原本公關公司只係預咗四、五十個位，點知「反應」咁熱烈，好彩間鋪夠大，仲有空位騰出嚟。 

IGOSSIP

食字當頭

想多啲傳媒嚟採訪，公關公司真係諗咗唔少招數出嚟，例如搵星出席、送紀念品，甚至包埋餐晏。搵星唔係次次 work，因為搵着啲二打六奀星，娛記真係睬你有味。都係有嘢食最實際，好似上個禮拜一風堂拉麵店出咗隻電子印花 app，正常嚟講，手機 app好難 draw到傳媒出席，平時去發布會，都係得幾個 IT記者，之不過當日就好墟冚，現場數人頭，竟然有七十幾個傳媒，差啲以為自己去咗 Samsung S4旗艦機級數嘅發布會。點解有咁多人？因為有小儀做嘉賓？嗰隻 app俾李嘉誠嘅創投基金睇中咗？錯晒，事關當日有三款拉麵俾傳媒試食，至於隻 app有乜特別功能，真係關人鬼事囉。

一碗拉麵賣$88，事後聽番，有行家食齊三款新口味，差啲連湯都飲埋，佩服佩服！ 

覆息出禍

唔好話覆訊息危險，淨係睇都唔好啦，你自問揸車有冇保持兩秒距離先？ 

成日勸人揸車嗰陣唔好睇手機，不過真係冇乜人聽得入耳。美國一對夫婦最近就 post咗一張相出嚟，希望警惕啲人唔好咁做。張相並唔係好似政府啲醉駕藥駕廣告咁血淋淋，而只係一張影住 iPhone開咗 Messages嘅畫面。張相最震撼嘅地方係背後個故事，原來 Heit兩夫婦個 22歲嘅仔，就係揸車返學嗰陣掛住耷低頭打字，搞到架車駛咗過隔籬線，結果自炒身亡。 iPhone上嘅畫面，就變成佢嘅死亡留言，大家真係要引以為鑑喇。

嘟圖買貨

「貨架」上嘅貨根據吳獻昇講全部都係熱門貨，仲要係 1:1實物原大，等啲人可以睇到實際有幾大 size。 

如果近日有經過港鐵金鐘站或將軍澳站，有冇留意到實惠嘅虛擬貨架牆紙？只要行埋去用手機嘟一嘟相關貨品嘅 QR code，就可以 link返去實惠網站買嘢。其實虛擬貨架呢招外國有咗好耐，近近地好似南韓，就有唔少地鐵站黐咗呢啲貨架喺度。問番實惠點解揀 QR code，行政總裁吳獻昇就回應話其實佢哋都有考慮過 NFC，不過就覺得未係咁成熟，仲話嚟緊會喺八個華懋旗下商場貼牆紙添，喺香港都算創新，值得鼓掌。不過，唔知香港人係咪冇乜好奇心，小記上個禮拜企咗喺金鐘站半個鐘睇反應，居然只得兩、三個人發現張牆紙，仲要連試嘟嘅意慾都冇。不過，個人意見係運費太貴，試嘟買易潔鑊，隻鑊賣$194，但竟然收$90運費！即係焗住要人買滿$250（免運費）啫。

text：周群雄、勞耀全