CY選特首，頭號「梁粉」張震遠（左）四出拉票，功勞唔細。上週，張震遠獲行政長官破例延任市建局主席，咁係未政治酬勞呢，又？ 

中環人語

CY打救張震遠

張震遠做咗市建局主席六年，本來今年完結， CY上星期公布延長呢個頭號粉絲嘅任期兩年。政府解釋，該局行政總監退休、多位非執董退任，「希望市建局管理層和領導層能有穩定性和持續性。」之但係，喺該局做執董七年嘅譚小瑩，已接任退咗休嘅行政總監，喺呢行話晒亦有三十年經驗。政府解釋話無人，故要留低張震遠，說服力弱啲噃！

張震遠在位期間，提出樓換樓、同需求主導收購計劃，都叫有些少建樹。但其另一「傑作」——商交所，就真係無乜作為喇。舊年商交所嘅業績認真麻麻，上佢網站睇，開張咁耐都係得兩件產品，好似「 32金衡盎司美元黃金期貨合約」，成交量比舊年同期跌六成幾，成交量嚴重萎縮。成間商交所嘅總成交，得港交所去年期貨總成交百分之三，無咩「人氣」，收入認真有限。有份開荒嘅首席營運總裁何振民舊年跳船，而據公司註冊處顯示，有商交所百分之一股份嘅錢果豐，至今年四月一日開始，亦都唔再做董事。
CY喺呢個時候扶番起張震遠，延長佢任期，話則每年袍金唔多，得十萬銀，但夠吊鹽水之餘，最重要可以保住頂主席光環，四出同發展商及生意人交際囉！

本週曝光
名釀不知何處去？

廉署年報只公布充公咗批法國名釀，但冇講到其下落，莫非…… 

眾所周知「貪湯」乃今之劉伶、係「國酒茅台之友協會」顧問，佢如何鍾情杯中物仲使講乎？廉署 2011年年報透露，「貪湯」在任最後一年，有單銀行貪污案充公咗一批法國名釀。年報冇講到批名釀去咗邊，你估呢？

Give me a break
「那些年」買樓懷舊照

本週一，《一手住宅物業銷售條例》正式生效，但負責執法的銷售監管局就好多嘢都未搞掂咁，新不如舊矣。上期本刊回顧了逾半個世紀的港人買樓史，不少中環人睇了都大呼過癮，尤其是六十至八十年代的舊樓書，讓「那些年」的買樓往事返晒嚟。
對比今時今日厚疊疊嘅樓書，當年嘅得十多二十頁，沒有人規定要寫乜、唔可以寫乜，但大家都老老實實，以「交代事實」為主，沒什麼歐美模特兒、外國風情作包裝，只係講吓交通配套未來發展，及哪裡會有政府綜合大廈等，最多都是作吓打油詩。想睇更多懷舊照？上面書啦！

一手樓銷售監管局的資源中心，本週一開始運作，成幅牆咁大的樓書櫃，無乜新樓書擺，只好放大量盆栽充撐吓。最 hea係，個局未有 logo，連整唔整都話聽緊意見，成立得倉卒啲喎。 

港鐵七九年才通車，賣樓花的荃灣中心樓書， sell有停車場兼商場，銀行分行當年亦是亮點。 

壹週刊 fans club

即上「壹週刊 fans club」睇相！

富豪元配當年今日

小宗近排搵舊相，發現富豪元配當年個個貌美如花，究竟邊個 keep得最好？首選郭炳湘太太李天穎，老公當年被「大富豪」綁架，佢有份談判，捱到今時今日，又爆出丈夫有紅顏知己 Ida Tong。李天穎採一隻字：「忍」，閒時跳舞做 facial，現時仍 fit爆！而彤叔同太太周翠英，後生時二人樣子敦厚樸實，邊諗到第時咁發？其後彤叔周旋喺年輕嘅契女、看護之間。彤嫂睇得開，遇上大場合，彤叔都係帶住彤嫂出來。
四叔前妻劉惠娟則甚少曝光，當年四叔發展半山麥當勞道惠苑，改英文名 Eva Court，就是以劉惠娟洋名 Eva命名，當年 Eva樣靚身材正，不過惠苑未入伙，佢兩個喺八五年已離婚。原因係佢前妻當年在恒基總部橫蠻愛爭權，同四叔分歧日多，即係「唔忍得」囉。近年極少露面的她，醉心佛法，曾出席兒子家誠婚禮，已無人認得！

郭炳湘太太李天穎年輕時，有點 baby fat，不過望落去，皮膚都幾好。 

李天穎不時出席公開活動，鏡頭下仍皮光肉滑，顯然駐顏有術。 

彤叔太座周翠英外表講唔上標青，但甚有霸氣。

喺大場合，好似周大福春茗，彤叔身邊嗰個，依然都係同佢同甘共苦過嘅太座。 

想當年，四叔前妻劉惠娟（右）穿起旗袍，表現高貴大方。 

梳冬菇頭嘅劉惠娟，近年已移居加拿大，與大仔李家傑一樣，醉心佛法。

金牙大狀講嘢
最後堅堡在法治

有朝一日啲法官大老爺都識得好似添•湯咁同內地搞關係，司法獨立蕩然無存，則香港核心價值就真正 game over矣。（《蘋果日報》圖片） 

香港勝在有 ICAC。勝喺邊度？勝在有添•湯顯明幫大家打通內地關係，早日中港共融、珠三角提前超標同城化？
呢啲問題嘅答案係乜，大家知之矣。三十幾年嚟 ICAC係香港核心價值嘅樣板，樣板淪陷，咁仲有香港核心價值可言乎？
不過大家唔使慌， ICAC失守唔等於香港核心價值全軍覆沒。 ICAC過去雖然打得，但未算最架勢，香港真正架勢堂嘅嘢叫做司法獨立。唯其呢味嘢夠晒架勢堂，故此未做國家主席，習近平一早喝住香港要三權合作；而梁愛詩加以呼應，將矛頭指向班法官，鬧佢哋唔識國情、錯讀《基本法》以致亂咁判案。
換言之，即使 ICAC淪陷大家都仲未使慄，到有朝一日班法官終於明白國家嘅苦心，或者學識添•湯咁搞內地關係，咁香港核心價值先至正式玩完。弊傢伙，律政司袁國強一早已經做咗廣東政協囉喎！

中環人語迷你版

我哋唔飲樽裝水，飲自來水。
估中邊個中環人講呢句說話，送你 JWATCH J-37尊貴版藍寶石鏡面限量版手錶一隻
有意參加者，請於五月六日 24:00前將答案電郵 mailto:centralman@nextmedia.com
小宗只接受電郵，郵寄免問。

上週人語揭曉

幫班工人做世界。
答案：霍建寧
得獎者： William Bo
中獎時間： 1:00pm 24/4/13

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年五月九日本欄揭曉。

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp:6829 5929