句句金
句句金
中國樂壇天后那英、章子怡分別為不同唱歌真人騷擔任導師。那英自言不明白電視台為何請演員身份嘅章做導師，更毫不客氣指出：
隔行如隔山，不是音樂專業的，做音樂導師是很困難。
係有道理嘅，不過唔試過點知呢？好多踢波唔叻嘅轉行做教練一樣成功；歌星出身做影后嘅例子亦有，凡事唔能夠咁武斷嘅。
面對那英批評，章子怡非但冇嬲，更表示要向對方好好取經，
有質疑才有進步。
態度完全正確，尤其佢虛心學習呢點，更加抵讚。
跟郭富城合演《同謀》嘅張家輝，被問到片場內見過城城啲紅顏知己未？佢表示冇，不過就補充：
我都想問吓佢點可以搞得起緋聞，我搞咗幾十年都搞唔掂。
人哋城城未結婚點同你！你記得你仲有老婆關詠荷㗎呵？
離婚後嘅黎明首次推出新歌〈我可以忘記你〉。被問到歌曲背後有冇含意？佢反應極大再度爆金句：
如果唱歌唱到有含意就大件事，咁就乜都唱唔到，行又行唔到，做又做唔到人㗎啦。
乜天王冇聽過「憑歌寄意」呢句成語咩？唱歌唱出心聲先會投入。原來貴為四大天王嘅黎明，唱歌一直只當「工作」。
《女警愛作戰》宣傳活動上，周麗淇被安排坐喺謝天華大髀玩遊戲。周坦言好耐冇如此親密舉動，我都唔記得幾耐冇坐囉，不過搵男人唔係只坐大髀㗎。
搵男人係要俾你依靠、錫你吖嘛。講冇用㗎，用行動證明，快啲擺個男友出嚟啦。
全站熱搜
留言列表
