只代表自己一個，一個人鍾唔鍾意有好多原因，不過收視應該會上升，希望觀眾多啲耐性，之後會越嚟越精采，我同Ada（蔡少芬）有好多戲。」
採訪、攝影：魯萍
文：專案組
留言列表
