其中一處潛水點，底部是透明圓形玻璃，「我見到啲遊客喺下面好興奮，我覺得自己似變咗條魚。」
名氣生活
陳君宜潛入大魚缸
海洋潛水試得多，但潛魚缸就好少何，最過癮是一次過看到魔鬼魚、鎚頭鯊、蘇眉、藍鯨吞拿魚群，想清蒸或刺生上碟？喂！眼看手勿動。
喜歡上天下海追尋刺激的購物網站 http://zeuz.com 
老闆娘陳君宜，與潛水鐵腳、曾經做過友坂理惠師妹的梁綽妍，兩週前剛去了馬爾代夫潛水，五天內只見幾條大魚，難怪陳君宜大嗌：「真係好無癮！」返港後她知道海洋公園新出孭樽潛海洋奇觀大魚缸，同五千條魚同游，即刻試玩補番數，「未試過見咁多魚，有條豹紋鯊好似狗仔咁嗲，追住我哋玩；不過在魚缸內，我哋都變成魚，俾玻璃外的遊客不停影相同揮手，好搞笑！」
冇帶泳衣
陳君宜（ Qinnie）孖埋結婚三年多的梁綽妍（ Bibi）一齊潛魚缸，「我準備要做人，依家玩得就玩。」搞笑是她記得帶潛水衣，卻忘記帶泳衣，在旁掩嘴而笑的 Qinnie，亦被海洋公園工作人員細聲提點，「你哋唔好化妝喎。」原來他們怕化妝品影響水質，事前要求二人要零化妝，她鬼馬地說︰「眼睫毛係植上去，搣唔甩。」
「海洋奇觀」這大魚缸，直徑有五米半，水深有十二米，是全球最大水族館，她們雖有六、七年潛水經驗，落水前都要上課十五分鐘，了解潛水路線，半小時的潛水更有教練陪伴。
他們先潛到三米，再到五米，左邊成群吞拿魚出動，繼而跟鎚頭鯊擦身而過，抬頭一看有成幅地毯般大的魔鬼魚角鵬慢慢游過，「小丑魚已經睇到唔睇，吞拿魚同蘇眉則未見過咁大條，試過去馬來西亞 Layang Layang看鎚頭鯊，潛了五日一條都找不到，所以個 trip叫賴嘢、賴嘢。」
四百五十種魚游來游去，全缸最大的角鵬更在她們上方游過，但 Qinnie卻走漏眼，「吓？我見唔到呀。」 
潛魚缸最正莫過於保證見到大魚，魔鬼魚、護士鯊多到你睇唔切。 
只有幾個月大的豹紋鯊好活躍，見人就纏， Qinnie勁讚得意︰「屋企的貴婦狗都惡過佢。」
落水前要填表格及量體溫，更有潛水路線圖提供，絕不馬虎。 
本來 Qinnie自備了靚靚潛水衣，但因太薄要改穿公園提供的裝備，就連私人桃紅色蛙鞋（右圖）都唔著得。 
黐身豹紋鯊
有條在海洋公園出世的 BB豹紋鯊，似足狗仔鍾意嗲人，見人就黐。豹紋鯊纏完教練，想黐埋 Qinnie身邊，「平日係我哋追住搵大魚，好多魚見到人都走，呢條好得意，可惜教練不准我摸，但我隔住手套摸了一下，感覺好嚡手。」
Bibi笑言感覺最搞笑是當潛到去觀賞屏位置，被成團自由行當表演狂影相，「仲有人揮手，他們睇人好過睇魚。」潛完水，二人到魚缸旁的餐廳醫肚，見到蘇眉、藍鯨吞拿魚游過，激似餐廳揀海鮮， Qinnie開玩笑說：「以為即叫即蒸，哈哈！不過魚都係細條好食，大條養喺度睇啦。」
她們在海洋奇觀內的餐廳午飯， Qinnie望入魚缸才驚見有如此多魚，「潛水時唔覺有咁多。」當見到魔鬼魚游過，即叫攝影師影相留念。 
潛水套餐還包括到珊瑚保育室，由專人講解如何培殖珊瑚。
水中開大
馬爾代夫 
兩週前陳君宜與老公鄭躬明（右一、二），孖埋 Bibi夫婦（右四、五）第五次去馬爾代夫潛水，「南邊海底多魚同珊瑚，北面珊瑚是灰色。」 
帛琉潛水勝地她首推帛琉，「鐘乳石、水母湖及白泥湖是必到之處，十二月至五月是最佳月份。」
留言列表
