嗚……我要雅倫姐姐同我人工呼吸呀！食完雪糕，李思捷着上一件雪到變冰嘅長袖衫。雞手鴨腳嘅佢，搞好耐都穿唔到一隻袖，全程𠵱𠵱哦哦，萬箭穿心咁款，唔知以為佢俾佢口中嘅女神陳雅倫飛咗㖭！
媽咪姐
李思捷扮嘢叻過玩嘢
媽咪姐一向都信「日久見人心」，尤其喺娛樂圈，只要紅少少啫，好多藝人就即刻現形！《忽周》早前先講李思捷做《玩嘢王》後自覺升呢咗，同阮兆祥、王祖藍唔同 level，「福祿壽」散晒。
周一（ 3日），媽咪姐又見識到佢嘅「另一面」嘞！話說嗰日李思捷同郭晉安、曹永廉同陳敏之等齊齊錄影《超級無敵獎門人終極篇》。講真吖，論卡士梗係當家小生郭晉安勁啲，而陳敏之同曹永廉假假哋都係「女二」同「男二」！李思捷呢，叫做啱啱單飛，食住《玩嘢王》個勢，有多少人氣囉。所以佢醒呀！一早吩咐「任點女友」王寶寶（春卷）入電視城探班，幫佢吸多啲注意力同版位。之但係咁喎，李思捷又唔俾女友發聲，記者啱啱影咗兩張相啫，佢已經嗱嗱聲話：「佢路過之嘛，唔好影人哋！放過佢，你哋（指旁邊嘅單立文同春卷）借尿遁啦。」打晒眼色叫 friend底嘅單立文拉女友走（慌唔係驚記者問春卷，點睇男友同陳雅倫單攬啜緋聞咩！）。
事後媽咪姐發現，過完橋抽完板嘅李思捷喺化妝間揸機，幫春卷同其他男藝人影相，忽然又好男友上身。到玩遊戲嗰陣，李思捷就將表情以十倍放大，當正自己係「喜劇之王」，總括嚟講， over囉！
你估李思捷食緊啲乜，個樣可以咁痛苦呢？砒霜？傻啦，係全世界最難……令人討厭嘅雪糕囉。睇佢個樣，真係辛苦晒！ 
影完即棄
被男友徵召入「城」嘅春卷，成功引到記者影相後，即俾李思捷老友單立文捉走。阿女，揾番啲志氣，咪成日俾人老點啦。
俾番甜頭
話晒春卷都山長水遠咁「路過」將軍澳工業邨入面嘅電視城！李思捷之後都幫女友揸機，影番張靚相，做吓樣都要嘅。不過，之前春卷幫佢影咗成 10張先囉。
兄弟重逢？
周二（ 4日）又有《獎門人》錄影，呢次揾咗歐陽震華、朱咪咪、孫佳君同阿 Bob（林盛斌）做嘉賓。睇牌面，以為都係靠歐陽 Bobby同朱咪咪搞氣氛。吖！估唔到一出場，先發現阿 Bob同 Bobby竟然由頭似到落腳，失散兄弟一樣，搶晒！
呢晚阿 Bob好艷福，前有「童顏女神」樂瞳箝實，後有一代性感女神孫佳君攬住，真係重死都抵！睇佢個樣，真係辛苦晒！
核凸噴水
留言列表
