身為教徒嘅李亞男話，好在獲藝人之家嘅朋友支持，令佢重拾自信。點都好，信自己啦。
媽咪姐
李亞男自揭似隻龜
上周五（ 31日），天生沒有四肢的勵志演說家 Nick Vujicic，喺澳門搞咗場佈道會，媽咪姐專程過海聽下道理。「鬼妹」陳明恩同「藍嫂」李亞男都有喺會上唱歌同分享。
「藍嫂」話自己由加拿大返港初期，試過有導演問：「 Leanne點解你啲步伐會咁慢嘅？點解你啲廣東話會咁差嘅？」甚至有人當面笑佢：「點解你咁肥嘅？要減下啦！」李亞男話嗰陣好唔開心好自卑。「我係一隻烏龜，唔知點解由細到大，身邊好多朋友都係兔仔，行快我好多。入到娛樂圈，覺得自己好慢咁向前行，就算我唔同人比較，傳媒都會問：『點解你慢人哋咁多？』嗰陣就有人同我講：『 Leanne不如你諗下計仔，你試下出 function着得性感啲，或者我陪你整啲緋聞，你就多啲曝光率，出名啲！』我好迷失，照住佢哋講咁做，係多咗啲曝光率，但我返到屋企好唔開心，究竟為乜呢？我點解要改變自己？」
「鬼妹」陳明恩亦呻曾被人排斥：「我係香港人，但慢慢長大後，發現香港人唔會當我係自己人。讀中學嗰時，香港嘅女仔會一齊去廁所，不過呢啲糖黐豆嘅時候唔會黐我，我好孤單。我想俾香港人接納，但就算我染埋黑髮，人哋都唔會當我係香港人。」咦，估唔到兩位靚女咁好條件，都好多心事喎。
鬼妹贏晒
陳明恩獻唱咗三首歌，高音甜低音準，引得全場歡呼聲。而李亞男走音幾次，觀眾亦拍掌鼓勵佢。
周永恒同老婆趙頌茹帶咗兩個女上台唱詩歌。被問到周啓生發生涉獨留阿仔在家，佢就話可能阿叔請唔到保母。
上周六（ 1日）阿 Nick嚟咗香港，今次王君馨有份上台分享。當日曬到癲，但阿 Nick都聽得好專心㗎！ 
久未露面嘅衞詩都有去聽 Nick講道，佢成個人圓咗，仲成熟咗囉！ 
你邊係龜呢？你係我嘅傻豬！（設計對白） 
就如阿 Nick所講，做人最緊要永不放棄，做到最好！阿女，共勉之呀。
留言列表
