探熱針
揸舊車 泊錶位 睇平戲 窮浩龍 cheap冧祖兒
樂壇天后容祖兒，最近被死忠 fans高登天后「慈雲山鄭列瓊」背叛，過檔做楊千嬅 fans，反轉豬肚在網上唱衰 Joey。
不過 Joey好少理，繼續專注享受甜蜜生活。上星期二（ 23/4）下午， Joey劉浩龍拍拖到得小貓幾隻的數碼港戲院睇戲，搵錢能力遠低於女友的劉浩龍，拍拖慳住使，難得 Joey唔計較，依然冧到震。
為慳十四蚊
近期除了參加大陸中央台舉辦《舞出我人生》跳舞比賽外，容祖兒未有太多工作在身，正好讓她與保持低工作量的劉浩龍，有充分時間增進感情。
上星期二（二十三日）下午四點，劉浩龍做司機，駕駛出廠已經十三年的寶馬 325i坐駕，與 Joey到數碼港睇戲。為了慳錢，劉浩龍放棄將車泊在商場內時租十五元停車場，而選擇街邊時租八蚊錶位，寧願要樂壇天后女友行多一段路，只為慳番十四大元。
以往出外拍拖二人總會悉心「打扮」一番， Joey例必戴口罩戴帽，但戀情愈來愈公開，她不顧公司及老闆的勸告，堅持拍拖光明正大。唔再偷偷摸摸，當日 Joey只戴了黑超，加上該時段數碼港一帶人少，二人行埋，更加毋須避忌。
劉浩龍貪平，唔將部車泊入停車場，泊喺街邊錶位。 
行去戲院期間， Joey一度捉住劉浩龍隻手，想拖住手行，但突然又縮手。 
上番劉浩龍架車， Joey一見記者影相，即用太陽擋遮面。
捉手五秒
其間 Joey一度忍唔住捉住男友隻手，但維持幾秒，醒覺太張揚的 Joey即縮。入到戲院，女友去洗手間，劉浩龍負責買飛，二人選擇了四點十分開場，由杜琪峯執導的《毒戰》，由於是星期二關係，票價有優惠，每位五十五元，比其他日子八十元平了二十五元，兩張飛加埋，足足平了五十大元。
睇平戲，劉浩龍連水同爆谷都慳番，片長一個小時四十七分鐘， Joey一啖水都無得落肚，有情就夠飽。
雖然男友慳住使，但 Joey不覺屈就之餘，反而冧爆！離開戲院時， Joey不時含情脈脈望住男友，兩人有講有笑；上車後發現有記者拍照， Joey便立刻拉低太陽擋遮面，劉浩龍則唧出笑容，雖然拍拖又斷正，但 Joey心情靚，嘴角漏出陰笑。
睇完戲， Joey同劉浩龍上了張敬軒屋企，張更把與 Joey合照放上 Instragram，但就冇提到劉浩龍。 
他們選擇在星期二睇由古天樂主演嘅《毒戰》特惠場。
買衫貼男友
星期日（二十八日）， Joey又同男友出動，到中環一間中檔價錢日本料理拍拖醫肚，同行還有一位男性友人，食飯期間，劉浩龍對女友都服侍周到，不時夾餸給對方，令 Joey開心得如小鳥依人般，挨落男友膊頭。飯後由劉浩龍埋單，並坐的士離開。
劉浩龍拍拖要慳住錢用，但 Joey對男友卻出手闊綽，自己去買衫，亦經常行埋男裝，幫劉浩龍置裝，每次出手，閒閒哋要幾萬，相比劉浩龍請食飯睇特價戲，無得計。
28/4做完活動， Joey即會合男友去中環開餐，兩人排排坐，不時互望傳情， Joey更比平時笑得開懷。 
當日下午， Joey同陳奕迅及食物及衞生局局長高永文出席器官捐贈活動。
上星期劉浩龍與英皇瓊姐（ Yumiko真名鄭列瓊）同場，見到女友被高登瓊姐狂插，唔知他有冇搵呢個瓊姐幫拖。 
日前發現劉浩龍在跑馬地撳錢，之後揸車再接 Joey出街。
Fans變節
愛窮郎
女星嫁個有錢人，比比皆是；但也有不少女星唱反調，甘願同收入比自己低一大截男性拍拖、結婚。
郭羨妮、朱少杰
貴為無綫一線花旦，下嫁內地武指朱少杰，兩人拍拖期間，女方要屈就住北京簡陋公寓，生女要自己找醫院數，即使郭母對女婿稍有嫌棄，仍不損一家三口生活。
何超雲、陳山聰
賭王千金何超雲個個唔揀，睇中拋妻男陳山聰，戀情一致不被外間睇好，早前小聰子遭超雲狠飛，但他死纏爛打，飛到英國送外賣花言巧語成功箍番煲。
朱茵、黃貫中
Band友出身的阿 Paul，自從 Beyond解散後，收入大減，朱茵不但沒有嫌棄，更願意一齊入住深山村屋，去年為阿 Paul未婚大肚。
留言列表
