《巾幗梟雄3》重口味 林盛斌 Bob 淫辱 胡杏兒

■Bob同杏兒喺新劇演床戲，齋聽都感受到陣味—重口味！設計圖片及設計對白

由DJ界撈過公仔箱嘅林盛斌（Bob），早排喺無綫劇集《老表，你好嘢！》飾演程少山好出位，劇中佢同湯盈盈嘅床戰激爆又超好笑，令到Bob人氣急升，即刻成為搶手貨，就連金牌監製李添勝都搵佢客串重頭劇《巾幗梟雄之諜血長天》扮演日本軍官，日前佢仲同女主角胡杏兒拍咗場肉搏戲。
為咗扮好日本軍佬角色，Bob喺人中貼咗執鬚仔，驟眼望真係幾鬼淫邪，原來劇情係講愛國人士胡杏兒為咗套取日軍機密情報，不惜玩到肉體誘惑，Bob明知杏兒十萬個唔願意，不過美色當前，索性霸王硬上弓！導演一roll機，赤膊嘅Bob就騎喺杏兒身上有所舉動，仲用力搣杏兒塊面，逼佢望實自己副淫樣，劇情後嚟交代Bob知道自己俾杏兒利用，內疚到剖腹自盡，獻出處男螢幕一死。

怕畀囡囡睇

Bob為咗演出呢場戲，專登搵日文老師惡補幾句日文對白，拍嗰陣仲好緊張，佢話：「全靠杏兒帶我入戲，呢場戲好大膽吓，拍時幾尷尬，現場工作人員係咁笑，希望到時出嚟觀眾唔好當笑片啦！杏兒不愧係視后，我仲要多謝添哥咁益我，客串都同視后有床戲。」Bob又自爆拍床戲前有同老婆申請，不過唔想囡囡睇到，因為怕佢會呷醋。而杏兒拍完呢場床戲後，都喺微博留言：「相信大家一定會有意外驚喜，辛苦晒！」聽落場戲都好吸引吓喎！
版主：陳基征

■原來杏兒有唔少拍強姦戲經驗，喺《亂世佳人》經已同日本兵交過手。
劇照

■Bob早喺《老表，你好嘢！》已試過剝衫示眾，估唔到咁快encore！
劇照