現年 50歲嘅湯佬叫座力因應片種時好時壞。前作《烈探狙擊》屬動作片，收 2億美元。但另一前作、音樂劇《搖滾歲月》只收 5千 6百萬，連億元都唔到呀陰功。 

來路貨

湯告魯斯　佔領科幻世界

．諗起湯告魯斯，你會記得《職業特工隊》系列，回味佢 N年前嘅《未來報告》、《強戰世界》等科幻片。至於中途轉型拍嘅
劇情片、音樂劇？統統冇印象囉！
．所以話，都係食老本最穩陣。
．新作《攻．元 2077》，湯佬回歸拿手科幻片，加上《創戰紀》型格導演，唔寄望你開創咩新潮流，但求票房穩穩陣陣，唔好影衰「天王巨星」呢個頭銜咁就得喇。

女主角本來由今屆金球影后謝茜嘉積絲婷主演，但對方因《狙擊拉登行動》辭演，改由奧嘉古莉寧高負責。奧嘉 2005年曾任邦女郎，身材，放心，一定 OK。 

奧嘉被執行任務嘅湯佬發現，兩人其後被革命軍追殺，齊齊着草。 

革命軍首領由摩根費曼（左）飾演，副手則搵嚟尼古拉高斯達華竇（右），佢近年憑電視劇《權力的遊戲》而大紅。

湯告魯斯（ Tom Cruise）拍科幻片有幾勁？俾堆數字大家參考下先。 2002年《未來報告》， 3億 6千萬美金票房，佔該年全球最賣座第 10位。再嚟 2005年《強戰世界》，電影本身好爛，但離奇地狂收近 6億，乃當年最賣座第 4位。
數字反映現實，現實通常殘酷。湯佬轉型拍第二啲電影，即刻出事。 2007年劇情片《命運迷牆》只收 6千幾萬，音樂劇《搖滾歲月》仲衰，收得 5千 6百萬咁大把。呢個 moment，又點可以唔信命？咁啱經理人睇過《攻．元 2077》劇本，於是順理成章推薦湯佬飾演。
《攻．元 2077》（香港 4月 11日率先上映）由約瑟高辛斯基（ Joseph Kosinski）執導。本身係新仔嘅佢，處女作《創戰紀》拍得夠型格，不過口碑一般。今次第二次執導，講真，真係有啲懷疑，但唔知點解，電影公司又好 buy喎。
據知電影係導演自家創作嘅漫畫小說。喺籌拍過程期間，曾獲 3間大型電影公司爭奪版權。結果由 Universal奪得，高層仲大讚劇本前所未有咁出色。

周一（ 1日），湯佬跟女主角到莫斯科宣傳電影，有傳兩人拍戲日久生情，不過睇個樣似宣傳伎倆居多。 

湯佬宣傳新戲，前妻姬蒂則留喺紐約湊女。早前姬蒂被化妝品牌 Bobbi Brown邀為代言人，本月初更半裸為雜誌《 Allure》拍封面。 

為女惹麻煩

咁劇情講咩呢？講外星人襲擊後 60年，當時地球爛到似廢墟，幸存嘅湯佬就負責搜集地球僅餘嘅資源，然後移居其他星球。點知搜集期間意外發現神秘女子，除咗引嚟革命軍追殺，更令湯佬漸漸發現事實真相。咩話！捱咗咁耐騾仔先知俾人呃，好明顯電影又係一齣打工仔悲歌囉。

導演約瑟高辛斯基（右）前作《創戰紀》口碑普通，但全球狂收 4億美金。 2014年更會繼續為續集執導，認真好命。 

摩根費曼捉咗湯佬入革命軍基地。據講劇情幾出人意表，電影公司叫大家千祈唔好爆結局。 

拍開有鋪癮，湯佬下一部作品《 All You Need Is Kill》都係科幻片，預計 2014年 3月上演。 

地球被外星人侵襲後，陸地已經變廢墟，湯佬就跟其他成員住喺一個類似天空之城嘅物體，以藍、白、灰三種顏色為主調，跟地面混亂漆黑明顯唔同。 

撰文：娛樂組