tvbfun娛樂八掛大放送★

前廉政專員湯顯明被爆擺豪宴、買靚酒，同內地官員經常飲飲食食，又送貴價禮物，掀起全城議論，真相如何有待進一步調查，市民另一興趣係當《寒戰》咁睇，想知道更多廉記高層嘅恩恩怨怨。

據線人講，廉政專員雖然名義上係廉記一哥，但向來管唔到負責調查工作嘅執行處，執行處處長掌管獨立王國，可以當一哥冇到。湯顯明出任專員後，本來相安無事，佢係「識撈」之人，又唔識查案，對執行處都好放手，同該處阿頭、廉記二哥李銘澤冇乜兩句，但到近年，兩人關係就變得唔多好。

線人指，李銘澤係廉記科班出身，深受傳統價值影響，清規戒律入晒腦，而湯顯明作風好唔同，行咗另一套，經常參加外界宴會，又鍾意送禮，更弊係，經常北上同內地班官聯絡感情，李銘澤睇到自然好唔順眼，據講曾經勸過阿湯唔好去咁多外界活動，因為專員個位要避嫌。由於對廉記作風同規矩睇法有別，兩人逐漸貌合神離。

湯顯明（中）出任廉記專員後，經常與外界應酬，又北上同內地官員飲飲食食，當時的執行處處長李銘澤（右）則對廉記清規戒律極之執着，對阿湯作風頗有微言，故兩人關係不佳。圖左為社區關係處處長穆斐文。

年幾前，李銘澤到咗六十歲退休年齡，如果阿湯向特首提出要求，可以延長佢任期，但阿湯冇咁做，所以佢到去年七月底就正式離職。阿湯當時雖有此權力，但政府更高層好可能已定咗意向，唔想李銘澤再延任，佢只係奉命行事，但咁做加深咗兩人心病。

不過線人認為今次有人爆阿湯料，同執行處無關，估計係廉記其他部門某些人員睇唔過眼，將佢活動嘅資料向外洩漏。睇番傳媒收到嘅料，都屬內部紀錄，只有安排活動或入帳嘅人員知道，記者冇可能搵到。廉政專員應酬及外訪活動多數由廉記社區關係處負責，現任處長係劉江華太太穆斐文，究竟漏料係咪同佢部門下屬有關，就要查過至知。

阿湯事件爆出後，坊間想像出另一《寒戰》版本，就係CY想修理廉記，於是叫審計署署長孫德基查廉記盤數，搵到帳目問題後，趁機整頓內部。但呢個故事只係想當然嘅「劇本」，CY應該唔會挑起廉記火頭，更加唔會搞到阿湯雞毛鴨血，況且專員同執行處長都已換人，新人事新關係，CY冇理由在此時製造同廉記嘅矛盾。

阿湯擺豪宴送大禮一事爆出後，引起政黨同傳媒追擊，手尾好長！