博出位

至純真

強國開通財路，儘管六四紀念日迫在眉睫，但一班藝人喺微博上聲都唔敢聲，無謂同啲人仔對着幹。相反， 6月 1日嘅國際兒童節，眾星就義無反顧上載童年珍藏靚相，緬懷逝去嘅青葱。畢竟我們都曾經年輕過、反叛過，曾經無怨無悔抗爭過。

鍾欣桐牀照再現

阿嬌鍾欣桐雖然剛被韓籍男友 K先生狠飛，但佢依然開心晒童年照慶祝兒童節。原來佢自細已經識得喺牀上輕托香腮擺誘惑姿勢，呢啲咪叫三歲定八十！

我細細個已經好犀利！ 

陳小春包冇認錯

陳小春個樣十年如一日，除咗有個招牌豬膽鼻， cool爆嘅表情同剷青頭都冇變，連佢老婆應采兒都忍唔住寸佢大細路，不過老婆講到明，兒子陳皮出世後，小春嘅細路脾氣就要收吓。

傅穎回到未硬時

塊面愈嚟愈硬嘅傅穎，大膽公開陳年舊相，佢得幾歲嗰陣面闊兼眼矇矇，同依家個硬膠樣差天共地，呢啲咪叫女大十八變囉！

羅志祥粉面 BB

一向玩嘢嘅羅志祥，影咗張大人版 BB相賀兒童節，不過眼袋大之餘，雙眼仲布滿紅筋，又鬼咁厚粉，真係嚇親細路仔！

劉若英高班講理

奶茶劉若英天生靚樣，又出書又填詞，絕對係才女一名，佢仲藉住純真嘅兒童節，暗喻娛樂圈虛偽，認真高班。